2020-ci il sentyabrın
27-də səhər müharibə
xəbəri ilə açıldı. Həmin
gün gənclərimiz,
igidlərimiz, vətən
sevdalı oğullarımız,
"qisas" deyib hayqırdılar. Hərbi
səfərbərlik idarəsinə
tələsənlər içərisində
təcrübəsi, hərbi
biliyi, bacarığı
ilə seçilən,
qüsursuz xidmət edib təqaüdə çıxan, ehtiyatda olan mayor Elnur
Yaqub oğlu Hacıyev də var idi.
Elnurun ata ocağındayıq. Ömür-gün
yoldaşı Elnarə
xanım o günləri
belə xatırlayır:
- Sentyabrın 27-si səhər
tezdən Elnur ermənilərin torpaqlarımıza
təcavüzü haqqında
məlumatı eşidən
kimi hərbi formasını geyindi. Televizorda Ali Baş Komandanın xalqa müraciəti olacağı haqqında məlumat gedirdi. Elnur çox həyəcanlı idi. Tez-tez hərbçi yoldaşlarına, sabiq əsgərlərinə zəng
vurub vəziyyəti öyrənməyə çalışırdı.
Ekran qarşısında
dayanıb Ali Baş Komandanın xalqa müraciətini diqqətlə dinlədi. Qəfil yerindən qalxıb Ali Baş Komandana əsgəri qaydada təzim edib məruzə etdi. "Cənab Ali Baş Komandan, ehtiyatda olan mayor Elnur Hacıyev
döyüş tapşırıqlarını
yerinə yetirmək üçün əmrinizə
tam hazırdır".
Sonra qızımızı
qucaqlayıb öpdü:
"Elnarə, anam və qızımız sənə əmanət, mən gedirəm", - dedi.
Elnarə xanımın
səsi zəifləyir,
göz yaşı selə dönür, qəhər boğur.
"Elnur çox ümidli, Allaha bağlı bir adam idi. Qələbəyə
çox inanırdı.
"Mən qələbə
ilə qayıdacağam",
- deyirdi. Etiraz etdim, qorxuram, Elnur, çox qorxuram, dedim. Getməsini istəmədiyimi
bildirdim. Mane olmağa çalışdım.
"Elnarə, Allahdan
ümid kəsilməz.
Narahat olma, sağ-salamat qayıdacağam.
Mən zabitəm. Zabit şərəfim var. Evdə otursam, dövlətin mənə verdiklərini özümə haram sanaram. Dost-tanış üzünə baxa bilmərəm", - deyib
bizimlə vidalaşıb
evdən çıxdı.
Çıxarkən sanki
bir də qayıtmayacağını hiss
edirmiş kimi arxaya çevrilib evimizə baxdığını
gördüm.
Vətən müharibəsi
şəhidi Elnur Yaqub oğlu Hacıyev 12 iyun 1979-cu ildə Ucar rayonunda anadan olub. Orta təhsilini
1986-1996-cı illərdə Ucar rayon 5 saylı
orta məktəbində
alıb. 1997-ci ildə
Ali Hərbi Dənizçilik Akademiyasına
daxil olub. 2002-ci ildə akademiyanı əla qiymətlərlə
başa vurub. Elə həmin ildə Qobustanda yerləşən "N" saylı
hərbi hissədə
qulluğa başlayıb.
2006-cı ilə kimi Qobustanda xidmət göstərən gənc
zabit rəhbərliyə
raport yazıb könüllü olaraq ön cəbhəyə getmək niyyətində olduğunu bildirib. Komandanlıq 2006-cı ildə
onun arzusunu nəzərə alaraq hərbi qulluğunu davam etdirmək üçün Tovuzda yerləşən "N" saylı
hərbi hissəyə
göndərib. 2011-ci ilə
kimi Tovuzda qulluq edən Elnur Hacıyev sonra xidməti vəzifəsini Ağdam rayonunda yerləşən
hərbi hissədə
davam etdirib. 2015-ci ilə kimi Ağdamda
hərbi vəzifəsini
yerinə yetirən zabitimiz komandanlığın
əmrinə əsasən
qulluq yerini Gədəbəy rayonunda yerləşən "N" saylı
hərbi hissədə
davam etdirməli olub. 2019-cu ildə isə mayor Elnur Hacıyev Ağstafa rayonunda kimya xidməti rəisi kimi hərbi qulluğunu qüsursuz davam etdirərək 2020-ci ilin fevralında təqaüdə
çıxıb.
"Ailədə üç
uşaq idik. Elnur ortancılımız
idi. Atam
çox ciddi adam idi. Zarafatı sevməzdi. Amma Elnurun bir
başqa xasiyyəti var idi. O olan yerdə nə televizor yada
düşərdi, nə də telefon. Sanki adamın
könlünü açmaq, zarafat etmək, gülmək,
danışmaq üçün gəlmişdi bu dünyaya.
Elnur elə bir insan idi ki, hər sözünü, hər dərdini
ona demək olardı. Adamın ürəyindən tikan
çıxaran qardaş idi. Yaxşı dost,
qayğıkeş ata, ləyaqətli ər, əvəzsiz
oğul idi. Hamının yerini bilən, ağzının tikəsini,
cibinin qazancını bölməyi bacaran biri idi. Elnur elə
bir qardaş idi ki, inanın, lazım
olsaydı, öz
canından adama pay verərdi. Ömründən kəsib
ömrünə calayardı. Müharibənin ilk
günündən imkan düşən kimi bizlə
danışırdı. Əlaqəmiz heç kəsilməzdi. Füzulidə,
Cəbrayılda, Suqovuşanda, Hadrut istiqamətində gedən
döyüşlərdə döyüşüb
qardaşım, - deyə bacısı Elnarə bildirdi.
Söhbət
anası Hicran xanımla davam etdiririk:
- Oktyabrın
17-si günortaüstü Elnur zəng vurmuşdu.
Əhvalı çox yaxşı idi. Sevindiyini
danışığından hiss edirdim. Dedim ki, Elnur,
özünü qoru, səni gözləyirik. Qızın səndən
ötrü ağlayır, - uşağı kiridə bilmirik.
"Narahat olma, ana, mən bura ölməyə yox,
öldürməyə gəlmişəm. Torpaqlarımız
azad olunmayınca, düşmənə can vermərəm",
- dedi. İnandım. Yaralandığını da bizdən
gizlətdi. Elə həmin gün oktyabrın 17-də
gündüz saat 4-də Hadrut uğrunda gedən
döyüşlərdə şəhid olduğunu eşitdik.
Azərbaycanın
ərazi bütövlüyü uğrunda gedən
döyüş əməliyyatlarında qəhrəmancasına
döyüşən mayor Elnur Hacıyev ölümündən
sonra "Vətən uğrunda", "Suqovuşanın
azad olunmasına görə", "Füzulinin azad
olunmasına görə" medalları və 3-cü dərəcəli
"Vətənə xidmətə görə" ordeni ilə
təltif edilib.
Elşən QƏNİYEV,
Azərbaycan.-2024.-
20 yanvar, № 12.- S.15.