44 günlük Vətən
müharibəsindəki tarixi
qələbəmizdən 3 il ötür. Olduqca qürurvericidir ki, biz Zəfər
Gününü bu dəfə bir qədər fərqli və daha böyük
coşqu ilə qarşılayırıq. Çünki
artıq Qarabağda erməni separatizminə də son qoyulub,
Azərbaycan dövləti
bütün əraziləri
üzərində özünün
suverenliyini təmin edib. Artıq Xankəndi şəhərində
və Qarabağın
hər yerində Azərbaycan bayrağı
dalğalanır.
Bütün dünya
Qarabağı Azərbaycan
torpağı kimi tanısa da, artıq keçmişdə
qalmış Qarabağ
probleminin həllində
vasitəçilər hər
zaman ikili standartlardan çıxış
etdilər, işğalçını
öz adı ilə çağırmaqdan,
BMT-nin qətnamələrinin
icrasını Ermənistandan
tələb etməkdən
uzaq oldular.
Torpaqlarımızın azad edilməsindən sonra təsdiqini tapan əsas həqiqətlərdən biri
də budur ki, ATƏT-in artıq fəaliyyətini
dayandırmış Minsk
qrupunun həmsədri kimi
Fransanın əsl niyyəti Azərbaycan torpaqlarında ikinci erməni dövlətinin yaradılması olub. Fransa başda olmaqla dünya erməniliyi düşünürdü
ki, Azərbaycan xalqı zamanla reallıqları qəbul edəcək.
Lakin yanılırdılar,
çünki Azərbaycan
xalqı torpaqlarının
işğal altında
qalması faktı ilə barışa bilməzdi. Eyni zamanda hər bir azərbaycanlı əmin idi və
inanırdı ki, ərazilərimiz mütləq
işğaldan azad ediləcək. Bu əminliyi təmin edən, inamı gücləndirən isə
Ulu Öndər Heydər Əliyevlə başlanan, Prezident İlham Əliyevlə davam edən siyasət idi. Cənab İlham Əliyev hələ 20 il əvvəl, ilk dəfə Azərbaycan Prezidenti seçildiyi 2003-cü ildə
keçirilən andiçmə
mərasimində bununla
bağlı mövqeyini
belə ifadə etmişdi: "Azərbaycan
heç vaxt bu vəziyyətlə, torpaqlarının işğal
altında qalması ilə barışmayacaqdır.
Hamı bilməlidir ki, sülh tərəfdarı
olmağımıza baxmayaraq,
müharibənin yenidən
başlanmamasını və
bu məsələnin
sülh yolu ilə həllini istəməyimizə baxmayaraq,
bizim səbrimiz də tükənməz deyildir. Azərbaycan öz doğma torpaqlarını nəyin
bahasına olursa-olsun,
azad edəcəkdir".
Ulu Öndər
Heydər Əliyevin siyasi kursunu layiqincə davam etdirən Prezident İlham Əliyevin Azərbaycanı dinamik inkişaf yoluna çıxarması həm
də torpaqlarımızın
azad edilməsi üçün tarixi şəraitin formalaşmasına
imkanlar yaratdı. Bu inkişafdan irəli gələrək
ordumuz tamamilə yenidən quruldu, döyüş imkanları
ən yüksək səviyyəyə çatdırıldı,
hərbi arsenalımız
ən müasir silah və texnika
ilə zənginləşdirildi.
Eyni zamanda Prezident İlham Əliyev diplomatik cəbhədə uğurlu
fəaliyyət nümunəsi
ortaya qoydu, bütün siyasi platformalarda Ermənistanın
işğalçılıq siyasətini, saxta erməni iddialarını
darmadağın etdi.
Ermənistanda 2018-ci ildə hakimiyyət dəyişikliyindən sonra
baş verənlər
tədricən sülh
danışıqlarının mənasız olduğunu göstərməyə başlamışdı.
Bu ölkənin baş naziri N.Paşinyanın "Qarabağ
Ermənistandır" deməsi,
Şuşada separatçı
rejimin andiçmə
mərasiminin keçirilməsi,
işğal olunmuş
torpaqlarımızda Suriya
və Livandan köçürülmüş ermənilərin yerləşdirilməsi,
erməni silahlı qüvvələrinin Tovuzda
hərbi təxribat törətmələri göstərirdi
ki, Ermənistan danışıqlar pərdəsi
altında imitasiya ilə məşğuldur.
2020-ci il sentyabrın
27-də Ermənistanın cəbhə
xəttində törətdiyi
növbəti hərbi
təxribat isə artıq müharibəni qaçılmaz etdi. Həmin gün öz tarixi missiyasına başlayan Azərbaycan Silahlı Qüvvələri həyata
keçirdiyi "dəmir
yumruq" əməliyyatı
ilə bir-birinin ardınca şəhər
və kəndlərimizi
işğaldan azad etdi. Prezident İlham Əliyevin Ali Baş Komandanlığı
ilə qəhrəman
ordumuz cəmi 44
günə 30 illik işğala son qoydu. 2020-ci il noyabrın 10-da imzalanan üçtərəfli Bəyanat
Ermənistanın məğlubiyyətinin
siyasi-hüquqi təsdiqi
oldu. Şuşa şəhərinin işğaldan
azad edildiyi tarix isə Zəfər Günü elan olundu.
