Fransa xalqlarımıza qarşı soyqırımı törədib

Bu gün Bakıda Bakı Təşəbbüs Qrupunun təşkilatçılığı ilə "Neokolonializm: İnsan hüquqlarının pozulması və ədalətsizlik" adlı beynəlxalq konfrans keçiriləcək.

Bakı Təşəbbüs Qrupu (BTQ) Azərbaycan Respublikasının sədrlik etdiyi Qoşulmama Hərəkatının Əlaqələndirmə Bürosunun nazirlər toplantısı çərçivəsində 6 iyul 2023-cü ildə Bakıda "Müstəmləkəçiliyin tamamilə aradan qaldırılmasına doğru" adlı konfransın iştirakçıları tərəfindən yaradılıb.

BTQ XXI əsrdə hələ də müstəmləkəçilikdən əziyyət çəkən dünyanın müxtəlif bölgələrində yerləşən xalqların azadlıq uğrunda apardıqları mübarizəyə dəstək verir.

Tədbirdə iştirak edəcək Martinikanın Azadlığı Partiyasının nümayəndəsi Luk Karole mətbuat konfransı zamanı deyib: "Fransa insan haqları ölkəsi hesab edilir, lakin bizim ölkələrimizdə yerli xalqa qarşı müstəmləkə siyasəti aparır. Fransa xalqlarımıza qarşı soyqırımı törədib. Fransanın iqtisadiyyatını inkişaf etdirmək üçün onlardan qul kimi istifadə edilib. Nigeriya, Senaqal kimi ölkələr də müstəmləkəçiliyə məruz qalırlar. Onlar azad olmaq üçün mübarizə aparırlar".

"Fransanın müstəmləkəçiliyi ilə mübarizədə beynəlxalq təzyiqlər olmalıdır. Artıq Fransa imperialist mövqedən çıxış edə bilmir. Ancaq Fransa öz səylərini davam etdirir və radikallaşma gözə çarpır", - deyə o əlavə edib.

Martinikanın Azadlığı Partiyasının nümayəndəsi Luk Karole deyib ki, Fransa Martinikanı ayrıca xalq olaraq görməkdən imtina edir: "Biz öz aramızda ana dilimizdə danışırıq. Lakin Fransa regional dillərlə bağlı qanuna imza atmayıb. Biz yaxın zamanda bir sənəd qəbul etdik ki, öz dilimiz fransız dili ilə bərabər statusa malik olsun. Lakin Fransa isə deyir ki, tək rəsmi dil fransız dilidir. Onlar başqa dilin rəsmi dil olmasından imtina edirlər".

Qvadelupanın Azadlığı Naminə Xalq Birliyinin nümayəndəsi Yakob Bisep isə bildirib ki, Fransanın məqsədi assimilyasiya etməkdir: "Fransa bu siyasətinə ilk olaraq dildən başlayır. Xalqlarımız fransız dilində danışmağa məcbur edilirlər. Mübarizələrimiz maneələrlə rastlaşır".

Qvadelupanın Azadlığı Naminə Xalq Birliyinin nümayəndəsi Qaston Samit isə xatırladıb ki, müstəmləkəçiliyə məruz qalmış xalqlar beynəlxalq dəstək gözləyirlər: "Öz torpaqlarımızdakı əhali ilə çalışırıq ki, bu məsələ sürətlənsin. Fransa özünü beynəlxalq səviyyədə insan haqları müdafiəçisi kimi təqdim edir. Lakin biz onu göstərmək istəyirik ki, Fransa müstəmləkəyə məruz qoyduğu dövlətlərə bu cür yanaşmır. Biz istəyirik ki, müstəmləkəçiliyə sakit şəkildə son qoyaq. Lakin Fransa bu dialoqu rədd edir. Fransanı yalnız öz maraqları düşündürür. Bir sıra ölkələrdə Fransa müstəmləkəçiliyinə son qoyulsa da, hələ də orada Fransa təsirləri özünü göstərir".

Azərbaycan.-2023.- 20 oktyabr, № 229.- S.10.