Xankəndinin adına layiq tarixi gün

8 Noyabr - Zəfər bayramı. Hər birimiz və hamımız üçün müqəddəs bir gün. Sevinc və fərəh dolu bu əziz günü xalqımıza Azərbaycan Ordusu 27 sentyabr 2020-ci ildə ermənilərin təxribatı nəticəsində başlayan və 44 gün davam edən Vətən müharibəsində düşmən üzərində qazandığı böyük uğurları, zəfərləri ilə bəxş etdi.

3 ildir ki, qəlbləri riqqətə gətirən bu əlamətdar gün ölkəmizin hər yerində, hər guşəsində böyük təntənə ilə qeyd olunur. İnsanların da, işğaldan azad olunmuş torpağın da üzü gülür, sevinc sevincə qarışır. İndi Zəfər bayramı həm də işğaldan azad olunmuş rayonlarımızda - Laçında, Şuşada, Zəngilanda, Füzulidə, Kəlbəcərdə və başqa bölgələrdə keçirilir. Zəfər sevincini ifadə edən insanlar üçrəngli bayrağımızı başlarının üzərinə qaldıraraq meydanlardan keçirlər. Bu qələbəni, bu zəfəri onlara yaşadan hərbçilərə alqış deyir, minnətdarlıq edirlər.

8 Noyabr 2023-cü il də tariximizə böyük hərflərlə yazılacaq. Çünki bu tarixdə düşmən üzərində qazanılmış qələbədən 3 il sonra həmin gün - Zəfər Günü münasibətilə Xankəndi şəhərinin mərkəzində hərbi parad keçirildi. Xalqımız qürur dolu bir gün yaşadı. Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev, birinci xanım Mehriban Əliyeva və oğulları Heydər Əliyev hərbi paradda iştirak edirdilər.

Xatırladaq ki, Xankəndidə hərbi parad 104 il əvvəl - 1919-cu ilin iyul ayında keçirilmişdi. Deyirlər ki, tarix təkrar olunur. 104 ildən sonra Müzəffər Ali Baş Komandan İlham Əliyevin rəhbərliyi altında Azərbaycan Ordusu uzun illər torpaqlarımızı işğalda saxlayan düşməni məhv etdi. Oktyabrın 15-də Azərbaycan Prezidenti Xankəndidə üçrəngli bayrağımızı dalğalandırdı. Zəfər Günü - 8 Noyabrda Qarabağımızın böyük şəhərində hərbi parad keçirildi. Azərbaycan bayrağı ölkəmizin ayrılmaz hissəsi olan Qarabağda yenidən böyük əzəmətlə dalğalandı. Qarabağ torpağı doğma sakinlərini böyük sevinclə qoynuna aldı.

30 ilə yaxın idi ki, xalqımız bu günü, bu anı həsrətlə gözləyirdi. Gözləyirdi ki, Qarabağın işğalına son qoyulsun, torpaqlarımız erməni qəsbindən azad olunsun. Şükürlər ki, artıq üç ildir ki, həsrətə son qoyulub. Azərbaycan Ordusu Müzəffər Ali Baş Komandan İlham Əliyevin rəhbərliyi altında 2020-ci ildə erməni işğalçıları üzərində böyük qələbə qazandı. Uzun illərdən sonra Azərbaycan xalqı tarixi torpaqlarına qayıtdı. Noyabrın 8-də Qarabağın mərkəzində, Xankəndi şəhərində Vətən müharibəsində qələbəmizin 3-cü ilönümü münasibətilə hərbi paradın keçirilməsi hər birimizdə qürur doğurdu. İllərdən bəri gözlədiyimiz, həsrətində olduğumuz tarixi günün sevincini yaşadıq.

Hərbi paradı fərəh dolu baxışlarla izlədik. Azərbaycan Ordusunun və başqa güc strukturlarının şəxsi heyəti Xankəndinin baş meydanında düzülmüşdü. Gözəl, yaddaqalan bir mənzərəyə şahidlik edirdik. Meydandakı sırada dayanan hərbçilər bir müddət əvvəl Qarabağın erməni işğalçılardan azad olunması uğrunda vuruşmuşdular. Yurdumuzun azadlığı üçün bütün çətinliklərə sinə gərmişdilər. Döyüşlərdə böyük qəhrəmanlıq və hünər göstərərək düşməni məhv etmiş, yağıları torpaqlarımızdan qovmuşdular. Bu gün isə alınaçıq, başıuca uğrunda vuruşduqları Qarabağda hərbi paradda iştirak edirdilər.

Sırada dayanmış hərbi qulluqçular orkestrin ifa etdiyi qəlbləri riqqətə gətirən marşların sədaları altında nizami addımlarla Müzəffər Ali Baş Komandan İlham Əliyevin qarşısından keçirlər. Təntənəli addımlarla gedən hərbçilər əllərində həmişə öpüb gözlərinin üstünə qoyduqları üçrəngli bayrağımızı da aparırlar. Həm hərbi paradı qəbul edən Müzəffər Ali Baş Komandan İlham Əliyev çox qürurlu görünür, həm hərbçilərin əllərindəki bayraq, həm də əsgərlər. Bu, belə də olmalıdır, çünki bu gün Zəfər Günüdür, Qələbə Günüdür.

Çoxdan bəri gözlədiyimiz qürurverici səhnələrə kövrək hisslərlə baxdıq. Qanlı döyüşlərdən qalib çıxmış müzəffər ordumuzun tarixi torpaqlarımızda hərbi paradını izləmək çox sevindirici idi. Biz bu günü, bu anı illərdən bəri gözləyirdik. Artıq Azərbaycan Ordusunun zabit və əsgərləri cəsarət və hünərləri ilə xalqımızın arzularını, xəyallarını reallığa çeviriblər.

Azərbaycan xalqı 8 Noyabr - Zəfər Günündə tarixi anlar yaşadı. Qələbəmizin, zəfərimizin təsdiqi olan hərbi parad Azərbaycan xalqının yaddaşında əbədi yaşayacaq. Daim qürurla xatırlanacaq.

Vahid MƏHƏRRƏMOV

Azərbaycan.-2022.- 9 noyabr, №246- S.10.