Şeyxülislam Allahşükür Paşazadə dünya dini liderlərinin qlobal sammitində iştirak edib

Noyabrın 6-da Qafqaz Müsəlmanları İdarəsinin (QMİ) sədri şeyxülislam Allahşükür Paşazadə Birləşmiş Ərəb Əmirliklərinin paytaxtı Əbu-Dabi şəhərində BMT Ətraf Mühitin Mühafizəsi üzrə “COP 28” çərçivəsində dünya dini liderlərinin qlobal sammitində iştirak edib.

QMİ-nin mətbuat xidmətindən AZƏRTAC-a bildirilib ki, BƏƏ-nin Prezidenti Şeyx Məhəmməd Bin Zayed Al Nəhyanın himayəsi altında təşkil olunan tədbir “Birləşmiş dini liderlər planetin dirçəlişi naminə” şüarı altında keçirilib.

Açılış mərasimində beynəlxalq siyasi və ictimai dairələrin nümayəndələri, ənənəvi və dünya dinlərinin liderləri, o cümlədən BƏƏ-nin tolerantlıq və birgəyaşayış naziri Şeyx Nəhyan Bin Mübarək Al Nəhyan, Müqəddəs Taxt-Tacın dövlət katibi kardinal Pyetro Parolin, Əl-Əzhərin baş imamının müavini Məhəmməd Əl-Duveyni, Ekumenik Patriarx Varfolomey, Qazaxıstan Parlamenti Senatının sədri Maulen Aşimbayev, ICESCO-nun baş direktoru Səlim əl-Malik, Dünya Kilsələr Şurasının Baş katibi Cerri Pillay, Süryani Kilsəsinin Patriarxı II İqnatius Afrem, Bəhreynin xarici işlər nazirinin müavini, Kral Həməd adına Birgəyaşayış Mərkəzinin direktoru Şeyx Abdullah Əl-Xəlifə, həmçinin digər görkəmli siyasi, ictimai və din xadimləri iştirak ediblər.

Mərasimdə çıxış edənlər Birləşmiş Ərəb Əmirliklərinin dinlərarası dialoqun inkişafında xüsusi rolunu vurğulayıblar. Diqqətə çatdırılıb ki, bunun bünövrəsi 2019-cu ildə Papa Fransisk ilə Şeyx Əl-Əzhərin Şeyxi Dr.Əhməd Əl-Tayyibin imzaladıqları “İnsan qardaşlığı haqqında” sənədi ilə qoyulub.

Qafqaz Müsəlmanları İdarəsinin sədri şeyxülislam A.Paşazadə açılış iclasındakı çıxışında tədbir iştirakçılarına Prezident İlham Əliyevin salamlarını çatdırıb. O, ətraf mühitin qorunması üzrə BMT sammiti ərəfəsində Əbu-Dabidə keçirilən Dünya dini liderləri forumunun xüsusi əhəmiyyətini vurğulayaraq deyib: “COP 28” qlobal iqlim dəyişikliyi problemlərinin həllində dövlət və din nümayəndələrinin birgə əməkdaşlığının praktiki təzahür etdiyi səmərəli beynəlxalq platforma olaraq daha artıq dəyər və fayda kəsb edəcək”.

Şeyxülislam A.Paşazadə, həmçinin bildirib ki, bu gün Azərbaycan dövləti tərəfindən işğaldan azad olunmuş Qarabağda şəhər və kəndlər bərpa olunur, dağıdılmış məscid və digər dinlərə məxsus məbədlər yenidən inşa edilir, insanlarımızın dədə-baba yurdlarına qayıdışı üçün infrastruktur yaradılır, ekoloji tarazlığın bərpası yönündə genişmiqyaslı layihələr gerçəkləşdirilir.

Forum çərçivəsində Şeyxülislam A.Paşazadə dünyanın tanınmış din və ictimai xadimləri ilə bir sıra görüşlər keçirib. Müqəddəs Taxt-Tacın dövlət katibi kardinal Parolin ilə görüşdə şeyxülislam Azərbaycan ilə Vatikan arasında əlaqələrin inkişafı məsələlərini müzakirə edib, QMİ tərəfindən Azərbaycanın ərazi bütövlüyü bərpa edildikdən sonra regionumuzda mövcud vəziyyət barədə Vatikan üçün hazırlanmış xüsusi arayış ona təqdim olunub.

QMİ-nin sədri Müsəlman Ağsaqqallar Şurasının baş katibi Məhəmməd Əbdüssalam ilə də görüşüb. Tədbirin əhəmiyyətindən danışan Əbdüssalam şeyxülislam Allahşükür Paşazadənin sammitdə iştirakını yüksək dəyərləndirib və onu dinlərarası harmoniyanın və dialoqun görkəmli təmsilçilərindən biri adlandırıb.

QMİ-nin sədri, həmçinin Qazaxıstan parlamenti Senatının sədri Aşimbayev, Ekümenik Patriarx Varfolomey, Ümumdünya Kilsələr Şurasının Baş katibi Cerry Pillay, Ümumdünya Süryani kilsəsinin Patriarxı II İqnatius Afrem, ICESCO-nun Baş direktoru Səlim əl-Malik və digər şəxsiyyətlərlə də görüşüb.

Dini liderlər iqlim dəyişikliyi ilə bağlı dünya ictimaiyyətini təcili tədbirlər görməyə çağırıblar. Dünya dinlərinin nümayəndələri gələn ay keçiriləcək “COP 28” iqlim sammitində siyasi liderləri iqlim dəyişikliyi böhranına təcili cavab vermək üçün konkret tədbirlər görməyə çağırıblar.

Müsəlman, Xristian, Yəhudi, Buddist, İnduist, Bəhai, Mindai-Sabei, Siqh, Hindu dinlərinin liderləri, eləcə də digər dini təriqətlərin nümayəndələri BMT “COP 28” Sammitinə ünvanlanan, Yer kürəsinin qorunması, təbiətlə harmoniyada yaşamağın vacibliyi, yeni təhlükələrin yer aldığı müasir dünyada iqlim dəyişikliyi ilə mübarizədə qətiyyətli addımlar atmağa çağıran müraciət imzalayıblar. Bu müraciət BMT “COP 28” dövlət başçılarının sammit iştirakçılarına təqdim olunacaq.

Noyabrın 7-də Dinlərarası Forum öz işini davam etdirib.

Azərbaycan.-2023.- 8 noyabr, № 245. - S.17.