Şuşanın daha bir önəmli tədbirə evsahibliyi

İƏT-in mühüm toplantısının mədəniyyət paytaxtımızda keçirilməsinin simvolik əhəmiyyəti var

Oktyabrın 10-da Azərbaycanın İqtisadi Əməkdaşlıq Təşkilatına (İƏT) sədrliyi çərçivəsində Şuşada Xarici İşlər Nazirləri Şurasının 27-ci iclası keçirilib.

İşğaldan azad olunduqdan dərhal sonra beynəlxalq tədbirlərə evsahibliyi etməyə başlayan Şuşa bu fəaliyyətini uğurla davam etdirir. Bu gün dünyanı narahat edən qlobal məsələlərin Şuşada müzakirə olunması Azərbaycanın artan nüfuzundan xəbər verir. Xarici İşlər Nazirləri Şurasının Şuşada keçirilən görüşü ciddi beynəlxalq və regional əhəmiyyət kəsb edir.

Milli Məclisin deputatı Azər Badamov qəzetimizə açıqlamasında bildirib ki, 2020-ci il noyabrın 10-da Ermənistanın kapitulyasiya sənədini imzalamasından sonra işğaldan azad edilən ərazilərimiz, o cümlədən Şuşa yeni inkişaf dövrünü yaşayır. Mədəniyyətimizin beşiyi Şuşada və işğaldan azad olunmuş digər ərazilərdə qısa zamanda yenidənqurma və bərpa işləri geniş vüsət alıb, bu yerlərə yeni nəfəs gəlib. Artıq bu ərazilərdə "boz zona"lar aradan qaldırılıb, təhlükəsizlik təmin olunub. Qarabağda yaşayış məntəqələri bərpa edilir, yeni yollar çəkilir, hava limanları istifadəyə verilir. 2022-2026-cı illərdə həyata keçirilməsi nəzərdə tutulan Böyük qayıdışa dair dövlət proqramı uğurla icra olunur. Keçmiş məcburi köçkünlər müasir şərait yaradılmış doğma yurdlarına qayıtmağa başlayırlar.

Deputat bildirib ki, qürur doğuran faktdır ki, işğaldan azad olunmuş şəhərlər həm də beynəlxalq tədbirlərə evsahibliyi edir. Şuşa bu mənada xüsusilə fərqlənir və mütəmadi olaraq beynəlxalq əhəmiyyətli tədbirlərin keçirildiyi və qlobal əhəmiyyətli qərarların qəbul edildiyi ünvana çevrilib. Şuşa şəhəri həm də türk və islam dünyasının mədəniyyət simvoludur. Belə ki, 2022-ci il Azərbaycanda "Şuşa ili" kimi qeyd olunub. Beynəlxalq Türk Mədəniyyəti Təşkilatı isə bu şəhəri 2023-cü ildə türk dünyasının mədəniyyət paytaxtı elan edib. Daha sonra Doha şəhərində keçirilən İslam dünyası Mədəniyyət Nazirlərinin 12-ci konfransında Şuşanı 2024-cü ildə islam dünyasının mədəniyyət paytaxtı elan edilməsi ilə bağlı qərar qəbul olunub. Həm də oktyabrın 4-5-də İranın Ərdəbil şəhərində Azərbaycanın sədrliyi ilə keçirilən İƏT-na üzv dövlətlərinin yüksəksəviyyəli turizm ekspertlərinin 7-ci görüşü və turizm nazirlərinin 5-ci iclasında Şuşa şəhəri İƏT-nin 2026-cı il üçün turizm paytaxı seçilib. Göründüyü kimi, Şuşa beynəlxalq əhəmiyyət kəsb edən şəhərə çevrilib. İƏT-nin Nazirlər Şurasının 27-ci iclasının məhz Şuşada keçirilməsi də bu şəhərin dünyanın diqqət mərkəzində olmasından xəbər verir.

Azər Badamov bildirib ki, Azərbaycan 1992-ci ildən etibarən İqtisadi Əməkdaşlıq Təşkilatının üzvü və fəal iştirakçısıdır. Şuşada keçirilən görüşün mövzusunun "Yaşıl keçid və qarşılıqlı bağlantılar" olması da hazırkı dövrdə xüsusi aktuallıq kəsb edir. Çünki Azərbaycan dövləti işğaldan azad edilmiş əraziləri "yaşıl zona" elan edib, bərpaolunan enerji sahəsinin bu ərazilərdə inkişaf etdirilməsi prioritet seçilib.

"Bu gün dünyanı narahat edən ən vacib məsələlərdən birinin də iqlim dəyişikliklərini sürətləndirən atmosferin dekorbonlaşdırması proseslərinin genişləndirilməsi ilə bağlıdır. Ölkəmiz bu istiqamətdə də artıq fəaliyyətə başlayıb. Şuşa şəhərində məhz bu mövzu üzrə müzakirələrin aparılması İƏT-ə üzv olan dövlətlərin xarici işlər idarələrinin rəhbərləri üçün də çox maraqlı olub. İclasda regional və qlobal əhəmiyyət daşıyan digər məsələlər ətrafında da müzakirələr aparılıb. Ümumiyyətlə, Şuşada keçirilən bu görüş böyük beynəlxalq əhəmiyyət daşıyır", - deyə deputat vurğulayıb.

Nəzrin QAFARZADƏ,

Azərbaycan.-2023.- 12 oktyabr, №-222.- S.9.