Fransanın casus şəbəkəsi daha çox Ermənistan hakimiyyətinə təhlükə yaradır

Ermənistan ölkəmizə qarşı ərazi iddiası başlatdığı gündən Azərbaycan problemin sülh yolu ilə həllinə üstünlük versə də, işğalçı dövlət himayədarlarının vasitəçiliyi ilə əldə etdiyi müvəqqəti qələbədən ruhlanaraq həmişə əks düşüncədə olduğunu nümayiş etdirib. 2020-ci ilin payızında baş vermis Vətən müharibəsindəki məğlubiyyətinə kimi Ermənistanın hərbi-siyasi rəhbərliyinin müxtəlif vaxtlarda yeni ərazilərimizi işğal etmək niyyətində olmaları barədə təhdidlərinə, hətta tanklarını Bakıya sürəcəkləri barədə sərsəmləmələrinə çox şahidlik etmişdik.

Təəssüf ki, illərdir problemin həllində vasitəçi rolunda çıxış edən bəzi dövlətlər, xüsusilə Fransa vaxtaşırı "problemin hərbi yolla həlli yoxdur" kimi bəyanatlar versələr də, münaqişənin sülh yolu ilə həlli üçün heç bir iş görmürdülər. Əslində, işğalçı Ermənistanı birmənalı olaraq silahlandırıb, əraziləri işğal olunan və bir milyon vətəndaşı qaçqın-köçkün düşən Azərbaycandan "güzəşt" tələb edirdilər.

Azərbaycan Vətən müharibəsindəki möhtəşəm qələbədən sonra da prinsiplərinə sadiq qalaraq Ermənistana sülh təklif etdi. Sonralar baş verən proseslər də sübut etdi ki, Azərbaycan qarşı tərəfdən fərqli olaraq bölgədə sülhün təmin olunması istiqamətində ardıcıl olaraq prinsipial mövqedən çıxış edir. Ermənistan isə məkrli niyyətini gizlətmək üçün özünü sözdə sülh tərəfdarı göstərir, danışıqlar prosesini müxtəlif vasitələrlə uzadaraq revanş götürmək üçün vaxt qazanmağa çalışır…

Ermənistanın sülh müqaviləsini imzalamaq niyyətində olmaması faktdır. Birincisi, iqtisadi tənəzzül dövrünü yaşayan, xarici borc içində çabalayan bir ölkənin var gücü ilə yenidən silahlanması onun sülh niyyətində olmadığını isbat edir. İkincisi, Ermənistan hərbi-siyasi rəhbərliyi müstəqil qərar vermək gücündə deyil. Qərbdən asılılıq, xüsusilə Fransanın öz qlobal maraqları naminə Ermənistana sülh müqaviləsini imzalamamaq üçün təzyiq göstərməsi göz önündədir. Heç şübhəsiz ki, hakimiyyətə gələrkən Nikol Paşinyan Parisdən aldığı dəstək nəticəsində bu ölkə qarşısında öhdəliklər götürüb.

Ermənistanı Azərbaycandan "qorumaq" adı ilə Aİ-nin "müşahidə" missiyası adı ilə təqaüddə olan təcrübəli jandarm qüvvələrini Ermənistana yerləşdirməklə rəsmi Paris Nikol Paşinyan hakimiyyətini basqı altında saxlayıb, öz fikirlərini onun dili ilə səsləndirə bilir.

Fransa geosiyasi maraqları naminə Cənubi Qafqazda dayanıqlı sülhün olmasını qəti surətdə istəmir. 2020-ci ilin noyabrında üçtərəfli Bəyanat imzalandıqdan sonrakı dövrdə baş verən hadisələri izlədikdə Parisin sülh prosesinə mane olmaq üçün açıq surətdə müdaxilə etdiyi faktını heç cür gizlətmək mümkün deyil.

Münxen Təhlükəsizlik Konfransı çərçivəsində Azərbaycan Prezidenti İlham Əliyevin Ermənistanın baş naziri Nikol Paşinyanla görüşündən sonra Fransanın "Franse 24" telekanalına müsahibə verən Ermənistanın baş naziri iki ölkə arasında sülh sənədini "ağlagəlməz", yəni qeyri-mümkün adlandıraraq bunu "Bakının Ermənistanı Qərbi Azərbaycan hesab etməsi" ilə izah edib. Nikol Bakını "yeni ərazilər tutmağa" hazırlaşmaqda ittiham etməkdən də çəkinməyib. Bunun ardınca Fransanın müdafiə nazirinin Ermənistana ikigünlük səfərini də təsadüfi hesab etmək olmaz.

