44 günə yazılan möhtəşəm salnamə

Şanlı zəfər Azərbaycanın beynəlxalq nüfuzunu daha da yüksəldib

"Azərbaycan xalqı "Heydər Əliyev İli" çərçivəsində 8 noyabr Zəfər Gününü daha böyük coşqu ilə qarşılayır, çünki bu il ərzində ərazi bütövlüyümüzlə yanaşı, suverenliyimiz də tam təmin olunub. Artıq bayrağımız nəinki Şuşada, eləcə də Xankəndidə, Xocalıda, bütün Qarabağda dalğalanır".

Bu sözləri "Azərbaycan" qəzetinə açıqlamasında Milli Məclisin deputatı, Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva deyib.

Deputat qeyd edib ki, üç il öncə noyabrın 8-də mədəniyyətimizin beşiyi olan Şuşa şəhərinin erməni işğalından azad olunması tariximizə Zəfər Günü kimi yazıldı. Buna qədər Azərbaycan şanlı zəfər üçün böyük yol qət etmişdi. Nəhayət, Prezident İlham Əliyevin Müzəffər Ali Baş Komandan kimi gərgin əməyinin nəticəsində Azərbaycan ərazi bütövlüyünə qovuşdu, xalqımız dünyada mübariz, döyüşkən və müzəffər xalq kimi tanındı.

Azərbaycanın zəfərə düşünülmüş, qətiyyətli və uzaqgörən siyasətin nəticəsində nail olduğunu deyən S.Fətəliyeva bildirib ki, 30 il ərzində Azərbaycan danışıqlar masasında prinsipiallıq göstərərək, eyni zamanda güclü ordu yaratdı: "Ordu quruculuğu hər zaman Prezident İlham Əliyevin dövlət siyasətinin prioritet istiqaməti oldu. Bütün illər ərzində dövlətin büdcə xərclərinin əsasını məhz hərbi xərclər təşkil etdi. Nəticə etibarilə Azərbaycanın müasir, güclü ordusu yaradıldı. Sonda müzəffər ordu, qəhrəman hərbçilərimiz 44 gün ərzində erməni işğalçılarını torpaqlarımızdan qovdu".

Otuz ilə yaxın müddətdə davam edən danışıqların nəticə vermədiyini qeyd edən komitə sədrinin müavini deyib ki, bununla belə beynəlxalq təşkilatlarla əməkdaşlıq münaqişənin həlli üçün zəmin yaratdı. Azərbaycan münaqişə boyunca bütün aparıcı beynəlxalq təşkilatlarla əməkdaşlıq etdi və münaqişənin həlli üçün hüquqi baza hazırladı. BMT Baş Assambleyası, Qoşulmama Hərəkatı, Avropa Şurası, Avropa Parlamenti, İslam Əməkdaşlıq Təşkilatı və digər təşkilatlar qətnamələr qəbul etdi. Avropa İttifaqı ilə paraflanmış sənəddə sərhədlərimizin toxunulmazlığına, suverenliyimizə və ölkəmizin ərazi bütövlüyünə dəstək göstərildi. Bütün bunlar münaqişənin həlli üçün hüquqi əsaslar idi. Dağlıq Qarabağ münaqişəsinin nizamlanması üçün 24 mart 1992-ci ildə təsis olunmuş ATƏT-in Minsk qrupu fəaliyyətinin 29 ili ərzində məsələnin həllinə yox, dondurulmasına çalışdı və bununla da illər ərzində aparılan danışıqlar nəticəsiz qaldı. Həm işğalçıya, həm də işğala məruz qalmış tərəfə eyni münasibət bəslənildi və beynəlxalq qətnamələr kağız üzərində qaldı. Azərbaycan daim beynəlxalq hüquqa sadiqliyini nümayiş etdirərək münaqişənin danışıqlar vasitəsilə həllinə çalışdı. Mötəbər beynəlxalq təşkilat olan BMT də işğalçı Ermənistana təzyiq göstərməkdə acizlik nümayiş etdirdi, tərəfləri sülhə çağıran bəyanatlarla kifayətləndi. BMT Təhlükəsizlik Şurasının Ermənistan silahlı qüvvələrinin işğal olunmuş Azərbaycan ərazilərindən dərhal çıxarılmasını tələb edən 4 qətnaməsi 27 il kağız üzərində qaldı.

