Qarabağ və Şərqi Zəngəzurun bərpası
dövlət büdcəsinin
prioritetlərindən biridir
Qarabağa və
Şərqi Zəngəzura
qayıdışı milli
çağırış kimi xarakterizə edən Prezident İlham Əliyevin şəxsi nəzarəti
altında tarixi ərazilərimizdə sürətli
bərpa və quruculuq işləri aparılır. Ötən
üç il müddətində də
dövlət büdcəmizin
prioriteti məhz bu milli hədəfə
nail olunması istiqamətindədir.
Xatırladaq ki,
2020-2022-ci illər ərzində
Qarabağ və Şərqi Zəngəzurda
gerçəkləşdirilən bərpa-quruculuq işləri
ilə əlaqədar
dövlət büdcəsindən
təqribən 6,6 milyard
manat məbləğində
vəsait ayrılıb.
2023-cü ilin dövlət
büdcəsində Böyük
qayıdış proqramının
icrası üçün
5,3 milyard manat, gələn ilin büdcəsində isə
Qarabağ və Şərqi Zəngəzurun
bərpasına 4 milyard
manat vəsaitin ayrılması nəzərdə
tutulub.
Noyabrın 3-də Astanada
Türk Dövlətləri
Təşkilatının "Türk Əsri" çağırışı altında 10-cu yubiley Zirvə görüşündəki
çıxışında Prezident İlham Əliyev də diqqətə çatdırdı
ki, üç il əvvəl Vətən müharibəsi
başa çatdıqdan
dərhal sonra Azərbaycan işğaldan
azad olunmuş ərazilərində genişmiqyaslı
bərpa-quruculuq işlərinə
başladı: "Bu məqsədlə artıq Azərbaycan büdcəsindən 7 milyard
ABŞ dolları həcmində
vəsait sərf edilib. Növbəti il ən azı
2,4 milyard ABŞ dollarının
ayrılacağı nəzərdə
tutulur".
Böyük qayıdış
proqramı uğurla icra olunur
Qayıdışa sürətli
hazırlıq görülən
Qarabağ və Şərqi Zəngəzurda
müasir infrastruktur layihələri həyata keçirilir, dəmir yolları, avtomobil yolları, tunellər çəkilir, elektrik enerjisi, su təchizatı
və digər mühüm işlər görülür, "ağıllı
kənd və şəhərlər" salınır.
Artıq bu ərazilərdə iki beynəlxalq hava limanı - Füzuli və Zəngilan hava limanları tikilərək istifadəyə
verilib. Laçın Beynəlxalq Hava Limanının isə tikintisi həyata keçirilir.
Tarixi yurdlarımızda
həyata keçirilən
bütün bu işlərə şəxsən
nəzarət edən
dövlət başçısı
İlham Əliyev mütəmadi həmin bölgələrə səfərlər
edərək yeni təməllər qoyur, açılışlar edir.
Bu il sentyabrın 29-da Zəngilanda
keçirilən "Davamlı
şəhərlər iqtisadi
inkişafın hərəkətverici
və bərabərsizliklərlə
mübarizə aparan qüvvəsi kimi" mövzusunda 2-ci Azərbaycan
Milli Şəhərsalma
Forumunun açılış
mərasimində çıxışı
zamanı Prezident İlham Əliyev söylədi ki, Böyük qayıdış
proqramı və onun icrası artıq imkan vermişdir ki, keçmiş məcburi köçkünlər Laçın
şəhərinə qayıtsınlar,
Füzuli şəhərinə
qayıtsınlar, Ağalı
kəndinə qayıtsınlar,
Talış və Zabux kəndlərinə qayıtsınlar: "Yəni
bu gün 8 şəhər və 92 kəndin baş planı artıq təsdiqlənib və 30 kəndin təməli qoyulub. Qarşıdan gələn illərdə
çox böyük,
irihəcmli yaşayış
layihələri həyata
keçiriləcək, xüsusən
də Şuşa və digər şəhərlərdə. Bu,
bizim proqramın tərkib hissəsidir".
Zəfərin qayıdış
töhfəsi
30 il ərzində
vəhşicəsinə dağıdılan,
daşı daş üstündə qalmayan yurdlarımız bir-bir abadlaşdırılır, qurudulmuş
bulaqları, çayları
yenidən çağlayır,
qırılmış meşələri
pöhrələyir.
Qarabağ və
Şərqi Zəngəzura
Böyük qayıdışa
start verilməsi, minlərlə keçmiş
məcburi köçkünün
Zəngilan rayonunun Ağalı, Tərtər
rayonunun Talış, Laçın rayonunun Zabux, eləcə də Füzuli və Laçın şəhərlərinə qaytarılması
isə, heç şübhəsiz, Şuşa
Zəfərinin xalqımıza
bəxş etdiyi misilsiz töhfədir.
İndiyədək 175 ailə (871 nəfər) Zəngilan rayonunun Ağalı kəndinə,
20 ailə (90 nəfər)
Tərtər rayonunun Talış kəndinə,
315 ailə (1205 nəfər)
Laçın şəhərinə,
258 ailə (928 nəfər)
Füzuli şəhərinə,
21 ailə (94 nəfər)
Laçın rayonunun
Zabux kəndinə köçürülüb. Ümumilikdə, bu
günədək 3188 keçmiş
məcburi köçkün
dədə-baba yurdunda
əbədi xoşbəxt
həyata başlayıb.
2026-cı ilin sonunadək
isə Qarabağa və Şərqi Zəngəzura 140 mindən
artıq insanın geri dönməsi nəzərdə tutulur.
Tarixi yurdlarımızda
aparılan mühüm
bərpa-quruculuq işləri,
ard-arda həyata keçirilən qayıdış
prosesləri dövlətimiz
tərəfindən Böyük
qayıdış proqramının
uğurla icra edilməsinin parlaq təzahürləridir.
Bu sevincli və qürurverici işlər Prezident İlham Əliyevin də hər zaman fərəhlə səsləndirdiyi kimi, bu torpaqların əsl sahiblərinin qayıdışının təntənəsidir.
Yasəmən
MUSAYEVA,
Azərbaycan.-
2023.- 5 noyabr, № 243.- S.7.