Prezident, yoxsa fitnə-fəsad ustası?

Emmanuel Makron ölkələr arasında sülhə mane olur

Artıq heç kəsə sirr deyil ki, təcavüzkar və eyni zamanda daim məğlub vəziyyətdə olan Ermənistanı sürətlə silahlandıran rəsmi Paris Cənubi Qafqazda gərginliyi artırmaqla regionda sülhə mane olur.

Fransa prezidenti Emmanuel Makron müxtəlif vaxtlarda bütün fransız hökmdarları ilə müqayisə edilirdi. Onun nəinki ölkə iqtisadiyyatının və siyasətinin problemlərinin açarını tapacaq, həm də Fransanı tamamilə yeni səviyyəyə aparacaq "böhran menecerinə" çevriləcəyi güman olunurdu. Lakin Makrondan nə Şarl de Qoll, nə də ki, Napoleon alındı...

Bununla belə, o, hələ də Avropa evində "görkəmli" yer tutur və özünün müstəsnalığını hiss etdirmək üçün hər cür vasitələrdən istifadə edir.

Məsələn, "Minskaya Pravda" nəşri yazır ki, Emmanuel Makron böyüklərin sırasına qoşulmaq istəyir, amma son vaxtlar onun üçün hər şey əksinə, necə deyərlər, tərs gedir. O, nəinki Avropada, hətta Fransada belə asayişi bərpa edə bilmir. Bunun səbəbi isə çox sadədir, nisbətən gənc fransız siyasətçisinin böyük ambisiyaları var, lakin aktual problemləri həll etmək üçün real potensialı yoxdur. Hər hansı bir səlahiyyətli lider isə, şübhəsiz ki, bunu bacarmalıdır…

Təəccüblü deyil ki, Makronun bu günlərdə Yaxın Şərqə səfəri də, gözlənildiyi kimi, fiaskoya uğradı.

O, həmçinin Fransanın enerji təhlükəsizliyini yaxşılaşdırmaq istədi, amma bu da alınmadı. Bu baxımdan Makronun Qərb konyunkturası üçün heç də prestijli olmayan postsovet məkanında dolaşmaqdan başqa çarəsi yox idi.

Bu həftə o, ölkənin nüvə reaktorlarını təmin edən uran tədarükçüləri olan Qazaxıstan və Özbəkistana baş çəkmək üçün enerji ilə zəngin Mərkəzi Asiyaya səfər edib. Fransanın Aatom Elektrik Stansiyası reaktorlarının təxminən yarısı texniki xidmət üçün bağlanıb və yenilərinin tikintisi illər çəkəcək.

Artıq bütün dünyada belə danışılır ki, öz səfərləri çərçivəsində Makron Rusiyanın keçmiş sovet respublikalarına təsirini azaltmaq barədə təbliğat və təşviqat aparmaq niyyətindədir. Deyəsən, Emmanuel Makron avantüralar təklif etməkdən və intriqalar toxumaqdan başqa bir işə qadir deyil.

Cəmiyyəti parçalamaq, ayırmaq, qarışdırmaq, müxtəlif avantüralarla daim gərginlik yaratmaq, insanların ağıl və qəlblərini haqq və həqiqətdən uzaqlaşdırmaq, fəsad törətmək mənalarını verən fitnə isə ən böyük günahlardan sayılır. Və 5 il öncə yenidən katolik olan Fransa lideri nəhayət, anlamalıdır ki, fitnə-fəsad törədənlərin son mənzili cəhənnəmdir.

Rizvan CƏFƏROV,

Azərbaycan.-2023.- 16 noyabr, № 249. - S.12.