Azərbaycan türk dünyasının birləşdirici mərkəzidir

Noyabrın 3-də Astanada Türk Dövlətləri Təşkilatının (TDT) 10-cu Zirvə toplantısı keçirilib. Türk dünyası tarixinin əlamətdar hadisələrindən hesab edilən bu toplantıda bir sıra məsələlər ətrafında müzakirələr aparılıb, gələcək prioritetlər müəyyənləşdirilib. Bu sammit türk dövlətlərinin yeni mərhələyə qədəm qoyduqlarını və beynəlxalq siyasətdə ortaq mövqe sərgilədiklərini sübut edir.

Mövzu ilə bağlı qəzetimizə danışan Milli Məclisin deputatı Musa Qasımlı bu təşkilatın yaradılma tarixindən söz açıb. Qeyd edib ki, ideyası Prezident İlham Əliyevə məxsus olan Türk Dövlətləri Təşkilatının tarixi Naxçıvan toplantısından başlayır.

Astanada keçirilən yubiley Zirvə görüşünün böyük tarixi əhəmiyyətinə və bu toplantının "Türk Əsri" adı altında keçirilməsinə diqqət çəkən Musa Qasımlı qeyd edib ki, dövlət başçılarının əməkdaşlıq məsələlərini müzakirə etmələri, liderlərin çıxışları mövcud vəziyyəti və perspektivləri əhatə edir. Zirvə toplantısı nəticəsində bir daha aydın oldu ki, qədimdən türk xalqlarının yurdu olan və dünyanın ürəyi hesab edilən Avrasiyaya bu gün də məhz türk xalqları hakimdirlər. Həmçinin bu təşkilata üzv ölkələrin əməkdaşlığı üçüncü dövlətə və dövlətlər qrupuna qarşı yönəlməyib.

Deputatın sözlərinə görə, Prezident İlham Əliyevin toplantıdakı nitqi Avrasiya məkanında, bütövlükdə dünyada dövlətimizin tutduğu önəmli yeri, oynadığı rolu göstərdi. Azərbaycanın birləşdirici bir körpü olduğu yenə öz təsdiqini tapdı. "Dövlət başçısı çıxışı zamanı Azərbaycanın tranzit imkanlarını bir daha önə çəkdi. Eyni zamanda 30 ilə yaxın işğal dövründə Ermənistanın vəhşi siyasətinin mahiyyətini, bəzi dövlətlərin və beynəlxalq təşkilatların ikili standartlara dayanan siyasətini ifşa etdi. Torpaqlarımızın işğaldan azad edilməsindən keçən üç ildə Azərbaycan dövlətinin böyük işlər gördüyünü bildirdi. Ən gözəl xəbərlərdən biri isə 2026-cı ilə qədər 140 min nəfər soydaşımızın işğaldan azad edilmiş ərazilərimizə dönəcəyinin, dədə-baba torpaqlarında məskunlaşacaqlarının müjdəsi oldu", - deyə deputat bildirib.

TDT-nin 10-cu Zirvə toplantısının əvvəlki toplantılardan tamam fərqli mühitdə keçirildiyini vurğulayan Musa Qasımlı deyib: "Azərbaycan 2023-cü il aprelin 23-də 1991-ci ildən bəri ilk dəfə olaraq dövlət sərhədləri üzərində nəzarətini bərpa etdi. Bu, müstəqillik tariximizdə cənab Prezidentimizin yaratdığı bir ilk idi. Eyni zamanda bu il oktyabrın 15-də cənab Prezident İlham Əliyevin Xankəndidə bayraq qaldırması və millətimizə müraciət etməsi tarixi əhəmiyyətli hadisə idi. Çünki 1988-ci ildən etibarən ilk dəfə idi ki, suverenliyimiz bütün ərazilərimizdə bərqərar edilirdi. Bu da Prezident İlham Əliyevin müəllifliyi ilə tariximizdəki ən böyük ilklərdən biridir".

Musa Qasımlı hesab edir ki, Azərbaycanın ərazi bütövlüyünün bərpa edilməsi, sərhədlərimiz üzərində nəzarətin qurulması və suverenliyimizin tam bərqərar olması TDT-nin və türk xalqlarının tarixində yeni mərhələ açır. Ona görə də Astanada keçirilən toplantı xüsusilə perspektivlər baxımından əhəmiyyətli hadisədir.

Nəzrin QAFARZADƏ,

Azərbaycan.-2023.- 7 noyabr, № 244- S.5.