Təcrübədən məlumdur ki, Fransa Azərbaycana qarşı hər hansı bir təxribat planı hazırlayanda Emmanuel Makron adətən öz fikirlərini yedək təşkilatlardakı adamlarının dili ilə səsləndirir. Son günlər Fransanın və erməni lobbisinin təsiri altında olan KİV-də və beynəlxalq qurumlarda Azərbaycanın növbəti "hücum planı" haqqında gedən əsassız məlumatlar Fransanın regionla bağlı hazırladığı növbəti məkrli oyunundan xəbər verir. Aydın məsələdir ki, Paris Ermənistanda hərbi mövcudluğunu təmin etmək məqsədilə regionda növbəti toqquşmalara rəvac vermək niyyətindədir.

Azərbaycan Prezidenti İlham Əliyev fevralın 28-də Alman İqtisadiyyatının Şərq Komitəsinin sədri Mixael Harmsın rəhbərlik etdiyi nümayəndə heyətini qəbul edərkən Cozef Borelin bəyanatına münasibət bildirərək qeyd edib: "Bütün bunlar Fransanın guya Azərbaycanın Ermənistana hücuma hazırlanması ilə bağlı ölkəmizin demonizə edilməsinə əsaslanan anti-Azərbaycan siyasətinin bir hissəsidir. Ermənistanla sərhəddə son dəfə 2023-cü ilin sentyabrında ciddi gərginləşmədən sonra bu ilin fevralınadək olan dövrdə sərhəddə vəziyyət sakit idi. Lakin fevral ayında erməni snayperi Azərbaycan əsgərini ağır yaraladıqdan sonra biz buna vaxtında adekvat və dəqiq cavab verməli olduq. Bizim bu cavab bir neçə dəqiqə çəkdi və Ermənistanın bunu dərk etməsinə kifayət etdi ki, azərbaycanlıların öldürülməsi cəhdi cəzasız qalmayacaq və dediyim kimi, ötən ilin sentyabrından bu hadisə istisna olmaqla sərhəddə sakitçilik hökm sürür. Deməli, cənab Borel və cənab Makron bu informasiyanı reallıqdan deyil, öz xəyallarından götürürlər".

Dövlətimizin başçısı məsələyə münasibət bildirərkən ölkəmizin sülhə sadiq olması haqqında fikirlərini bir daha əminliklə vurğulayıb. Xatırladaq ki, bir qədər öncə fransalı general Ermənistan-Azərbaycan sərhədinə gələrək "binoklla" müşahidə aparmışdı. Bundan cəmi bir neçə gün sonra Ermənistan hərbçiləri snayperlə əsgərimizi yaraladılar...

Bu arada qeyd edək ki, Ermənistanın baş naziri Nikol Paşinyanın Fransaya baş tutan son səfəri zamanı iki ölkə arasında kəşfiyyat xidmətləri arasında sıx tərəfdaşlıq əlaqələrinin qurulması barədə razılıq əldə olunub. Bu fakt Fransaya əvvəllər Ermənistana yerləşdirdiyi casus şəbəkəsinə "qanuni" fəaliyyət göstərmək imkanı verəcək.

Əslində, Fransanın kəşfiyyat orqanlarının casus şəbəkəsinə Ermənistanda meydan verilməsi bu gün daha çox Nikol Paşinyan hakimiyyətinə təhlükə yaradır. Heç şübhəsiz ki, Qərbə, Fransaya boş vədlər verib, götürdüyü öhdəliklərini yerinə yetirə bilməyən Nikol bir gün də "böyük bacısı"nın İrəvana yerləşdirdiyi xüsusi xidmət orqanlarının fitnəsi ilə də hakimiyyətdən uzaqlaşdırılacaq.

Elşən QƏNİYEV,

Azərbaycan.-2024.- 1 mart, № 47.- S.4.