Boz zonanın zülməti

Azərbaycan öz ərazilərində heç vaxt ikinci erməni dövlətinin yaradılmasına imkan verməyəcək. Torpaqlarımızın işğal altında olduğu dövrdə Prezident İlham Əliyev tərəfindən səslənən bu fikir Vətən müharibəsində möhtəşəm bir formada öz təsdiqini tapdı. Bu müharibə, Azərbaycanın zəfəri Ermənistanın və dünya erməniliyinin bədnam niyyətini birdəfəlik gözlərində qoydu.

Həyat əlamətlərinin olmadığı ərazi

Hazırda Azərbaycan dövlətinin əsas prioritetlərindən biri Qarabağın erməni sakinlərinin cəmiyyətimizə reinteqrasiyasıdır. Lakin həmin sakinlər Rusiya sülhməramlılarının müvəqqəti nəzarətində olan Azərbaycan ərazilərində hələ də qalan separatçıların girovuna çevriliblər. Məhz separatçıların təsiri və təzyiqi ilə Qarabağ ermənilərinin Azərbaycan cəmiyyətinə reinteqrasiyası ilə bağlı təşəbbüslər hələ ki nəticə vermir.

Digər tərəfdən, Rusiya sülhməramlılarının müvəqqəti yerləşdikləri Azərbaycanın Qarabağ bölgəsindəki erməni separatizmi bu ərazinin "boz zona"ya çevrilməsinə səbəb olub. "Boz zona" dedikdə qanunsuz və separatçı silahlı dəstələrin, mərkəzi hakimiyyətə tabe olmayan qüvvələrin, terror qruplaşmalarının fəaliyyət göstərdikləri ərazilər, dövlətin nəzarətindən kənar yerlər nəzərdə tutulur. "Boz zona" elə bir ərazidir ki, burada dövlətin qanunları və ya beynəlxalq hüquq işləmir. Belə yerlər, terrorçuluğun, separatçılığın, qlobal narkoticarətin, silah və insan qaçaqmalçılığının elementləri hesab olunur.

Müasir tariximizdə "boz zona"lara bir sıra ölkələrdə rast gəlmək mümkündür. Reallıq ondan ibarətdir ki, "boz zona" həmişə zülmət içərisində olub. Çünki buradakı həyat əlamətləri həmin ərazilərdə yerləşmiş separatçılar, terrorçular və ya qanunsuz silahlı dəstələr tərəfindən məhv edilir. Rusiya sülhməramlılarının müvəqqəti nəzarətində olan Azərbaycanın Qarabağ bölgəsi də "boz zona"nın nümunəsidir. Erməni separatizmi burada bütün həyat əlamətlərini məhv edib. Separatçılar Qarabağdakı erməniləri əllərində girov saxlayır, qanunların işləmədiyi bu ərazidən hər cür məqsədlər üçün istifadə edirlər.

Separatçıların və terrorçuların sonlarının çatacağı gün uzaqda deyil

Bir vaxtlar Ermənistan işğal etdiyi Azərbaycan ərazilərini "boz zona"ya çevirmişdi. Mahiyyətində terrorçuluq olan erməni separatçıları bu ərazilərdən hər cür çirkin məqsədlər üçün istifadə edirdilər. Heç bir qanunun işləmədiyi, nəzarətin olmadığı bu ərazilər narkotik maddə və silah qaçaqmalçılığı üçün münbit yer idi. Azərbaycanın İranla sərhədinin 130 kilometrindən artıq bir hissəsi onların əlində idi.

Vətən müharibəsindəki qələbə sayəsində həmin ərazilərin əsl və əzəli sahibləri geri döndülər. Ermənilərin "boz zona"ya çevirdiyi bu ərazilər indi yenidən canlanır, yaraları sağalır.

İşğaldan azad edilmiş bütün ərazilərimizdə həyat yenidən öz axarına düşməkdədir. Vətən müharibəsi göstərdi ki, əraziləri "boz zona"ya çevirənləri, burada meydan sulayanları məhv etmək və həmin torpaqları laləzara döndərmək mümkündür. Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev bildirib ki, Azərbaycan öz ərazisində hansısa bir "boz zona"nın olmasını qəbul etməyəcək: "Kimlərsə düşünürlər ki, onlar mövcud şəraiti olduğu kimi davam etdirəcəklər və bu separatist statusunda yaşamaqda davam edərək və bu qeyri-qanuni rejimin mövcudluğunu təmin edəcəklər, bu, baş verməyəcəkdir".

Rusiya sülhməramlılarının müvəqqəti nəzarətində olan Azərbaycan ərazilərindəki separatçıların və terrorçuların da sonlarının çatacağı gün uzaqda deyil. Azərbaycan dövləti Qarabağdakı "boz zona"nın da rəngini dəyişəcək.

Rəşad CƏFƏRLİ,

Azərbaycan.-2023.- 14 sentyabr.- S.6.