Azərbaycan bölgəyə yeni nəfəs gətirib

"Azərbaycan 44 günlük Vətən müharibəsində qələbəsi və bu ilin sentyabrında bir-günlük lokal antiterror tədbirləri ilə öz suverenliyini, Konstitusiya hüququnu ölkə ərazisində tam bərpa etdi. Bu, dost ölkələri, xalqları sevindirsə də, bəzi dövlətlərin və qüvvələrin yuxusunu ərşə çəkib. Onların başında isə Fransa durur".

Bu sözləri "Azərbaycan" qəzetinə açıqlamasında Milli Məclisin deputatı Vüqar İsgəndərov deyib. O bildirib ki, özünü Avropada "demokratiyanın beşiyi", beşinci respublika sayan Fransa insan hüquqlarından, fikir plüralizmindən və digər fundamental insan haqlarından danışsa da, əməllərində bunun tam əksi görünür. Afrikada və digər ərazilərdə neokolonialist siyasət yürütmək, soyqırımları törətmək, digər kiçik xalqların hüquqlarını pozmaq, onların maddi nemətlərini sümürmək, islamofob, türkofob siyasət həyata keçirmək, dini və irqi dözümlülük göstərməmək bugünkü Fransa reallıqlarıdır.

V.İsgəndərov qeyd edib ki, Fransa artıq Afrikadan mərhələli şəkildə çıxmağa başlayıb: "Bu ölkə Avropada öz nüfuzunu Makron siyasətinə görə hər gün itirməkdədir. İndi də Fransa özünə 1000 kilometrlərlə uzaqda olan Cənubi Qafqaza hər vəchlə soxulmağa çalışır. Təbii ki, qarşısında güclü, müstəqil siyasət yürüdən Azərbaycanı gördükcə militarist siyasətini bir az da tündləşdirməyə başlayıb. Qeyd etmək lazımdır ki, Ermənistanın ağa axtarmaq siyasəti qədimdən belədir və bu yarımdövlət həmişə digər böyük ölkələrə sığınaraq "siyasət" həyata keçirib, sonda da həmin ağasına xəyanət edib. Bu gün Rusiya ilə siyasətdə Ermənistanın bu hərəkətlərini aydın görürük".

Deputat vurğulayıb ki, Fransa müharibənin artıq bitdiyini, qarşıdurmaya son qoyulduğunu anlamalıdır. Azərbaycanın uğurlu siyasəti ilə bölgəyə yeni nəfəs, bərpa-quruculuq işləri, stabillik gəlib və bunun qarşısını heç bir qüvvə ala bilməz. Azərbaycan-Ermənistan arasında sülh gündəliyinin təqdim olunması mərhələsidir. İki ölkə arasında dövlət başçıları, xarici işlər nazirləri, baş nazir müavinləri səviyyəsində komissiyalarda iş gedir, danışıqlar aparılır. Lakin Fransa və digər qüvvələrin buna soxulmaq cəhdləri sülh sazişinin imzalanmasına əngəl yaradır.

Vüqar İsgəndərov düşünür ki, Fransanın Ermənistanı silahlandırmaqla bölgədə gərginliyi saxlamaq cəhdləri iflasa uğrayacaq. "Çünki qarşısında güclü Azərbaycan, qardaş Türkiyə var. Bu ölkələrin milli maraqları var və regionda yalnız bölgə ölkələrinin və dövlətlərinin ortaq maraqları işləyə bilər. Bunun üçün də müvafiq işlər görülməkdədir. Fransa və digər belə qüvvələr bu bölgəyə soxulmağa cəhd etməklə yalnız uğursuzluğa düçar olacaqlar", - deyə V.İsgəndərov əlavə edib.

Ə.QARDAŞXANOVA,

Azərbaycan.-2023.- 7 noyabr, № 244- S.5.