Fransa regionda sülhə və sabitliyə mane olur

Ermənistanın Qarabağ savaşındakı məğlubiyyəti Fransanın Cənubi Qafqaz planlarını alt-üst edib. Uzunmüddət Qarabağ münaqişəsinə vasitəçilik edən Fransa Vətən müharibəsi zamanı oyun qaydalarını kobud surətdə pozduğu üçün Azərbaycan ona "qırmızı vərəqə" göstərərək meydandan çıxarıb.

Reallıq budur ki, ölkəmiz döyüş meydanında Ermənistanı, siyasi-diplomatik masada Fransanı sarsıdıcı məğlubiyyətə uğradıb. Əslinə qalsa, Fransa Emənistanı nümayişkaranə şəkildə müdafiə etməklə özünü ifşa etdi. "Vasitəçi" kimi etibardan düşdü, nüfuzunu itirdi... Bir sözlə, bu ölkənin Ermənistan üzərindən qurduğu Cənubi Qafqaz siyasəti bir mənalı olaraq iflasa uğradı.

Özünü Ermənistanın dostu, müttəfiqi, müdafiəçisi kimi göstərən rəsmi Paris, əslində, onun ən böyük düşmənidir. Heç sirr də deyil ki, Qarabağ münaqişəsinin ssenarisi Fransada hazırlanıb, Ermənistan bu bədnam layihənin ağılsız icraçısı olub.

Ermənistandan 200 min azərbaycanlını doğma yurdlarından didərgin salanlar, Qarabağda torpaqlarımızı işğal edib xarabazara çevirənlər bu gün ölkəmizə qarşı açıq düşmənçilik edən islamofob dövlətlərdən, xüsusilə də Fransadan razılıq almasaydılar belə, geniş miqyasda insanlığa və hüquqa zidd vəhşiliklər edə bilməzdilər.

Amma uduzublar. Planları pozulub. Hətta özlərinin də etiraf etdikləri kimi sarsılıblar. Öz məkrli niyyətlərini həyat keçirmək üçün hər gün hansısa bir uğursuz plan qururlar. Fransada fəaliyyət göstərən erməni lobbisinin və onların təsiri altında olan Fransa rəsmilərinin və siyasətçilərinin təhriki ilə həmin ölkənin siyasi dairələri, o cümlədən Senatı və Milli Assambleyası birbaşa Yelisey sarayından alınmış təlimat əsasında açıq irqçi, azərbaycanofob və islamofob fəaliyyətlərini daha da intensivləşdirmişdilər. Onlar beynəlxalq hüquq normalarına və prinsiplərinə açıq hörmətsizlik nümayiş etdirərək Azərbaycanın ərazi bütövlüyünə və suverenliyinə qarşı ədalətsiz addımlar atmaqdan belə çəkinmirlər.

Fransa parlamentinin hər iki palatası ölkəmiz əleyhinə ədalətsiz qətnamələr istehsal edən bir quruma çevrilib. Lakin ədalətsiz hücumlarının nəticə vermədiyini anlayan Emmanuel Makron anti-Azərbaycan koalisiyasını genişləndirməyə, AŞPA-nı da öz siyasi oyunlarına cəlb etməyə çalışır.

Aydın məsələdir ki, Avropa İttifaqını da, AŞPA-nı da, Fransanı da Azərbaycan vətəndaşının hüququ və taleyi qətiyyən düşündürmür. Bu təşkilatların bəzi dövlətlərin maraqlarını həyata keçirmək üçün təzyiq vasitəsi olduğu da heç kimə sirr deyil. Bu gün Fransanın sifarişi ilə AŞPA Azərbaycanda insan hüquqlarının pozulmasını iddia edirsə, sabah da bu ölkənin yedəyində gedən digər bir beynəlxalq təşkilat başqa bir bəhanə ilə üstümüzə gələcəyi bizi təəccübləndirməməlidir və bu, gözləniləndir.

Azərbaycan həmişə regionda sülhün və sabitliyin tərəfdarı olub. 2020-ci il sentyabrın 27-də Ermənistanın təcavüzkar hücumunun qarşısı alınıb, torpaqlarımız işğaldan azad olunana kimi problemin sülh yolu ilə həllinin tərəfdarı olub. Bu illər ərzində dəfələrlə Ermənistanın hərbi-siyasi rəhbərliyinin Azərbaycanın yeni ərazilərini işğal edəcəkləri, tanklarını Bakıya sürəcəkləri haqqında sərsəmləmələrini eşitmişik də. Amma bunlara baxmayaraq, Azərbaycan Ermənistana sülh təklif edən və hər an sülhə sadiq olduğunu əməli ilə sübut edən ölkədir.

Yeri gəlmişkən, Tbilisidə səfərdə olan Ermənistanın baş naziri Nikol Paşinyan gürcü həmkarı ilə mətbuat konfransı keçirərkən deyib: "Biz ümumi qəbul edilmiş prinsiplərə əsaslanaraq Azərbaycanla sülh sazişinin imzalanması ilə bağlı razılıq əldə etdikdə və bunu imzaladıqdan sonra regionda sülh əldə olunacaq".

Nə yaxşı ki, Yelisey sarayının girovuna çevrilən Ermənistan rəhbərliyi bunu anlayır.

Elşən QƏNİYEV,

Azərbaycan.-2024.- 28 yanvar, № 18.- S.4.