Fransa Ermənistanı ikinci Ukraynaya çevirmək istəyir

"Berlin platforması çərçivəsində Azərbaycan və Ermənistan arasında görüşlərin keçirilməsi müsbət hadisə olsa da, Paşinyanın Makrondan son dərəcə asılılığı bu danışıqların nəticəsi ilə bağlı nikbin proqnozlar səsləndirməyə imkan vermir. Bu gün Fransa Prezidentinin ölkədaxili uğursuzluqlarını xarici siyasət hesabına kompensasiya etmək istəyi onun ölkəmiz əleyhinə müxtəlif təxribatlara cəhd göstərməsinə səbəb olur. Paris çirkin niyyətlərini reallaşdırmağa çalışsa da, heç bir məqsədinə çata bilmir".

Bu fikirləri qəzetimizə açıqlamasında Milli Məclisin deputatı Elman Nəsirov deyib. Deputat qeyd edib ki, Fransanın 25-ci prezidenti olan Emmanuel Makron mütəmadi olaraq ermənipərəst mövqeyi ilə gündəmə gəlir: "Makrondan əvvəlki prezidentlərin heç biri birmənalı olaraq diplomatiyadan tamamilə kənar şəkildə Ermənistana dəstək və Azərbaycana təzyiq və təhdid siyasəti həyata keçirməyib. Bəs görəsən Makronun bu qədər qatı ermənipərəst olmasının motivləri nə ilə bağlıdır? Ermənilər və fransızlar etnik qohum olmadıqlarına görə burada motiv tamamilə başqadır. Amma səbəbin nə olmasından asılı olmayaraq, o da bəllidir ki, Makron bu gün Fransadakı erməni lobbisinin əlində oyuncağa çevrilib. Makron onu hakimiyyətə gətirən erməni lobbisi və diasporunun sifarişlərini icra edir".

Deputatın dediklərinə görə, Parisin Cənubi Qafqaza marağının kəskin artması həm də onunla bağlıdır ki, Fransa parlamentində Makronun təmsil etdiyi siyasi partiya əsas güc sahibi deyil və bu partiya ölkə qanunlarının qəbulunda çox ciddi problemlərlə üz-üzə qalır. Ona görə də Fransa Prezidenti ölkədaxili uğursuzluqlarını xarici siyasət hesabına kompensasiya etmək istəyir. Xüsusilə də Cənubi Qafqazda hərbi varlığına nail olmaq istəyir, elə fəallığın əsas səbəbi də budur. "Makron Avropanın seçilən və ən fəal liderlərindən biri kimi tanınmaq istəyir. Bu yaxınlarda NATO ölkələrinin Ukraynaya hərbi qüvvə göndərməsi ilə bağlı təklifi də onun aktiv lider kimi tanınmaq, fərqli ideyaların müəllifi kimi qəbul edilmək istəyindən irəli gəlir. Lakin onun Ukraynaya hərbi yardımla bağlı ideyası elə öz həmkarları tərəfindən süngü ilə qarşılandı", - deyə müsahibimiz söyləyib.

Elman Nəsirov həmçinin deyib ki, Fransa Azərbaycana qarşı təxribatlar törətməklə, Cənubi Qafqaz cəbhəsində fəallıq nümayiş etdirməklə erməni lobbisinin və diasporunun diqqət mərkəzində olmaq istəyir. Bu səbəbdən də çirkin niyyətli Fransanın regiona gəlişi sülh və əmin-amanlığa gətirib çıxarmır. Əksinə, Parisin regionda hansısa formada mövcudluğu yalnız vəziyyəti gərginləşdirə və faşizmi gücləndirə bilər.Təsadüfi deyil ki, Fransanın və müasir Ermənistanın tarixində ilk dəfədir ki, bu ölkənin müdafiə naziri İrəvana səfərə gedir. Paris Ermənistanı silahlandırmaqda israrlıdır, onlara təkcə zirehli texnikanın deyil, eyni zamanda yaxın, orta və uzaqmənzilli raketlərin, hava hücumundan müdafiə sistemlərinin verilməsini planlaşdırır. Həmçinin Fransanın Ermənistanda hərbi müşaviri də fəaliyyətə başlayır. Yəni bütün bunlar ondan xəbər verir ki, Fransa Ermənistan vasitəsilə Cənubi Qafqazda möhkəmlənmək istəyini reallaşdırmaq üçün addımlar atır. Onu da xüsusi qeyd etmək lazımdır ki, Makronun əsas niyyətlərindən biri də Cənubi Qafqazı ikinci Ukraynaya çevirmək, regionda ciddi qarşıdurma yaratmaqdır".

Deputat Fransanın bu cəhdlərini bulanıq suda balıq tutmağa bənzədib. Bildirib ki, Paris nə qədər cəhd edirsə-etsin, heç bir nəticə əldə etməyəcək. Hazırda Ermənistan Azərbaycanla sülh müqaviləsi imzalamaqdan boyun qaçırmaqla uduzur. Sülh Bakıdan çox elə məğlub İrəvana lazımdır.

Nəzrin QAFARZADƏ,

Azərbaycan.-2024.- 1 mart, № 47.- S.6.