Xarici işlər naziri Gürcüstanda səfərdədir

Azərbaycan Respublikasının xarici işlər naziri Elmar Məmmədyarovun rəhbərlik etdiyi nümayəndə heyəti aprelin 1-də Gürcüstana ikigünlük səfərə gəlmişdir.

Səfər çərçivəsində ölkələrimizin Xarici İşlər nazirlikləri arasında 2009-cu il üçün məsləhətləşmələr planı imzalanmışdır. Sənədi Azərbaycan tərəfdən xarici işlər naziri Elmar Məmmədyarov, Gürcüstan tərəfdən xarici işlər naziri Qriqol Vaşadze imzalamışlar.

Sonra jurnalistlər üçün brifinq keçirilmişdir.

Gürcüstanın xarici işlər naziri azərbaycanlı həmkarı ilə humanitar məsələləri müzakirə etdiklərini bildirmiş və demişdir ki, ölkələrimiz arasında siyasi problem yoxdur, dostluğumuz çoxlarına nümunə göstərilir. Gürcüstan-Azərbaycan strateji tərəfdaşlığına toxunan Q.Vaşadze demişdir ki, Azərbaycan Gürcüstan üçün ağır zamanlarda dəfələrlə əsl dostluq nümunəsi göstərmiş, bizə dəstək vermişdir.

Q.Vaşadze Gürcüstan Prezidentinin və Baş nazirinin Azərbaycana səfərlərinin planlaşdırıldığını və bununla əlaqədar hazırlıq işlərinə başlandığını vurğulamışdır.

Azərbaycanın xarici işlər naziri Elmar Məmmədyarov danışıqların səmərəli keçdiyini, iqtisadi və humanitar sahələrdə əməkdaşlığın daha da genişləndirilməsinə diqqət yetirildiyini bildirmişdir. E.Məmmədyarov demişdir ki, ölkələrimizin prezidentlərinin dostluq münasibətləri işimizi asanlaşdırmaqla yanaşı, üzərimizə fəaliyyətimizi həmin münasibətlər səviyyəsinə qaldırmaq kimi məsul vəzifələr də qoyur. Sonra nazirlər jurnalistlərin suallarını cavablandırmışlar.

Xarici işlər naziri Elmar Məmmədyarov Gürcüstan Prezidenti Mixeil Saakaşvili və Baş nazir Nikolos Gilauri ilə görüşmüşdür. Görüşlərdə Azərbaycanın Gürcüstandakı səfiri Namiq Əliyev iştirak etmişdir.

Aprelin 2-də Azərbaycan nümayəndə heyətinin üzvləri ulu öndər Heydər Əliyevin Tbilisidəki büstü və Gürcüstanın ərazi bütövlüyü uğrunda həlak olanların abidəsi önünə əklillər qoyacaqlar.

İslam Əliyev,

AzərTAc-ın xüsusi müxbiri

Tbilisi

Azərbaycan.-2009.-2 aprel.-S.1.