Növbədə insan qatilləri Köçəryan və Sarkisyandır...

Xalqımıza qarşı cinayətdə əli olan hər kəs layiq olduğu cəzanı alacaq

Üç il əvvəl, bu günlər Azərbaycan əsgəri qanı ilə xalqımızın yeni şərəf salnaməsini yazırdı. Hər gün sabahımızı 30 il düşmən işğalı altında qalan torpaqlarımızın azad olunması xəbərləri ilə açırdıq...

Ordumuzun irəliləməsi nəticəsində zəifləyən, küncə sıxışdırılan məkrli düşmənin fitnə-fəsadı daha da artırdı. Əhali arasında çaşqınlıq yaratmaq üçün cəbhə xəttindən yüz kilometrlərlə uzaq şəhərlərimizi hədəf alan ermənilər müharibə və beynəlxalq qanunlara zidd olaraq dinc əhalinin yaşadığı binaları raket atəşinə tuturdular. Oktyabrın 11-də gecə saatlarında Gəncə şəhərinə dördüncü dəfə raket zərbəsi endirildi. Raket hücumu zamanı şəhərin 10 günahsız sakini şəhid oldu, 40-dan çox insan yaralandı. Bundan bir neçə gün əvvəl 4 oktyabrda Gəncəyə raket zərbəsi endirilən zaman Qarabağ separatçılarının lideri Araik Harutyunyan özünün "X" hesabında Gəncəyə onun əmri ilə raket zərbəsi endirildiyi barədə fərxlə yazırdı: "Sizin çoxunuz hər iki fotonu və mənim bəyanatımı xatırlayırsınız. Bildirirəm ki, biz zarafat etmirdik. Bu gün əmr verdim ki, Gəncədə hərbi obyektlər neytrallaşdırılsın". Xatırladaq ki, raket zərbəsi endirilən ərazi hərbi obyektlərdən uzaq mülki əhalinin sıx yaşadığı bir yer idi... Artıq düşmən növbəti fitnəkarlığını etmişdi...

Xalqımızın böyük öğlu Ümummilli Lider Heydər Əliyevin dediyi kimi, dövlət iki şeydən sarsıla bilər: "Cinayətkar cəzasız qalanda və günahsıza cəza veriləndə..." Ata vəsiyyətini şərəflə və qətiyyətlə yerinə yetirən Müzəffər Ali Baş Komandan işğal altında olan bütün torpaqları ordusu ilə azad etdiyi kimi, əli xalqımızın qanına bulaşmış cinayətkarların cəzadan kənar qalmamaları, ədalət məhkəməsi qarşısına çıxarılmaları üçün qətiyyət və prinsipiallıq nümunəsi göstərir. Artıq regionda separatizmi təbliğ və təşviq edən, qanunsuz silahlı dəstələr yaradaraq onlara rəhbərlik edib kütləvi qətliamlar törədən, özünü separatçı rejimin "xarici işlər naziri", "prezidentinin dövlət müşaviri" adlandıran David Babayan, Ermənistan silahlı qüvvələrinin hərbi qulluqçusu, qondarma "Dağlıq Qarabağın Müdafiə Ordusu Komandanının birinci müavini" olan Davit Manukyan, Ermənistan silahlı qüvvələrinin hərbi qulluqçusu, general-leytenant "Dağlıq Qarabağın müdafiə naziri" postunu tutan Lyova Mnatsakanyan, özünü "Dağlıq Qarabağın dövlət naziri" adlandırıb terrorçuları maliyyələşdirən, qanunsuz silahlı dəstə yaradıb separatizmi təbliğ edən Ruben Vardanyan, özünü qondarma separatçı rejimin "prezidenti" adlandıran Araik Harutyunyan və Meşəlidə, Xocalıda qətliamlar törədən Vaqif Xaçaturyan həbs edilərək Bakıya gətirilib. İndi onlar əməllərinə görə cavab verəcəklər.

Ermənistan indi də Azərbaycana qarşı təcavüzdə, terror əməllərində, əsirlikdə olan hərbi qulluqçulara və mülki şəxslərə qarşı insanlıq əleyhinə ağır cinayətlər törətmiş bu şəxslərin həbs olunaraq Bakıya gətirilməsindən şou düzəldərək ölkəmiz əleyhinə məkrli təbliğat aparmağa çalışır. Amma yalan ayaq tutar yeriməz. Bəri başdan qeyd edək ki, Ermənistanın start verdiyi bu uğursuz kampaniya da iflasa məhkumdur. Beynəlxalq Ədalət Məhkəməsində düçar olduğu uğursuzluqlara baxmayaraq, bu dövlət yenə də əsassız olaraq beynəlxalq hüququn norma və prinsiplərinə zidd şəkildə məhkəmə qarşısında iddialar irəli sürür, məqsədli şəkildə sülh və normallaşma prosesində maraqlı olmadığını nümayiş etdirir.

