Azərbaycan enerji siyasətində yeni mərhələyə qədəm qoyub

"Azərbaycan hökuməti ötən əsrin sonlarından başlayaraq enerji təsərrüfatının inkişafı ilə bağlı məqsədyönlü proqramlar həyata keçirməklə respublikamızın enerji güclərinin bir neçə dəfə artmasına nail olub. Ölkəmiz ən etibarlı tərəfdaşlardan biri olaraq dünyanın enerji təhlükəsizliyi məsələlərinin həllində aparıcı mövqe tutur".

Milli Məclisin deputatı Kamran Bayramov qəzetimizə açıqlamasında bildirib ki, Prezident İlham Əliyevin qeyd etdiyi kimi, bu gün Azərbaycan enerji təhlükəsizliyini 100 faiz təmin edir və bir sıra ölkələrin, o cümlədən Avropa İttifaqı üzvlərinin enerji təhlükəsizliyində danılmaz rola malikdir.

Onun sözlərinə görə, "Cənub Qaz Dəhlizi" Məşvərət Şurası çərçivəsində martın 1-də Bakıda öz işinə başlayan nazirlərin 10-cu toplantısında Azərbaycan və Avropa İttifaqı daxil olmaqla 23 ölkə, 6 beynəlxalq təşkilat, 44 şirkət təmsil olundu. Toplantıda Azərbaycanın bu ilin noyabr ayında evsahibliyi edəcəyi COP29-un ölkəmiz üçün əhəmiyyəti xüsusi qeyd edildi. Məşvərət Şurası çərçivəsində "Azərbaycan Respublikası, Gürcüstan, Rumıniya və Macarıstan Hökumətləri arasında "yaşıl enerji"nin inkişafı və ötürülməsi sahəsində strateji tərəfdaşlıq haqqında Saziş"in icrası məqsədilə nazirlərin 6-cı iclası və "Dənizdə külək enerjisindən istifadənin inkişafı" üzrə Azərbaycan-Avropa İttifaqı "dəyirmi masa"sı keçirildi.

K.Bayramov qeyd edib ki, dövlət başçımız "Cənub Qaz Dəhlizi" Məşvərət Şurası çərçivəsində nazirlərin 10-cu və "Yaşıl Enerji" Məşvərət Şurası çərçivəsində nazirlərin 2-ci iclaslarında çıxış edərkən Azərbaycanın etibarlı tərəfdaş olduğunu artıq sübut etdiyini diqqətə çəkib. Qarşımıza qoyduğumuz bütün planların həyata keçiriləcəyi ilə bağlı əminlik də ifadə olunub: "Çünki təkcə keçən ilin göstəriciləri bunun sübutudur. Azərbaycanın mövqeyi hər zaman ardıcıl olub, enerji təhlükəsizliyini hər bir ölkənin milli təhlükəsizlik məsələsi hesab edib. Şaxələndirmə haqqında danışarkən mövqeyimiz hər zaman dəyişməz olub və bu gün də belədir. Şaxələndirmə yalnız marşrutlara deyil, həm də mənbələrə şamil edilməlidir".

Deputat diqqətə çatdırıb ki, Azərbaycan bu günə qədər Avropanı neft və qaz ilə təchiz edirdisə, artıq enerji siyasətində yeni bir mərhələyə qədəm qoyub: "Bu, bərpaolunan enerji resursları ilə bağlıdır. Bu gün elektrik enerjisinin Avropaya nəql edilməsi üzərində işlər aparılır. Azərbaycanın enerji diplomatiyasındakı uğurları iqtisadi imkanlarımızın genişlənməsində əhəmiyyətli rol oynayır. Avropa üçün Azərbaycan enerjisi bir ümiddir, Aİ digər sahələrdə olduğu kimi, enerji sahəsində də ölkəmizlə geniş əməkdaşlıq edir. Hazırda Avropa məkanında Azərbaycan qazına böyük tələbat olduğu üçün bu, eyni zamanda həmin ölkələrin enerji təhlükəsizliyinə növbəti töhfə olacaq".

Getdikcə ixrac potensialının artdığını deyən K.Bayramov əlavə edib ki, artıq yeni əməkdaşlıq platformaları da yaranır. Bu isə həm iqtisadi, həm də siyasi dividendlər deməkdir. Alternativ enerji mənbələrinin yaradılması, "yaşıl enerji" sektorunda reallaşdırılan dünya miqyaslı layihələr ölkəmizin gücünü daha da artırır. Prezident İlham Əliyev toplantıdakı çıxışında onu da qeyd etdi ki, Azərbaycan, həmçinin "yaşıl enerji"yə keçid prosesində iştirak edir. Bu il Azərbaycanda "Yaşıl dünya naminə həmrəylik ili" elan edilib. Bərpaolunan enerji layihələrimiz yüksək göstəricilərlə müşahidə olunur. Əsas investorlarımız Birləşmiş Ərəb Əmirliklərindən "Masdar" və Səudiyyə Ərəbistanından olan "ACWA Power" şirkətləridir. Azərbaycan "Qara Dəniz Yaşıl Kabel" layihəsi ilə Avropaya "yaşıl enerji"nin önəmli ixracatçılarından biri olmağı nəzərdə tutur.

Deputat xatırladıb ki, toplantıda "Cənub qaz dəhlizi"nin genişləndirilməsi məsələsi də geniş müzakirə olunub. "Bu mühüm addım elə atılmalıdır ki, eyni zamanda digər qaz layihələri elə icra edilməlidir ki, ekoloji tarazlığın təmin olunmasına ziyan dəyməsin. Bütün bunlar Azərbaycanın ciddi niyyətini, siyasətini və səylərini nümayiş etdirir. Bərpaolunan enerji mənbələrimiz nə qədər çox olarsa, elektrik enerjisi istehsalı üçün istifadə etdiyimiz təbii qaza da daha çox qənaət edərik. Bu da "Cənub qaz dəhlizi"nə əlavə töhfə olar", - deyə deputat əlavə edib.

Kamran Bayramovun fikrincə, həyata keçirilən mühüm, nəhəng layihələr Azərbaycan dövlətinin gücünün, qüdrətinin, potensial imkanlarının göstəricisidir. Hər bir sahə üzrə konkret proqramların mövcudluğu, onların xalq tərəfindən dəstəklənməsi və uğurlu icrası ölkəmizin hərtərəfli inkişafını daha da sürətləndirir.

Əsmər QARDAŞXANOVA,

Azərbaycan.-2024.- 5 mart, № 50.- S.6.