Heydər Əliyev məktəbinin ən layiqli məzunu

Zəfərimizin, qazanılan bütün uğurların təməlində Heydər Əliyev yolu və 31 oktyabr 2003-cü ilin sədaqət andı dayanır.

2003-cü il oktyabrın 15-də keçirilmiş seçkilərdə xalq Heydər Əliyevin özü qədər inandığı və gələcəyinə böyük ümidlər bəslədiyi cənab İlham Əliyevə inamla və səmimiyyətlə qucaq açaraq onu Azərbaycanın Prezidenti seçdi. Cənab İlham Əliyevin andiçmə mərasimindəki nitqində ifadə etdiyi kimi, "Oktyabrın 15-də Azərbaycan xalqı seçki məntəqələrinə gələrək Heydər Əliyev siyasətinə səs veribdir. Sülhə, əmin-amanlığa, tərəqqiyə, inkişafa, quruculuğa, sabitliyə səs veribdir. Bu siyasətə Azərbaycanda alternativ yoxdur".

31 oktyabr 2003-cü ildə baş tutan andiçmə mərasimində Prezident İlham Əliyevin prioritetləri çox aydın idi - Heydər Əliyev siyasi kursuna sadiq qalaraq, daxili sabitliyi qorumaq, ölkənin milli maraqlarını daha etibarlı formada reallaşdırmaq, dövlətin siyasi müstəqilliyini gücləndirmək, iqtisadiyyatı gücləndirməyə nail olmaq, ən əsası isə Azərbaycanın ərazi bütövlüyünü və suverenliyini tam təmin etmək.

Əslində, andiçməyə qədər cənab İlham Əliyev tərəfindən Baş nazir kimi bu istiqamətdə qətiyyətli addımlar atılmışdı. Xüsusən 2003-cü il oktyabr ayının 15-də Azərbaycan xalqı seçki məntəqələrinə gələrək Heydər Əliyev siyasətinə - Ulu Öndərin özünün ifadə etdiyi kimi, onun tamamlanmamış perspektivli planlarına səs verdikdən sonra, Mərkəzi Seçki Komissiyası səsvermənin nəticələrini elan edərkən antimilli dairələr situasiyanı ələ almağa və 90-cı illərin əvvəllərində olduğu kimi, meydanlardan hakimiyyəti zəbt etməyə çalışırdı. Belə ki, antimilli ünsürlər paytaxtda dağıntılar törətmiş, qarşıdurma yaratmışdılar. Lakin seçkilərdə qələbə qazanıb xalqın dəstəyini almış cənab İlham Əliyevin qətiyyətli davranışı onun Heydər Əliyev məktəbinin ən layiqli məzunu olduğunu, Ulu Öndərin sükanı etibarlı ələ ötürdüyünü və xalqın da 15 oktyabr seçkilərində müdrik seçim etdiyini, doğru qərar verdiyini göstərdi. Andiçmə mərasimində yeni Prezident "Əgər kimsə Azərbaycanda sabitliyin pozulmasına can atırsa, biz buna imkan verməyəcəyik, Azərbaycan xalqının rahat, təhlükəsiz, sabitlik şəraitində yaşamasını təmin edəcəyik" kimi bəyanat verəndə hər kəs - dost da, düşmən də cənab İlham Əliyevin nə qədər ciddi və reallığa əsaslanan praqmatik düşüncə və qətiyyət sahibi olduğunun və istənilən antimilli cəhdin elə beşiyindəcə boğulacağının fərqində idi.

Sonrakı dövr ərzində proseslər və gedişat sübut etdi ki, həqiqətən cənab İlham Əliyev Cənubi Qafqaz kimi qeyri-stabil, qaynar qazana bənzəyən bir regionda nəinki Heydər Əliyevin ölkədə yaratdığı sabitliyi qorumağı bacardı, üstəlik, bunu daha da möhkəmləndirib Azərbaycanı bütövlükdə regionumuzda sabitlik və təhlükəsizlik adasına çevirə bildi. Məhz bu qətiyyətli strategiya ilə Prezident İlham Əliyev Azərbaycanı Qərbin "idarəolunan xaos" planından kənarda saxladı, rəngli inqilablar və "baharlar" seriyasının və ideologiyasızlaşdırma siyasətinin davamlılığını məhz Azərbaycanda pozaraq qlobal nizamı dəyişdirdi. Beləliklə, Cənubi Qafqazda və keçmiş ittifaq ölkələrində ilk dəfə məhz cənab İlham Əliyev demokratik prinsiplərin milli, mədəni, mənəvi-əxlaqi və dini ənənələrlə uzlaşdırılmasına nail olub, Şərqdə ailə ənənələrini hədəfə alan dağıdıcı fəaliyyət planının qarşısını almaqla intellektual əsaslarda yeni demokratik modernist cəmiyyətə rəngli inqilabsız, qarşıdurmasız keçidini təmin edə bildi.