Ermənistan beynəlxalq təşkilatları, dünya ictimaiyyətini çaşdırmaq məqsədi ilə müharibə cinayətləri törətməkdə ittiham olunan separatçıları siyasi məhbus adlandırır. Hansı ki, indi hərbi cinayətlərdə adları keçən həmin separatçıların özləri müxtəlif zamanlarda mətbuatda çıxış edərək "qürurla" azərbaycanlı girov və məhbusları necə qul kimi işlətdiklərini, onlara qarşı necə amansızlıqla zorakılıq etdiklərini danışıblar. Ermənistanda və digər Avropa dövlətlərində oturub Azərbaycan əleyhinə saxta ittiham yağdıranlar unutmasınlar ki, bu hadisələr çox da uzaq tarixdə baş verməyib. Onların zülmünü görüb zərərçəkmiş şahidlər var... Həm də həbs olunanlar səhvlərini anlayıb törətdikləri cinayətləri etiraf edirlər.

Azərbaycan əsir götürülmüş hərbi qulluqçulara qarşı hər zaman ləyaqətlə davranıb. İstər Birinci, istərsə də İkinci Qarabağ müharibəsi zamanı Ermənistan əsir götürdüyü Azərbaycan əsgərlərinə, mülki vətəndaşlara qarşı xüsusi amansızlıqla davranıb. Bunu təsdiqləyən istənilən qədər fakt, videomaterilal, insanların bədənində işgəncələr, zülmün nişanələri var. Bundan başqa, Ermənistan tərəfi əsir götürdükləri insanların ləyaqətini alçaldaraq məhkəməsiz, qanunsuz cəzalandırdıqları barədə özlərinin çəkib yaydıqları videogörüntülər var...

Dumanlı hava şəraitində yolunu azaraq Ermənistana keçən iki əsgərimizin başına gətirilən oyunları xatırlayanda belə, insan dəhşətə gəlir. Ermənistan hakimiyyəti bu şəxslərə qarşı amansızlıq edənlərə nəinki cəza verdi, hüquqi ölçü götürdü, əksinə, həmin əsirləri saxta ittihamlarla mühakimə edib 12 il müddətinə azadlıqdan məhrum etdi. Bu gün beynəlxalq hüquqdan, humanizmdən danışan Ermənistan 4000 nəfərə yaxın əsir, itkin və girov götürdüyü soydaşlarımızın taleyi, öldürülübsə yeri haqqında məlumat verməkdən yayınır.

Bunun əksi olaraq Azərbaycan əsir götürülmüş, saxlanılmış hərbi qulluqçulara, eləcə də hazırda həbsdə olan separatçı rejimin başçılarına qarşı hər zaman ləyaqətlə davranıb. Onların saxlanma şəraiti, yerləri barədə həm ailə üzvlərinə, həm də beynəlxalq təşkilatlara məlumat verilir. Vəkillə təmin ediliblər. Vaxtaşırı həkim müayinəsindən keçirilib müalicə olunurlar .

Əlbəttə ki, iki xalq arasında düşmənçilik toxumu səpən, qanlı müharibələrə səbəb olan separatçılar və onlara rəhbərlik edənlər cəzasız qalmayacaqlar. Müvəqqəti olaraq hələ ki ədalətdən yayına bilən Robert Köçəryanın, Serj Sarkisyanın da həbs olunaraq Azərbaycanda ədalət məhkəməsi qarşısına çıxarılacaqları gün gəlib çatacaq. Onlar da, bu münaqişəni yaradıb bundan şəxsi mənfəətləri üçün bəhrələnən digər cinayətkarlar da düşünməsinlər ki, cəzasızlıqları əbədi olacaq. Çox çəkməz ki, "Gəncənin bombalanmaq əmrini mən vermişəm" deyən Araik Harutyunyan və digərləri kimi ədalət məhkəməsi qarşısında cavab verib etdiyi əməllərin cəzasını çəkəcəklər.

Elşən QƏNİYEV,

Azərbaycan.-2023.- 12 oktyabr, №-222.- S.10.