Sosialyönümlülük prioritetdir

"Azərbaycan Respublikasının 2024-cü il dövlət büdcəsi haqqında" qanun layihəsi Milli Məclisin komitələrində müzakirə edilib. Növbəti ilin dövlət büdcəsində sosial müdafiə və sosial təminat xərclərinin, eləcə də işğaldan azad edilmiş ərazilərimizin yenidənqurma işlərinə ayrılan vəsaitin artırılması büdcənin prioritet hədəflər üçün etibarlı maliyyə təminatı yaradacağından xəbər verir.

Mövzu ilə bağlı qəzetimizə danışan Milli Məclisin deputatı Rüfət Quliyev bildirib ki, 2023-cü ilin 9 ayında makroiqtisadi göstəricilərdə artımın müşahidə olunması növbəti ilin dövlət büdcəsinə müsbət təsir edir.

"Layihəyə əsasən, 2024-cü ildə ümumi daxili məhsulda artım 2,4 faiz proqnozlaşdırılır. Yəqin ki, gələn il də, bu il olduğu kimi, makroiqtisadi göstəricilərdə artım müşahidə ediləcək. Gələn ilin proqnozlarında inflyasiya səviyyəsinin 5,3 faiz proqnozlaşdırılması da müsbət haldır. Bu, Azərbaycan iqtisadiyyatının dinamik inkişafından xəbər verir", - deyə deputat söyləyib.

Rüfət Quliyev qeyd edib ki, büdcədə sosial xarakterli güzəştlər vasitəsilə əhalinin vergi yükünün azaldılmasını da müşahidə edə bilərik. Ümumiyyətlə, gələn ilin büdcəsində sosialyönümlü işlərə ayrılan vəsaitin həcmində artımlar olacaq. Büdcə xərclərinin 45 faizinin sosialyönümlü olması nəzərdə tutulub. Belə ki, təkcə sosial təminat və sosial müdafiə xərclərinin 4.5 milyard manatdan çox olması planlaşdırılıb. 2024-cü ilin büdcəsinin sosialyönümlü olması vətəndaşlarımızın rifahının daha da yaxşılaşdırılmasına hesablanıb. Yeni büdcə layihəsində sosial müdafiə və sosial təminat xərcləri cari illə müqayisədə 5,2 faiz artırılıb.

Deputatın sözlərinə görə, büdcə layihəsində işğaldan azad edilmiş ərazilərimizdə bərpa və yenidənqurma işlərinin sürətləndirilməsi, eləcə də müdafiə və təhlükəsizliyimizin daha da gücləndirilməsi prioritet təşkil edir. Ona görə də büdcədə müdafiə və təhlükəsizliyimizin gücləndirilməsi ilə bağlı 6.5 milyard manata yaxın, Qarabağ və Şərqi Zəngəzurun bərpasına isə 4 milyard manat vəsaitin ayrılması nəzərdə tutulur. Onu da qeyd edək ki, müdafiə və milli təhlükəsizlik xərcləri 2023-cü ildəkindən 5,5 faiz daha çox nəzərdə tutulub. Bu o deməkdir ki, büdcə xərclərinin təxminən üçdəbir hissəsi məhz bu iki istiqamət üzrə ayrılacaq.

Rüfət Quliyev deyib ki, 2024-cü ilin dövlət büdcəsində fərqli istiqamətlər nəzərə alınıb. "Misal üçün, ərzaq təhlükəsizliyi, kənd təsərrüfatı məhsullarının idxal-ixrac məsələsi, su ehtiyatlarından səmərəli istifadə və digər sahələr üzərində ciddi hesablama aparılıb. Bütün bunları nəzərə aldıqda aydın olur ki, növbəti il də fiziki gəlirlərimizdə dayanıqlılığın qorunub saxlanılması, sosial təminatımızın gücləndirilməsi və müdafiə işinin daha da təkmilləşdirilməsi baxımından uğurlu olacaq. Eyni zamanda ayrılan vəsaitin artırılması nəticəsində Qarabağ və Şərqi Zəngəzurda işlərin intensivləşməsi ilə soydaşlarımızın doğma el-obalarına qayıdışı sürətlənəcək", - deyə deputat bildirib.

N.QAFARZADƏ,

Azərbaycan.-2023.- 7 noyabr, № 244- S.5.