Neokolonist siyasətini davam etdirən Fransa indi açıq şəkildə anti-Azərbaycan
fəaliyyəti aparır
"Azərbaycan-Ermənistan münasibətlərinin tənzimlənməsində,
sülhyaratma prosesində
yer almağa cəhdlər göstərən
Fransa, əslində, birtərəfli və qərəzli yanaşma ortaya qoyur. Son
zamanlar Fransanın rəsmi şəxsləri
tərəfindən tez-tez
anti-Azərbaycan bəyanatlarının,
Parisin BMT Təhlükəsizlik
Şurasına təqdim
etməyə çalışdığı
qətnamələrin şahidi
olmuşuq".
Bu sözləri
"Azərbaycan" qəzetinə
açıqlamasında Milli
Məclisin Beynəlxalq
münasibətlər və
parlamentlərarası əlaqələr
komitəsinin sədr müavini Sevinc Fətəliyeva deyib. Onun sözlərinə görə, Fransa tərəfindən Ermənistan
yeni müharibəyə
təhrik edilərək
silahlandırılır. Bütün
bunlar rəsmi Parisin Azərbaycana qarşı yönəlmiş
siyasətinin nümunələridir.
Azərbaycanın Fransaya
münasibətdə hər
hansı bir qərəzi olmadığını
deyən Sevinc Fətəliyeva qeyd edib ki, dövlətimiz
çoxvektorlu xarici siyasət kursuna sadiq qalaraq bu
ölkə ilə də qarşılıqlı
maraqlar əsasında
əməkdaşlıq əlaqələrinin
genişləndirilməsində hər hansı bir problem görmür.
"Problem yalnız Fransanın, xüsusilə
də bu ölkənin hazırkı
iqtidarının ölkəmizə
qərəzli münasibət
bəsləməsindədir. Münasibətlərin gərginləşməsi
İkinci Qarabağ müharibəsi zamanı başladı. Həmin vaxt 44 gün ərzində Fransa prezidenti dəfələrlə
Azərbaycanın dövlət
başçısına telefon
açaraq müharibənin
dayandırılmasını istəyirdi. Ancaq onun istəyi baş tutmadı və Azərbaycan öz qətiyyətini ortaya qoydu. Müharibə
yalnız ölkəmizin
şərtləri təmin
olunmaqla dayandırıldı",
- deyə o əlavə
edib.
Komitə sədrinin
müavini vurğulayıb
ki, müharibənin bitməsindən sonra da rəsmi Paris qərəzli mövqeyini davam etdirir. Fransa başda E.Makron olmaqla, Ermənistanı birtərəfli
qaydada dəstəkləməkdə
davam edir: "İkinci Qarabağ müharibəsindən sonra
Fransa ilə münasibətlər gərgin
olsa da, əlaqələr mövcud
idi. Təsadüfi deyil ki, Azərbaycan
Fransa prezidenti Makronun Praqadakı görüşdə iştirakına
razılıq verdi və başqa səviyyələrdə də
təmaslar oldu - Fransa xarici işlər
nazirinin Azərbaycana səfəri baş tutdu. Antiterror tədbirlərindən sonra
isə münasibətlər
mahiyyətcə dayandırıldı
ki, bu da
ölkəmizin deyil, məhz Fransanın günahı ucbatından baş verdi. Bu ölkə artıq heç bir beynəlxalq normalara əməl etməyərək açıq
şəkildə anti-Azərbaycan
fəaliyyəti aparmağa
başladı".
Sevinc Fətəliyeva
qeyd edib ki, postmüharibə dövründə məğlub
Ermənistanda müəyyən
revanşist qüvvələr
baş qaldırıb.
Belələri həm
hakimiyyət komandasında,
həm də müxalifətdə var. Sülh danışıqlarından
danışan Ermənistan
eyni zamanda silahlanmaya rəvac verir. Fransa bunda
da müəyyən rol oynayır. Bu gün demokratiyadan
danışan Fransanın,
əslində, tarixboyu
müstəmləkəçi siyasət yürütdüyü,
Afrikada soyqırımlar
törətdiyi bütün
dünyaya məlumdur.
Rəsmi Paris bu gün də neokolonist siyasətini davam etdirir, Afrikanın bir sıra xalqlarını müstəmləkə altında
saxlamağa çalışır.
Azərbaycan isə sülhü tərənnüm
edən bir ölkə kimi müstəmləkəçilikdən azad olmaq uğrunda
mübarizəni həmişə
müdafiə edib, bu istiqamətdə dəstəyini əsirgəməyib.
Qoşulmama Hərəkatının
sədri qismində müstəmləkəçiliyə qarşı mübarizədə
qlobal platforma kimi yeni müstəmləkəçi
və neokolonial təcrübələrə qarşı
mübarizədə prinsipial
mövqeyini ortaya qoyub. Ölkəmizin müstəmləkəçiliyə qarşı barışmaz
münasibəti bundan
sonra da birmənalı olaraq davam edəcək.
Sevinc Fətəliyeva
deyib ki, bu baxımdan ötən il yaradılmış Bakı
Təşəbbüs Qrupunun
fəaliyyəti əhəmiyyətlidir.
Bu, Fransanın müstəmləkə siyasətinə
qarşı mübarizədə
mühüm platformadır.
Əsmər QARDAŞXANOVA,
Azərbaycan.-2024.-
18 yanvar, № 10.- S.15.