Bu il sahibkarlara 130 milyon manat güzəştli kredit veriləcək

Bu il dövlət büdcəsindən Sahibkarlığa Kömək Milli Fonduna güzəştli kreditlər üçün 74 milyon manat vəsaitin ayrılması nəzərdə tutulmuşdur.

Ümumilikdə isə fondun xəzinə hesabına qaytarılacaq kredit məbləğləri və kredit faizləri də daxil olmaqla 2009-cu ildə sahibkarlara 130 milyon manat güzəştli kreditin verilməsi proqnozlaşdırılır.

Əvvəla qeyd edək ki, sahibkarlıq subyektləri tərəfindən fonda təqdim edilən investisiya layihələri "Azərbaycan Respublikası Sahibkarlığa Kömək Milli Fondunun vəsaitinin istifadə qaydaları"na uyğun araşdırılır, ətraflı təhlil edildikdən sonra müvafiq rəy fondun müşahidə şurasına təqdim olunur. Müşahidə şurasından müvəkkil kredit təşkilatına müraciət etmək hüququ əldə etmiş sahibkarların investisiya layihələri Sahibkarlığa Kömək Milli Fondunun vəsaitləri hesabına müvəkkil kredit təşkilatları tərəfindən maliyyələşdirilir. Yeri gəlmişkən xatırladaq ki, güzəştli kreditlərin sahibkarlıq subyektlərinə verilməsi müvəkkil kredit təşkilatı kimi seçilmiş 30 kommersiya bankı, 1 bank olmayan kredit təşkilatı və 4 kredit ittifaqı tərəfindən həyata keçirilir.

Xəbər verildiyi kimi, artıq 2009-cu il üçün dövlət büdcəsindən Sahibkarlığa Kömək Milli Fonduna ayrılmış vəsait hesabına müvəkkil kredit təşkilatları vasitəsilə sahibkarlıq subyektlərinə güzəştli kreditlərin verilməsinə başlanmışdır. İndiyədək 200-dən çox sahibkar fondun vəsaitləri hesabına verilmiş güzəştli kreditlərdən yararlanmışdır. Təkcə martın 26-da keçirilmiş tədbir çərçivəsində Aran və Gəncə-Qazax iqtisadi rayonlarında 60 sahibkarlıq subyektinə (Aran iqtisadi rayonu üzrə 34, Gəncə-Qazax iqtisadi rayonu üzrə isə 26 sahibkara) güzəştli kredit verilmişdir. Güzəştli kredit almış sahibkarlar Gəncə şəhəri, Samux, Ağstafa, Goranboy, Göygöl, Şəmkir, Ağcabədi və Bərdə rayonlarında fəaliyyət göstərirlər. Maliyyələşdirilmiş layihələr sənaye və kənd təsərrüfatı məhsullarının istehsalı sahələrini əhatə edir. Bu layihələrin həyata keçirilməsi 100-ə yaxın yeni iş yerinin yaradılmasına imkan verəcək. Ümumilikdə isə 2009-cu ilin ötən dövründə Sahibkarlığa Kömək Milli Fondundan müvəkkil kredit təşkilatları vasitəsilə verilmiş güzəştli kreditlər hesabına 350 yeni iş yerinin açılması nəzərdə tutulur.

Azərbaycan.-2009.-5 aprel.-S.4.