Rəsmi Paris beynəlxalq hüquq normalarına hörmətsizlik edir

Fransanın Azərbaycana qarşı iftira və qərəzləri bitib-tükənmək bilmir. İki ölkə arasında münasibətlər Fransanın günahı ucbatından getdikcə tündləşir. Bu ölkə əvvəllər də haqsız olaraq ədalətə, həqiqətə göz yumub Ermənistanı dəstəkləyirdi. Azərbaycan ərazilərinin vaxtilə ermənilər tərəfindən işğal olunduğunu dilinə gətirməyən Fransa daim ermənilərin müdafiəsində dayanıb.

Azərbaycan 44 günlük Vətən müharibəsində beynəlxalq hüquqa, BMT-nin Nizamnaməsinə uyğun olaraq ərazi bütövlüyünü təmin etdikdən, Ermənistanı məğlubiyyətə uğratdıqdan sonra rəsmi Parisin mövqeyi ölkəmizə qarşı tamam dəyişdi. Bu dəyişiklik onsuz da isti olmayan münasibətləri daha da soyutdu. Açıq-aydın göründü ki, Fransa İkinci Qarabağ müharibəsində ölkəmizin qələbəsini istəmirmiş. Haqqın, ədalətin zəfər çalmasının əleyhinə imiş. Azərbaycanın beynəlxalq hüquq normaları əsasında öz haqqını bərpa etməsi işğalçı Ermənistanın havadarlarından biri, deyərdik ki, elə birincisi olan Fransanı çox ciddi şəkildə narahat edirmiş.

Təbiidir ki, bizim üçün Fransanın nə istəyib-istəməməsi maraqlı deyil. Xalqımız 44 günlük Vətən müharibəsində güclü, qüdrətli ordusu ilə 30 ilə yaxın ərazilərimizi işğalda saxlayan Ermənistana qalib gəldi. Ordumuz Qarabağdan, eləcə də başqa bölgələrdən separatçı və işğalçı qüvvələri tamam qovub çıxartdı. Azərbaycan xalqı olaraq bu, bizim 30 il gecikmiş halalca haqqımız idi. Bunun nə ermənilərdən ötrü yaxasını parçalayan Fransaya, nə də o biri dövlətlərə heç bir aidiyyəti yoxdur.

Amma Azərbaycanın regiondakı daim artan gücünü istəməyən, zamanın diktə etdiyi reallıqla barışmaq istəməyən Fransa gündə bir hoqqa çıxardır. Dəyərsiz qərarlar, qətnamələr və bəyanatlar qəbul edir. Son günlər qəbul olunan qərar və qətnamələrə diqqətlə baxanda belə qənaətə gəlmək olur ki, fransız senatorlar axşamlar ermənilərlə bağlı yuxularında nəyi görürlərsə, sahah onu Senatda müzakirəyə çıxarırlar. Doğrudan da, Paris xəyallar şəhəri imiş.

Yenə də deyəsən fransızlar yuxularını qarışdırıblar. Fransa Senatı bir qrup ermənipərəst, anti-Azərbaycan ovqatlı senator tərəfindən təklif edilən daha bir dəyərsiz qətnamə qəbul edib. Qəbul olunan bu mənasız və əsassız qətnamə Azərbaycan Respublikasının beynəlxalq səviyyədə, o cümlədən elə Fransa Respublikasının özü tərəfindən tanınan ərazi bütövlüyünə və beynəlxalq hüququn əsas prinsiplərinə açıq şəkildə hörmətsizlik deməkdir.

Başını belə yararsız qətnamələr arasında itirib isterik vəziyyətə düşən Emmanuel Makron hökuməti ümid edir ki, Azərbaycana qarşı rəngli və rəngsiz oyunlardan çıxmaqla, təzyiq və qərəzli variantlara əl atmaqla nəyəsə nail ola bilər. Erməni lobbisindən divara vurulmuş şəkil kimi asılı qalmış fransız senatorların özləri də çox yaxşı bilirlər ki, qəbul etdikləri bu qətnamənin heç bir hüquqi əsası yoxdur. Sadəcə olaraq, senatorlar öz ağalarına sadiqliklərini bir daha göstərirlər.

Fransa Senatında Azərbaycan əleyhinə qəbul olunmuş qətnamə haqlı olaraq ölkə ictimaiyyəti tərəfindən böyük narazılıqla qarşılanıb. Azərbaycan Respublikasının Milli Məclisi Fransa Senatının qərarı ilə bağlı etiraz bəyanatı qəbul edib. Azərbaycan parlamenti haqlı olaraq Fransa Senatına qarşı kəskin etirazını bildirib. Bəyanatda Azərbaycan hökumətinə çağırış edilir ki, Fransanın ATƏT-in Minsk qrupunun həmsədrliyindən geri çağırılması üçün ATƏT-in rəhbərliyinə müraciət olunsun. Eyni zamanda Azərbaycan Respublikası ilə Fransa Respublikası arasında mövcud olan siyasi münasibətlərə yenidən baxılsın. Bəyanatda həmçinin Azərbaycanla Fransa arasında mövcud olan iqtisadi əlaqələr dərindən təhlil edilərək, lazımi tədbirlərin görülməsi də tövsiyə edilir.

Azərbaycan Respublikası Milli Məclisinin Bəyanatında bildirilir ki, son illərdə Fransa Respublikasının siyasi dairələri, o cümlədən Senatı və Milli Assambleyası birbaşa Yelisey Sarayından alınmış təlimat əsasında açıq irqçi, azərbaycanofob və islamofob fəaliyyətini daha da intensivləşdirmişdir və beynəlxalq hüquq normalarına və prinsiplərinə açıq hörmətsizlik göstərərək Azərbaycanın ərazi bütövlüyünə və suverenliyinə qarşı ədalətsiz addımlar atmaqda davam edir.

Uzaq və yaxın keçmişi müstəmləkəçilik üzərində qurulan bir dövlətin Azərbaycanı nədəsə günahlandırmaqda mənəvi haqqı yoxdur. Makron Fransasının, onun sifarişi ilə oturub-duran Senatın Azərbaycana qarşı qəbul etdiyi bu qətnamə sözsüz ki, qərəzdən və çirkin niyyətdən qaynaqlanır. Senatın təxribatçı addımı Fransa siyasi dairələrinin ənənəvi Ermənistan təəssübkeşliyinin növbəti təzahüründən başqa bir şey deyil. Paris bu yanlış addımı ilə Azərbaycanı deyil, öz ölkəsini pis vəziyyətə salır.

Makronu erməni lobbisi hakimiyyətə gətirib. Elə onlar da belə boş qətnamə və qərarları ilə onun sonunu gətirəcək. Günümüzün dəyişməyən bir reallığı var - Ermənistanın havadarının bu şousu da fiaskoya uğrayacaq. Gec-tez rəsmi Paris öz səhvini anlayıb geriyə addım atacaq. Nəhayət, Fransa və digər dövlətlər anlamalıdırlar ki, müstəqil və güclü Azərbaycan dövləti ilə mənasız, əsassız qətnamələrlə danışmaq olmaz.

Vahid MƏHƏRRƏMOV,

Azərbaycan.-2024.- 19 yanvar, № 11.- S.7.