Humanizm və xeyirxahlıq nümunəsi

İranda baş verən proseslərdən sonra Azərbaycan bu ölkədə qalan və vətəninə dönməyə çalışan əcnəbi vətəndaşlar üçün ümid yerinə çevrilib. Müxtəlif dövlətlərin vətəndaşlarının təxliyəsi ölkəmizin beynəlxalq humanitar hüquqa olan hörmətini göstərir. Bununla ölkəmiz həm etibarlı tərəfdaş, həm də xilaskar mövqeyini bir daha nümayiş etdirir.

Azərbaycanın bu mövqeyi qlobal miqyasda böyük maraq və rəğbətlə qarşılanır. Başqa cür desək, Azərbaycanın regional sabitliyə verdiyi töhfə beynəlxalq ictimaiyyət tərəfindən də təqdirəlayiq hal kimi dəyərləndirilir. Təsadüfi deyil ki, fevralın 28-dən etibarən bir çox dövlətin xarici işlər nazirləri ölkəmizin bu istiqamətdəki fəaliyyətini alqışlayıblar. Telefon danışıqları zamanı əcnəbi diplomatlar öz vətəndaşlarının İrandan çıxarılması üçün Azərbaycanın yaratdığı təhlükəsiz tranzit imkanlarına görə dərin minnətdarlıqlarını bildirib, göstərilən operativ köməyini yüksək qiymətləndiriblər.

Azərbaycanın yürütdüyü siyasət qətiyyətli təhlükəsizlik tədbirləri ilə yanaşı, həm də dərin bəşəri dəyərlərə söykənir. Çətin vəziyyətdə qalanlara kömək etmək və onların vətənlərinə sağ-salamat dönməsi üçün keçid imkanı yaratmaq bu ali yanaşmanın bariz nümunəsidir. Bu mənada, İrandan çıxmaq istəyənlər üçün Azərbaycan qurtuluş ünvanına çevrilib. Bu addım həm bəşəri dəyərlərə xidmət edir, həm də Azərbaycanın beynəlxalq arenada mövqelərini möhkəmləndirir.

Azərbaycanın həyata keçirdiyi humanitar fəaliyyət, sadəcə, tranzit imkanlarının yaradılması ilə məhdudlaşmır. Sərhəd-keçid məntəqələrində təşkil olunan operativ xidmətlər, eləcə də müvəqqəti yerləşdirmə imkanları insanların təhlükəsiz şəkildə növbəti istiqamətlərə yola salınmasına şərait yaradır. Bu səbəbdən də bir çox dövlət öz vətəndaşlarının məhz Azərbaycan üzərindən təxliyəsinə ən optimal variant kimi yanaşır.

Ümumiyyətlə, Azərbaycan hər zaman beynəlxalq humanitar təşəbbüslərlə çıxış edir. Müxtəlif regionlarda baş verən təbii fəlakətlər və humanitar böhranlar zamanı ölkəmiz dəfələrlə zərərçəkən dövlətlərə və xalqlara dəstək göstərib. Bu baxımdan, İrandakı proseslər fonunda nümayiş etdirilən mövqe Azərbaycanın bu sahədəki ardıcıl siyasətinin davamıdır.

Bu mövqe həm də dövlətimizin beynəlxalq aləmdə yüksək nüfuzunu təmin edən amillərdən biridir. Çətin geosiyasi şəraitdə humanitar prinsiplərə sadiq qalmaq hər dövlət üçün asan deyil. Lakin Azərbaycan bu istiqamətdə həm qətiyyətli, həm də prinsipial mövqe nümayiş etdirir. Bütün bunlar sübut edir ki, humanizm Azərbaycanın dövlət siyasətinin ayrılmaz tərkib hissəsidir.

Təhminə VERDİYEVA,

Azərbaycan.-2026.- 11 mart (№45).- S.4.