Paşinyan Putinin əleyhinə mitinq keçirəcək

Hayastanda anti-Rusiya kampaniyası yeni vüsət alır

Hayastanda anti-Rusiya meyillərinin daha da artdığı müşahidə olunur. Bunu İrəvanda Rusiya əleyhinə keçirilən aksiyaların sayının çoxalması, az qala cəmiyyətin bütün təbəqələrində Moskvanın sərt tənqid hədəfinə çevrilməsi də təsdiq edir.

Ümumiyyətlə, indiki mərhələdə Hayastan iqtisadi, siyasi, geosiyasi və hərbi sferalarda çox çətin duruma düşüb. Hər tərəfdə yaranmış problemlərin altında əzilən ölkənin baş naziri Nikol Paşinyan çıxış yolunu Qərbə sığınmaqda görür, onun verdiyi vədlərə güvənir. Hər halda, Paşinyan hakimiyyətinin nümayiş etdirdiyi xarici siyasətdə konkret seçim etdiyi görünür, Rusiyanın xeyrinə olmayan bu istiqamətdə israrlı davranmağa çalışır.

Erməni saytları Rusiyanın əleyhinə silsilə yazılar dərc edir, siyasətçilər, ziyalılar tez-tez Rusiya əleyhinə açıqlamalar verirlər. Məsələn, erməni ictimai xadimi Karen Verdiyan iddia edib ki, artıq bir çox əcnəbi banklar İrəvanın müttəfiqinə görə Hayastanla maliyyə əməliyyatlarından və ümumilikdə əməkdaşlıqlardan yayınmağa başlayıblar: "Bəzi məlumatlara görə, xarici banklar, maliyyə mərkəzlərinin əksəriyyəti Hayastanda sövdələşmə əməliyyatlarından imtina ediblər. Sövdələşmələri davam etdirən yalnız 2-3 bank var. Səbəb ölkəmizdə olan Rusiya kapitalının dövriyyəsidir. Bununla əlaqədar ölkəmizə müəyyən məhdudiyyətlər qoyulub. Əgər daha konkret məlumatınız varsa, bizimlə paylaşın".

"Hraparak" qəzeti isə yazıb ki, Hayastanda anti-Rusiya kampaniyası yeni vüsət alır. Paşinyan yeni "günah keçisi" axtarışındadır. Bildirilib ki, Nikol Paşinyan başda olmaqla mövcud rejimin nümayəndələri Rusiyaya qarşı yeni təbliğat kampaniyasına başlayıblar. Belə təəssürat yaranır ki, Nikol Paşinyan və ətrafı nəhayət Hayastanı müttəfiqsiz qoymaq istəyirlər. Son vaxtlar Hayastan-Rusiya münasibətləri istiləşib və konstruktiv görünə bilər. Xüsusilə, buna Nikol Paşinyanın ötən ilin sonunda Sankt-Peterburqa getməsi şərait yaradıb. Lakin Paşinyan həftəsonu partiya üzvləri ilə görüşündə anti-Rusiya kampaniyasının yeni mərhələsinə başlayıb. O, adlarını çəkmədən mümkün müharibənin bütün məsuliyyətini və günahını üçüncü ölkənin üzərinə atmağa çalışıb. Aydındır ki, Paşinyan Rusiyanı nəzərdə tuturdu.

Daha sonra qəzet Paşinyanın tərəfdarlarının sayının artmasına toxunub: "Paşinyanın ən qalmaqallı və anti-erməni fikirlərini komanda yoldaşlarının səsləndirməsi artıq ənənə halını alıb. Bu dəfə parlamentin spikeri Alen Simonyan Paşinyanın siyasət niyyətlərini açıqlayıb. O, Paşinyanın fikirlərini davam etdirərək, regionda sülhə "üçüncü dövlət"in mane olduğunu deyir. Sülh müqaviləsinə gəlincə, Hayastan üzərində təsir rıçaqlarına sahib olmaq istəyən tərəflər təbii ki, hər iki ölkəyə təsir imkanlarını təmin etmək üçün heç olmasa "yaxşı vasitəçi" olmaq istərdilər".

Nəşrin yazdığına görə, yanvarın 21-də Rusiyaya qarşı növbəti mitinq keçiriləcək. Bunun üçün artıq razılıq alınıb. Anti-Rusiya kampaniyası çərçivəsində İrəvan meriyası Navalnı tərəfdarı olan Rusiya vətəndaşı Riçard-Roman Kinqə yanvarın 21-də İrəvanda Putin əleyhinə mitinq keçirməyə icazə verib.

Beləliklə, gedən proseslər Hayastanın sürətlə məhvə doğru yaxınlaşdığını bir daha təsdiqləyir.

Elçin CƏFƏROV,

Azərbaycan.-2024.- 18 yanvar, № 10.- S.15.