Qarabağ və Şərqi Zəngəzurda böyük yaşıl enerji potensialı var

Yeni layihələr Azərbaycanın enerji sahəsində gücünü daha da artıracaq

"Hazırda işğaldan azad edilmiş ərazilərimizdə enerji layihələrinin də icrası sürətli templə davam etdirilir. Son bir il ərzində Prezident İlham Əliyevin Füzuli, Cəbrayıl, Zəngilan, Ağdam, Laçın, Kəlbəcər və Şuşaya səfərləri zamanı mühüm enerji infrastrukturlarının təməlləri qoyulub, bir neçəsi istifadəyə verilib".

Bu sözləri "Azərbaycan" qəzetinə açıqlamasında Milli Məclisin deputatı Aydın Hüseynov deyib. Deputat bildirib ki, Laçında Həkəri çayı üzərində yerləşən 8 meqavat gücündə "Güləbird" Su-Elektrik Stansiyasının, "Kəlbəcər-1" Kiçik Su-Elektrik Stansiyasının, "Suqovuşan-1" və "Suqovuşan-2" KSES-lərin açılışı həmin ərazilərin güclü enerji mənbəyinə çevrildiyini göstərir. Eyni zamanda Prezident İlham Əliyevin işğaldan azad edilmiş ərazilərlə bağlı müəyyən etdiyi iqtisadi inkişaf kursunda bu ərazilərin "yaşıl enerji zonası"na çevrilməsi əsas istiqamətlərdən biri kimi müəyyən edilib və bu zonanın yaradılmasına dair strateji addımlar atılmaqdadır.

A.Hüseynov qeyd edib ki, azad edilmiş ərazilərdə bərpa-olunan enerji mənbələrinə xarici investorların da marağı böyükdür: "Yaponiya, İtaliya, Türkiyə, Koreya, Çin, Birləşmiş Ərəb Əmirlikləri, Səudiyyə Ərəbistanı və digər ölkələrin nüfuzlu şirkətləri ekoloji cəhətdən təmiz və enerji səmərəliliyinə malik "yaşıl texnologiyalar"ın tətbiqi perspektivlərini Azərbaycanla birgə araşdırmaqdadır. İlkin müşahidələr göstərir ki, Qubadlı, Zəngilan, Cəbrayıl və Füzuli rayonlarında günəş enerjisi layihələri üçün əlverişli potensial mövcuddur və bu texniki potensial 7200 MVt-dan artıq olaraq qiymətləndirilir. Eyni zamanda ilkin araşdırmalara əsasən, Laçın və Kəlbəcərin dağlıq ərazilərində külək enerjisinin 2000 MVt həcmində texniki potensialının olması müəyyən edilib".

Azərbaycanın son illərdə "yaşıl enerji" layihələrinin təşəbbüskarı kimi çıxış etdiyini vurğulayan deputat bildirib ki, ölkəmiz enerji idxal edən ölkədən enerji ixrac edən ölkəyə çevrilib. Hazırda 4 ölkəyə elektrik enerjisi ixrac edilir. Ötən il Türkiyə, Rusiya, Gürcüstan və İrana 2 milyard kilovat-saat elektrik enerjisi nəql olunub.

A.Hüseynov qeyd edib ki, işğaldan azad edilmiş ərazilərdə inşa edilən və istifadəyə verilən enerji qovşaqları Azərbaycanın bu sahədə gücünü daha da artıracaq, ixracın coğrafiyasını genişləndirəcək.

Əsmər QARDAŞXANOVA,

Azərbaycan.-2023.- 29 oktyabr, № 237.- S.9.