44 günlük Vətən
müharibəsində mərd
oğullarımız torpaqlarımızın
azadlığı uğrunda
qəhrəmancasına döyüşdülər,
O cümlədən Əlahiddə
Ümumqoşun Ordunun
bölmələri böyük
fədakarlıqlar göstərdilər,
qəhrəmanlıqları ilə dastanlar yazdılar. Əlbəttə,
müharibə qansız
ötüşmür, "Torpaq əgər uğrunda ölən varsa vətəndir". Azərbaycan əsgəri bu savaşda ölümün gözünə
dik baxdı, torpaqlarımızın azadlığı
uğrunda müqəddəs
şəhidlik mərtəbəsinə
yüksəldi. Biz Zəfər Günündə
bir daha şəhidlərimizi yad edir, onların əziz xatirəsi qarşısında baş
əyirik.
Əvvəldə qeyd
etdiyim kimi, hələ işğal dövründə dünya
erməniliyi xalqımızın
reallıqları qəbul
edəcəyini düşünürdü.
Lakin Vətən savaşında döyüşən
oğullarımızın böyük
əksəriyyətinin gənclər
olması bir daha göstərdi ki, nəsillər
dəyişsə belə
xalqımız işğal
faktı ilə razılaşa bilməz. Vətən müharibəsində
döyüşən gənclərimiz
Qarabağı görməmişdilər.
Lakin onlar mütərəqqi gənclər
siyasətinin nəticəsi
kimi vətənpərvər
və layiqli vətəndaş kimi yetişmişdilər. Bu mənada Azərbaycan gəncləri 44 günlük
savaşda vətəni
necə sevməyin ən gözəl nümunəsini ortaya qoydular. Onların vətənpərvərlikləri həm də təməli Ulu Öndər Heydər Əliyev tərəfindən
qoyulan, Prezident İlham Əliyev tərəfindən uğurla
davam etdirilən gənclər siyasətinin
parlaq təcəssümünə
çevrildi.
Ümumiyyətlə, Vətən müharibəsinin
başa çatmasından
ötən 3 il istər hərbi, istər diplomatik müstəvidə Azərbaycanın
uğurları ilə
əlamətdardır. Bu
dövrun ən böyük hərbi-siyasi
hadisəsi isə Qarabağda milli suverenliyimizin tam bərpa edilməsi oldu. Sözdən anlamayan, Azərbaycan qanunlarına tabe olmaq istəməyən ermənilərin bu dəfə də başlarına dəyən
"dəmir yumruq"dan
sonra Azərbaycanın
şərtlərinə əməl
etməkdən başqa
yolları qalmadı. Bu hadisə ilə Prezident İlham Əliyev cəmi 23 saat ərzində erməni separatizmini darmadağın
etdi, onu tarixdən sildi, erməni təəssübkeşlərinin
çirkin planlarını
iflasa uğratdı.
İndi dönüb
tarixə ekskurs edəndə, ötən
20 ildə getdiyimiz inkişaf yoluna nəzər salanda bir daha görürük
ki, Prezident İlham Əliyev bu illər ərzində
Azərbaycanın iqtisadi
yüksəlişini təmin
etməklə, respublikamızın
beynəlxalq mövqelərini
gücləndirməklə, onu regionda və
dünyada söz sahibi etməklə, o cümlədən qlobal müstəvidə hücum
diplomatiyası yürüdərək
erməni saxtakarlıqlarını
ifşa etməklə
həm də torpaqlarımızın işğaldan
azad edilməsi və Qarabağda erməni separatizminə son qoyulması üçün etibarlı
təməllər formalaşdırıb.
Bu mənada cənab İlham Əliyevin "Nəyi necə, nə vaxt etmək lazımdır, bunu mən bilirəm" sözləri də məhz bu reallıqlara
əsaslanaraq, dövlətimizin
başçısının milli maraqlarımızın
təmin edilməsi istiqamətində həyata
keçirdiyi təmkinli,
düşünülmüş və praqmatik siyasətinin ifadəsidir.
Artıq Azərbaycanın
ərazi bütövlüyü
və suverenliyi tam təmin olunub. Qarabağ və Şərqi Zəngəzurda aparılan
bərpa və quruculuq işləri isə qalibiyyətimizi bütün dünyaya bəyan edir. Bu uğurlarımızın
memarı olan Prezident İlham Əliyevin əzmkar siyasəti ilə xalqımız həm də Böyük qayıdışın təntənəsini
və sevincini yaşayır. Zəfər
Günümüz mübarək
olsun!
Cəbi QULİYEV,
Milli Məclisin
deputatı
Azərbaycan.-2023.-
8 noyabr, № 245. - S.13.