Möhtərəm Prezident andiçmə mərasimində bəyan etmişdi ki, Azərbaycan iqtisadiyyatının əsas istiqaməti gəlirləri Azərbaycan xalqına səmərəli şəkildə xidmət edən neft strategiyasının həyata keçirilməsidir. Məhz daxili sabitlik, xalq-iqtidar birliyi Prezident İlham Əliyevə çoxşaxəli islahatları reallaşdırmağa, çoxvektorlu dövlət siyasəti həyata keçirməyə imkan verdi və nəticədə nəhəng neft strategiyası reallaşdırıldı. Azərbaycan dünyanın enerji təhlükəsizliyində aparıcı oyunçulardan birinə və neft-qaz potensialı daha dayanıqlı kapitala çevrildi. Son 20 ildə bütövlükdə dövlətçilik tariximizdə olmadığı qədər ölkə iqtisadiyyatında qeyri-neft sektorunun çəkisi artırıldı, qlobal miqyaslı nəqliyyat-kommunikasiya sistemləri quruldu, təhsil, səhiyyə, idman infrastrukturu faktiki olaraq tam yeniləndi.

Möhtərəm Prezident 31 oktyabr 2003-cü ildəki andına sadiq qalaraq cəmi 4 il sonra ölkədə sonuncu məcburi köçkün çadır şəhərciyinə son qoydu, vəd olunduğu kimi, işğaldan əziyyət çəkən bütün qaçqın və köçkünlər müasir şəraitlə təmin olundu. Bu gün isə Qarabağ və Şərqi Zəngəzurun əzəli-əbədi sakinləri məhz Prezident İlham Əliyevin sayəsində öz doğma torpaqlarına, ən müasir infrastrukturla təmin olunmuş şəkildə yenidən tikilmiş yurdlarına başıuca, alnıaçıq, ləyaqətli və təhlükəsiz formada dönürlər. Bu tarixi reallığın kökündə cənab İlham Əliyevin andına və Ulu Öndərin direktivlərinə sadaqəti dayanır. Möhtərəm Prezident ilk dəfə 20 il öncə bəyan etmişdi ki, "Azərbaycan öz doğma torpaqlarını, nəyin bahasına olursa-olsun, azad edəcəkdir". Cənab İlham Əliyevin hakimiyyətə gəldiyi gündən yüksək intellektə, vətənpərvərliyə, milli düşüncəyə, ən əsası isə qələbəyə köklənmiş gənc nəsil formalaşdırıldı, ölkə suveren iqtisadi və siyasi gücə çevrildi.

Güclü iqtisadiyyat hərbi-müdafiə qüdrətinin əsasında dayanan amildir. Prezident İlham Əliyev Azərbaycanı hərbi-siyasi gücə çevirib, 30 illik işğala Vətən müharibəsi ilə cəmi 44 günə, separatizmə isə lokal antiterror tədbirləri ilə 23 saata son qoyaraq milli missiyanı tamamlamağa nail oldu. Heç şübhəsiz ki, Azərbaycanın tarixi ədaləti bərpa edib qalib ölkəyə çevrilməsi, Konstitusiya quruluşunun bütün ərazilərimizdə bərqərar olunması möhtərəm Prezidentin siyasətinin şah əsəridir.

Cənab İlham Əliyev 20 il öncə and içmişdi ki, "Azərbaycan gələcəkdə çox zəngin və qüdrətli ölkəyə çevriləcəkdir". Bu gün istənilən azərbaycanlı əlini vicdanına qoyaraq regionun ən güclü, müasir tarixin isə yeganə qalib dövlətinin vətəndaşı olması ilə fəxr edə bilir. Bu reallığın təməlində isə Heydər Əliyev yolu və bu yola 31 oktyabr 2003-cü ilin sədaqət andı dayanır.

Bəhruz MƏHƏRRƏMOV,

Milli Məclisin deputatı

Azərbaycan.-2023.- 31 oktyabr, № 238.- S.5.