"Vətənin şərəfini qoruya biliriksə, biz varıq"

Qəsbkar ermənilərin torpaqlarımızı işğal altında saxlaması, şəhərlərimizi xaraba, yurd yerlərimizi viran qoyması, təbii sərvətlərimizi talaması illər idi ki, insanlarımızı qisasa səsləyirdi. Doğulan körpələr dünyaya Qarabağ dərdi ilə gəlirdi. Analarımız körpələrinə şirin nağıllar əvəzinə qorxunc Xocalı qətliamı haqqında danışırdılar… Cənnət diyarımız Qarabağ erməni vandalizminin törətdiyi vəhşiliklər nəticəsində dünyanın ən dəhşətli fəlakət zonasına dönmüşdü…

Samir Qarabağdan uzaq, qədim Bərgüşad kəndində doğulub dünyaya gəlsə də, ürəyi Qarabağ həsrəti ilə döyünür, düşüncəsində torpaqlarımızın azad olunması kimi müqəddəs hisslərlə yaşayırdı.

Bu gün Bərgüşadda elə bir nəsil olmaz ki, yetişdirdiyi oğullardan Qarabağ döyüşlərində şəhid verməmiş olsun…

Samir ailədə iki bacıdan sonra dünyaya gələn tək oğlan idi. İki bacının əziz xələfi idi. Bacıları onu göz bəbəkləri kimi qoruyur, az qala ürəklərinin içinə qoyub orada bəsləmək istəyirdilər.

Samir Qəfərli 1 noyabr 1994-cü ildə Ucar rayonunun Bərgüşad kəndində anadan olub. 2012-ci ildə orta məktəbi əla qiymətlərlə bitirən Samir Azərbaycan Dövlət Mədəniyyət və İncəsənət Universitetinin Kulturologiya fakültəsinə qəbul olunub. Müəyyən səbəblərdən bir müddət təhsil aldığı universitetdən ayrılmaq məcburiyyətində qalıb. 2016-cı ildə təhsilini yenidən davam etdirmək üçün universitetə qayıdan Samir 2019-cu ildə oranı uğurla başa vurub. Təhsil aldığı müddətdə Samir Qəfərli Xəzər TV-də yayımlanan "Ata ocağı" serialında aktyor kimi ilk debütünü edib. 2019-cu ilin oktyabr ayında həqiqi hərbi xidmətə çağırılıb.

27 sentyabr 2020-ci ildə erməni qəsbkarlarının növbəti təcavüzü nəticəsində başlayan Vətən müharibəsi zamanı artıq Samir Qəfərli düşmənlə üzbəüz səngərdə duran igidlərimizin ön cərgəsində səf tutanların sırasında idi. Sinəsi düşmənə qarşı qəzəb, torpaqlarımızın azad olunma həsrəti ilə çırpınan Samir sonuncu dəfə ailəsi ilə 15 oktyabrda əlaqə saxlayıb bacısı ilə danışır. 30 oktyabr 2020-ci ildə Laçın istiqamətində gedən döyüşlərdə qəhrəmancasına şəhid olur. 31 oktyabr 2020-ci ildə doğulduğu doğma Bərgüşad kəndində böyük izdihamla canından çox sevdiyi torpağa tapşırılır.

Böyük bacısı Aysel qardaşı ilə son telefon danışıqlarını göz yaşı içində xatırlayır: "Oktyabrın 15-i axşamüstü telefonuma zəng gəldi. Samir idi. Səsindən, danışığından hiss etdim ki, sevinci yerə-göyə sığmır. "Aysel, Cəbrayıldan zəng edirəm" dedi. Ordumuz sürətlə irəliləyir. Cəbrayıl, Kəlbəcər, Hadrut əlimizdədir. Üzü Qubadlıya sarı gedirik. İnşallah, tezliklə torpaqlarımızı düşməndən azad edəcəyik. Qardaşın bir qəhrəman kimi qayıdar evimizə, sən də sevinərsən. Qardaşınla bir ömür fəxr edəcəksən" dedi. Samirin ən böyük arzusu idi ki, evlənsin, qızı olsa, anamızın adını ona qoysun. Deyirdi ki, qızım olsa, onu qolumun üstündə böyüdəcəyəm. Anamı yaşada bilmədik, barı adını yaşadaq..."

Vətənin azadlığı, Qarabağın erməni qəsbkarlarından xilas edilməsi uğrunda qanlı döyüşlərə qatılan, düşmənə kini, nifrəti ilə silahlanan cəsur döyüşçü Füzuli, Cəbrayıl, Qubadlının, Laçının uğrunda gedən döyüşlərdə qəhrəmanlıqla iştirak edir. Samirin bir şüarı var idi: "Vətənin şərəfini qoruya biliriksə, biz varıq. Onda yaşamağa dəyər". Samir Tanrının ona verdiyi 26 illik bir ömrü şərəflə yaşayanlardan oldu. Oktyabrın 30-da düşmən gülləsinə tuş gələn igidimizin həyatı yarımçıq kəsilsə də, ömrünü vətənin ömrünə calayanlardan oldu.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin sərəncamı ilə Samir Qəfərli ölümündən sonra "Vətən uğrunda", "Cəbrayılın azad olunmasına görə", "Laçının azad olunmasına görə", "Qubadlının azad olunmasına görə" medalları ilə təltif edilib.

Elşən QƏNİYEV,

Azərbaycan.-2024.- 3 may, № 90.- S.15.