Rusiyanın hesabına
yaşayan Ermənistan
indi ona arxa çevirir
Qərbin
bu ölkəyə nə qədər yardım göstərəcəyi
hələ də məlum deyil
"Tarix boyu Ermənistan
və böyük dövlətlər bir-birilərindən
yararlanıblar. Ermənistan isə böyük dövlətlərdən
istifadə etməyə çalışıb ki, qonşu
dövlətlərin torpaqları hesabına "böyük
Ermənistan" yaratsın. Qərb və çar Rusiyası
da ermənilərin məkrli, hiyləgər sifətinə bələd
olduqlarından onlardan Osmanlıya qarşı həmişə
istifadə edib. Yəni Osmanlı dövlətinin zəifləməsində
və parçalanmasında həmişə erməni
kartını əllərində saxlaya bilir".
Bu sözləri
"Azərbaycan" qəzetinə açıqlamasında
Milli Məclisin deputatı Anar İsgəndərov deyib. Deputat
bildirib ki, qarşılığında onlara "böyük
Ermənistan" yaradılacağı və hətta
Osmanlı dövlətinin yeddi vilayətinin Hayastanın ərazisi
olacağına söz veriblər. 44 günlük müharibəyə
qədər Rusiya Ermənistana mümkün olan hər
şeyi bağışlayıb, əlində saxlamaq
üçün nə lazımdırsa edib. Təbii ki, belə
dəstəyin nəticəsi idi ki, Ermənistan Azərbaycan
torpaqlarını işğal edərək bir milyon insanın
Qərbi Azərbaycandan, Qarabağ və ətraf bölgələrdən
qovulmasına nail oldu. Bu əhali qaçqın və məcburi
köçkün həyatı yaşamağa məcbur edildi.
Onların evləri isə yerlə yeksan edildi, tarixi
yurdları dağıdıldı.
Deputat qeyd edib ki,
44 günlük Vətən müharibəsində isə
Rusiya Federasiyası Ermənistanın arzuladığı
yardımı ona göstərmədi. "Ermənistan ərazisindəki
rus ordusunu Azərbaycana qarşı müharibəyə təhrik
etməyə çalışsa da, Rusiya tərəfi buna getmədi.
Ona görə Ermənistan rəhbərliyi Rusiyadan imtina edib
üzünü Qərbə çevirdi. Təbii ki, Qərb də
Ermənistana nə qədər yardım göstərəcək
o, məlum deyil. Həqiqət ondan ibarətdir ki, tarix boyu belə
olub. Ermənilər qızışdırılıb
ortalığa salınıb, bu və ya digər dövlətə
qarşı ərazi iddialarına həvəsləndirilib, hətta
müharibələr aparılıb. Amma ən çətin vəziyyətə
düşəndə həmin dövlətlər Ermənistandan
əl çəkib, onu ortada buraxıblar. O zaman isə
Osmanlı türkləri, sonra Türkiyə və Azərbaycan
türkləri ölən, can verən, hətta ölkəmizə
xəyanət edən ermənilərə əl
uzadıblar", - deyə o əlavə edib.
A.İsgəndərovun fikrincə, Azərbaycan erməni
məkrini tanıyandan sonra, ermənilərin azərbaycanlılara
qarşı törətdikləri saysız-hesabsız vəhşiliklərə
görə bir də erməniyə yazığı gəlməyəcək:
"Dövlətimizin başçısı
çıxışlarının birində qeyd etdi ki, biz Ermənistanla
qonşuluq münasibətlərini bərpa edəcəyik.
Buna heç kimin şübhəsi olmasın. Amma ermənilərin
bizə qarşı törətdiklərini biz heç vaxt
yaddan çıxartmamalıyıq və
çıxartmayacağıq. Çünki erməni xisləti
bizə imkan verdi ki, düşmənin mahiyyətini, onun
faşist təxəyyülünü öyrənək,
tanıyaq və ona qarşı mübarizə aparaq".
Ə.QARDAŞXANOVA,
Azərbaycan.-2024.-
12 may, № 98.- S.9.