"Siyasi partiyalar haqqında" qanun yeniləşən siyasi konfiqurasiyaya böyük fayda verəcək

Prezident İlham Əliyev yanvarın 11-də "Siyasi partiyalar haqqında" qanunu təsdiq edib. Siyasi partiyaların təsis edilməsi, qeydiyyatı, fəaliyyəti və ləğvi kimi məsələləri tənzimləyən yeni qanunun qüvvəyə minməsi ölkədə siyasi sistemin təkmilləşdirilməsi istiqamətində işlərin davamlı olduğunu göstərir.

Mövzu ilə bağlı siyasi partiya rəhbərlərinin fikirlərini öyrəndik.

Partiyalar daha güclü siyasi institutlara çevrilir

Milli Məclisin deputatı, Böyük Quruluş Partiyasının sədri Fazil Mustafa bildirib ki, ölkədə çox az sayda qanun bu qədər geniş ictimai müzakirələrdən keçib: Partiya sədri hesab edir ki, siyasi sferada bu müzakirələrin faydasının tezliklə şahidi olacağıq.

"Nəzərə almaq lazımdır ki, müzakirələrdə kifayət qədər arqumentlər səsləndirilmiş və layihədə xeyli dəyişikliklər edilmişdi. Biz də Böyük Quruluş Partiyası olaraq müzakirələrdə iştirak edərək partiyaların maraqlarını dilə gətirmişik. Sevindirici haldır ki, boşluqların müşahidə edildiyi bir çox müddəalar tənzimlənib", - deyə deputat qeyd edib.

Partiya sədrinin sözlərinə görə, indi artıq "Siyasi partiyalar haqqında" qanunun müddəaları əsasında partiyaların yenidən təşkilatlanması prioritetdir: "Gələcək təcrübələrdə hansısa müddəaların problem yaratdığını, partiyaların təşkilatlanmasına mane olduğunu müşahidə etsək, bu məsələyə yenidən qayıtmaq olar. Yəni bütün hallarda məsələ müzakirə olunub, öz həllini tapmalıdır. Yeni qanun yeni siyasi konfiqurasiyaya fayda verməlidir. Bu baxımdan partiyalar qanunun tələblərinə uyğun təşkilatlanma prosesini artıq geçəkləşdirməlidirlər. Fikrimcə, "Siyasi partiyalar haqqında" yeni qanun ölkəmizdə fəaliyyət göstərən partiyaların gələcəkdə daha güclü siyasi institutlara çevrilməsinə gətirib çıxaracaq".

Yeni qanun partiyaları daha məsuliyyətli olmağa dəvət edir

Milli Məclisin deputatı, Milli Cəbhə Partiyasının sədri Razi Nurullayev deyir ki, köhnə qanun 30 il əvvəl qəbul edildiyinə görə, təbii ki, onun yenilənməsinə ehtiyac var idi.

"Məhz bunu əsas tutaraq Milli Məclisdə təmsil olunan bütün siyasi partiyaların nümayəndələri "Siyasi partiyalar haqqında" yeni qanun layihəsinin hazırlanması üçün Milli Məclisin Sədrinə müraciət etmişdi. Qanun qəbul olunana qədər layihə həm Milli Məclisdə, həm digər platformalarda müzakirəyə çıxarılmış, biz də iştirak edib təkliflərimizi vermişdik. Bir neçə partıyanı çıxmaq şərtilə, əksər partiyalar ictimai müzakirələrdə iştirak edib və fikirlərini bölüşüblər. Ümumilikdə siyasi partiyalar 250-dən çox təklif vermişdi. Rəhbərlik etdiyim Milli Cəbhə Partiyası isə 15-dən çox təklif təqdim etmişdi. Milli Məclisdə keçirilən ictimai müzakirələr zamanı, o cümlədən digər platformalarda deputatlar 100-dən çox təklif irəli sürmüşdülər. Təqdim edilmiş təkliflərin böyük qisminin nəzərə alınması müsbət haldır", - deyə partiya sədri deyib.

R.Nurullayev bildirib ki, yeni qanunun qüvvəyə minməsi ilə siyasi partiyalar altı ay ərzində yeni tələblərə cavab vermək üçün əzmlə çalışmalıdırlar: "Altı ay ərzində ölkədə ciddi siyasi aktivizm müşahidə oluna bilər ki, bu da ümumilikdə cəmiyyətimizin demokratik inkişafı üçün faydalıdır".

Sosial Tədqiqatlar Mərkəzi tərəfindən qanun layihəsində əksini tapmış əsas məsələlərlə bağlı ictimai rəy sorğusu da keçirilmişdi. R.Nurullayev deyir ki, bu, qanunun cəmiyyətimiz üçün nə qədər gərəkli olmasından xəbər verir.

"Qanunun ictimai müzakirələri zamanı bizə məlumat verildi ki, Venesiya Komissiyasının 2010-cu ildə qəbul etdiyi "Siyasi partiyaların fəaliyyətinin hüquqi tənzimlənməsi barədə vəziyyət" sənədində sırf siyasi partiyanın statusuna və fəaliyyətinə aid olan 100-dən çox tövsiyə yeni qanunun hazırlanmasında nəzərə alınıb. Bununla bərabər, 20-dən çox ölkənin təcrübəsi də öyrənilələrək qanuna şamil edilib", - deyə deputat bildirib.

Partiya sədrinin sözlərinə görə, "Siyasi partiyalar haqqında" qanun partiyaları daha məsuliyyətli və daha güclü olmağa dəvət edir: "Bu baxımdan yeni qanun ölkəmizdə siyasi partiya institutunu daha da gücləndirəcək. Ona görə də bu qanunun qəbul edilməsində rolumuz olduğuna görə çox şadam. İnanıram ki, narazı qalanlar da qanunun onların siyasi həyatına müsbət təsir göstərəcəyinə zaman-zaman şahidlik edəcəklər".

Nəzrin QARDAŞXANOVA

Azərbaycan.- 2023.- 13 yanvar.- S.1; 3.