Azərbaycanın qüdrətinin ifadəsi

"8 Noyabr - Zəfər Günündə Xankəndidə hərbi paradın keçirilməsi Azərbaycan dövlətçiliyinin tarixi səhifələrindən biridir. Separatizmin yuvası olmuş bir yerdə Azərbaycan əsgərinin qalibiyyətlə Ali Baş Komandan qarşısında, Azərbaycan bayrağı altında hərbi parad keçirməsi dövlətimizin qüdrətinin, müstəqilliyimizin təntənəsinin nümunəsidir".

Bu sözləri Milli Məclisin deputatı Aydın Mirzəzadə "Azərbaycan" qəzetinə dünən Xankəndi şəhərində keçirilmiş hərbi paradla bağlı fikirlərini bölüşərkən deyib. Bildirib ki, Müzəffər sərkərdə qalib ordusunun paradını işğaldan azad olunmuş torpaqların mərkəzində qəbul etdi: "Hər birimiz həmin görüntüləri böyük qürur hissi ilə izlədik. Hər birimiz tarixi anın fərqində olduq.

Zəfər Günündə şəhidlərimizi dərin ehtiramla xatırlayırıq. Onların əziz xatirəsi hər zaman qəlbimizdə yaşayacaq, torpaqlarımızın işğaldan azad edilməsi uğrunda göstərdikləri qəhrəmanlıqlar, fədakarlıqlar heç zaman unudulmayacaq".

Bu gün hər bir azərbaycanlının Ali Baş Komandanla, ordumuzla fəxr etdiyini deyən A.Mirzəzadə onu da bildirib ki, Heydər Əliyev yolunun davamı, İlham Əliyevin müdrik rəhbərliyi hər zaman xalqımıza uğurlar bəxş edəcək.

Deputat vurğulayıb ki, vaxtilə işğalçılar Xankəndini separatçılığın ünvanına çevirmişdilər. "Xaricdəki müəyyən qüvvələr Azərbaycanın ərazi bütövlüyünü təmin edəcəyinə, Xankəndidə Azərbaycan bayrağının qaldırılacağına inanmırdılar. Lakin xalqımızın buna inamı həddən artıq böyük idi. Bu, Ulu Öndər Heydər Əliyevin maraqlarımıza xidmət edən siyasi kursu, onun layiqli davamçısı olan Prezident cənab İlham Əliyevin uğurlu siyasəti nəticəsində mümkün oldu. 44 gün ərzində torpaqlarımızı hərbi qüdrətimizlə azad etdik. Bu ilin sentyabrında isə cəmi 23 saat davam edən lokal xarakterli antiterror tədbirləri ilə Qarabağda separatizmin kökünü kəsdik. Beləliklə, Azərbaycan bütün ərazilərində özünün suveren hüquqlarını bərpa etdi və ərazi bütövlüyünü təmin etməyin uğurlu nümunəsini ortaya qoydu", - deyə A.Mirzəzadə əlavə edib.

A.Mirzəzadə torpaqlarımızın işğaldan azad edilməsindən sonrakı müddətdə Qarabağ və Şərqi Zəngəzurda möhtəşəm quruculuq işlərinin görüldüyünü, artıq yüzlərlə ailənin öz dədə-baba yurduna qayıtdığını vurğulayaraq deyib: "Azad edilmiş ərazilərdə yeni infrastrukturlar yaradılır, dünyanın diqqətini cəlb edən quruculuq işləri görülür. Artıq Qarabağ və Şərqi Zəngəzurda yenidən həyat başlayır və bütün bunlar onu göstərir ki, Böyük qayıdış proqramı sürətlə və uğurla icra olunur".

Ə.QARDAŞXANOVA,

Azərbaycan.-2022.- 9 noyabr, №246- S.8.