Deputat vurğulayıb ki, Ermənistanın aramsız davam edən təxribatçı addımları, bəyanatları, hərəkətləri müharibəni qaçılmaz etdi, nəticədə 2020-ci ilin sentyabrında İkinci Qarabağ müharibəsi baş verdi: "Müharibə dövründə xalq öz "dəmir yumruğ"unu, birliyini və gücünü nümayiş etdirdi. On minlərlə insanın orduya könüllü kimi yazılması, eləcə də təxribatlar zamanı öz evlərini tərk etməməsi faktı Azərbaycanda xalq-ordu birliyindən və orduya olan inamından xəbər verdi. 44 gün ərzində hər gün Azərbaycan Ordusu irəli gedirdi, hər gün yeni şəhərlər, kəndlər, qəsəbələr, yüksəkliklər azad edilirdi. Azərbaycan əsgəri, zabiti bir amalla vuruşurdu - işğala son qoyulsun və tarixi ədalət zəfər çalsın. Beləliklə, Azərbaycan Silahlı Qüvvələri 44 gün ərzində düşmən ordusunu məhv edərək öz ərazi bütövlüyünü bərpa etdi. Azərbaycan Ordusunun 2020-ci il sentyabrın 27-də başladığı uğurlu əks-hücum əməliyyatı nəticəsində noyabrın 9-dək 5 şəhər, 4 qəsəbə və 286 kənd işğaldan azad edildi".

S.Fətəliyeva bildirib ki, həmin ilin noyabrın 9-dan 10-a keçən gecə üçtərəfli Bəyanat imzalanmaqla Ermənistan kapitulyasiya aktına qol çəkdi. Azərbaycan Prezidenti İlham Əliyev, Rusiya Prezidenti Vladimir Putin və Ermənistanın baş naziri Nikol Paşinyan tərəfindən üçtərəfli Bəyanatın imzalanması ilə hərbi əməliyyatlar dayandırıldı. Həmin bəyanata uyğun olaraq, Ermənistan noyabrın 20-də Ağdam, 25-də Kəlbəcər, dekabrın 1-də isə Laçın rayonlarını Azərbaycan Silahlı Qüvvələrinə təhvil verdi. 2022-ci ilin avqustun 26-da isə Laçın şəhəri, Zabux və Sus kəndləri nəzarətə götürüldü: "Qəhrəman hərbçilərimizin şücaəti, rəşadəti hesabına, şəhidlərimizin qanı-canı bahasına dünya Azərbaycanın şanlı qələbəsinin şahidi oldu. Müxtəlif dairələrdən olan müntəzəm təzyiq və təhdidlərə rəğmən Azərbaycan öz haqq savaşında zəfər çaldı".

Sədr müavini vurğulayıb ki, zəfər sayəsində "Ermənistanın güclü ordusu var" və "erməni xalqı döyüşkən xalqdır" kimi miflərə birdəfəlik son qoyuldu. Azərbaycan Ordusu peşəkarlığı ilə təkcə Ermənistanın silahlı qüvvələrini deyil, həm də erməni mifini məhv etdi. Cəmi 44 gün ərzində Ermənistan ordusu, hərbi texnikası, canlı qüvvəsi məhv edildi və Azərbaycan öz gücünü, qüdrətini göstərdi.

"Bu ilin aprelin 23-də "Laçın" sərhəd-buraxılış məntəqəsinin qurulması isə böyük Şuşa zəfərindən sonra əldə edilmiş ən böyük və əhəmiyyətli hərbi-siyasi qələbə kimi Azərbaycan tarixinə qızıl hərflərlə yazıldı. Bununla da Azərbaycanın sərhəd bütövlüyü təmin olundu. Eləcə də, bu il 19-20 sentyabr tarixlərində ordumuzun Qarabağda keçirdiyi lokal xarakterli antiterror tədbirləri nəticəsində separatçı rejim təslim oldu və suverenliyimiz tam təmin edildi. 15 oktyabr tarixdə Xankəndi şəhərinin mərkəzi meydanında Azərbaycan bayrağı qaldırıldı. İyirmi il bundan əvvəl prezident seçilmiş cənab İlham Əliyev xalqa müraciət edərək söz vermişdi ki, Azərbaycan xalqının, dövlətinin milli maraqlarını müdafiə edəcək və Azərbaycanın ərazi bütövlüyünü qoruyacaq. Belə də oldu! Hazırda işğaldan azad edilmiş ərazilərdə böyük quruculuq işləri həyata keçirilir. Eyni zamanda qalib Azərbaycan regionda yeni reallıqlar yaradıb. Tarixi zəfər nəticəsində Azərbaycanın beynəlxalq müstəvidə mövqeləri daha da güclənib, bu istiqamətdə uğurları daha da artmaqdadır", - deyə S.Fətəliyeva bildirib.

Əsmər QARDAŞXANOVA,

Azərbaycan.-2023.- 4 noyabr, № 242.- S.6.