"Müzəffər Ali Baş Komandanımızın
rəhbərliyi ilə
şanlı ordumuz 44 günlük Vətən müharibəsində və
sentyabrın 19-20-də keçirilən
antiterror tədbirlərində
Azərbaycanın çoxəsrlik
tarixində ən böyük zəfərini
qazandı. Uzun müddət işğal altında olan torpaqlarımız azadlığına
qovuşdu, ərazi bütövlüyümüz və
suverenliyimiz tam bərpa olundu. Bu tarixi zəfərlərdən
sonra Azərbaycanda yeni mərhələ başladı. Bu mərhələdə prezident
seçkilərinin keçirilməsi
tamamilə məntiqlidir".
Bu sözləri
"Azərbaycan" qəzetinə
açıqlamasında Milli
Məclisin deputatı
Vüqar Bayramov deyib. Deputat digər seçkilərlə
müqayisədə prezident
seçkilərinin daha
mühüm əhəmiyyət
kəsb etdiyini vurğulayıb. Qeyd edib ki, dövlət
başçısı İlham
Əliyevin haqlı olaraq dediyi kimi,
əgər seçkilər
vaxtında keçirilməli
olsaydı, deməli, bələdiyyə seçkiləri
daha tez baş tutacaqdı. Ona görə də dövlət başçısı bütün
ərazilərimizi əhatə
edəcək ilk seçkinin məhz prezident seçkiləri olmasına qərar verib.
"Prezident deyib
ki, bütün amilləri - siyasi, hərbi və 30 illik işğalı, ərazinin relyefini, müdafiə xətlərinin
çox olmasını
nəzərə alsaq,
hesab edirəm ki, bu, xalqımızın,
dövlətimizin ən
parlaq qələbəsidir.
Dövlət başçısının
sözlərinə görə,
bu yeni dövr
başlayarkən, əlbəttə,
prezident seçkiləri
də bu yeni dövrün başlanğıcı olmalıdır.
Çünki hər bir dövr bir
zaman kəsiyidir və 30 il ərzində
işğal altında
olmuş ərazilərin
işğaldan azad edilməsi və suverenliyin tam bərpa olunması yeni dövrün başlanğıcıdır", - deyə Vüqar Bayramov bildirib.
Vüqar Bayramovun
sözlərinə görə,
azad edilmiş ərazilərimiz də daxil olmaqla bütün
ölkəboyu keçiriləcək
ilk prezident seçkiləri həm də tarixi əhəmiyyət daşıyır.
Bu, iqtisadiyyatımızın,
eləcə də regional geosiyasi və geoiqtisadi mövqeyimizin daha da gücləndirilməsi
baxımından əla
fürsətdir.
Deputat qeyd edib ki, 2023-cü ildə prezidentliyinin 20 ili tamam olan
İlham Əliyevin rəhbərliyi ilə qarşıdakı illərdə
yeni və dərinləşdirilmiş islahatlara
start veriləcək:
"Sözsüz ki, fevralın 7-nə təyin
olunmuş növbədənkənar
seçkilər Azərbaycan
üçün yeni bir mərhələnin başlanğıcı olacaq.
Əvvəlki mərhələyə
də elə bu prezident seçkiləri
ilə yekun vurulacaq. Dövlət başçısının müsahibədə
dediyi kimi, prezident seçkiləri bu yeni dövrə
xeyir-dua verəcək".
Nəzrin QAFARZADƏ,
Azərbaycan.-2024.-
12 yanvar, № 5.- S.4.