Parlament teleradio fəaliyyətini təkmilləşdirən düzəlişləri təsdiqlədi

Aprelin 3-də keçirilən Milli Məclisin plenar iclası deputatlar tərəfindən cari məsələlərə dair təkliflərin bildirilməsi ilə başladı. İlk söz alan deputat Musa Quliyevin təklifi siqaret çəkilməsinə məhdudiyyət qoyulması ilə bağlı hazırlanan qanun layihəsinin Milli Məclisin yaz sessiyasının gündəliyinə salınması barədə oldu. Onun bildirdiyinə görə, siqaret çəkilməsinə məhdudiyyət qoyulması haqqında qanun ABŞ-da, Avropa Birliyi dövlətlərində, Türkiyə və MDB-nin üzvü olan bəzi ölkələrdə qəbul edilib. Milli Məclisin Sosial siyasət daimi komitəsi artıq bu qanun layihəsini hazırlayıb və əlaqədar dövlət orqanlarının müsbət rəyini alıb. Spiker Oqtay Əsədov bu təklifə müsbət münasibətini bildirdi.

Deputat Vahid Əhmədovun təklifi Qubadakı soyqırımı məzarlığına diqqətin artırılması ilə bağlı oldu. Burada açıq muzeyin yaradılmasının vacibliyini diqqətə çəkən Vahid Əhmədov bu məqsədlə dövlət tərəfindən maliyyə vəsaitinin ayrılmasını məqsədəuyğun hesab etdi.

Deputatlardan İqbal Ağazadə, Qüdrət Həsənquliyev və Zahid Oruc Türkiyə-Ermənistan sərhədlərinin açılmasına dair son vaxtlar yayılan informasiyalardan narahatlıqlarını ifadə etdilər. Qeyd olundu ki, Türkiyə-Ermənistan sərhədlərinin açılması 1991-ci ildən bəri formalaşmış siyasətin yeni müstəviyə keçirilməsi deməkdir. İclasda Milli Məclis deputatlarından ibarət nümayəndə heyətinin Türkiyəyə səfər etməsi, orada siyasətçilər, ictimaiyyət nümayəndələri ilə görüşlər keçirmələri təklif olundu. Həmçinin təklif edildi ki, Milli Məclis Sədri Oqtay Əsədov Türkiyə Böyük Millət Məclisinin Sədrini ölkəmizə dəvət edərək bu məsələdə onu Azərbaycan ictimaiyyətinin mövqeyi ilə tanış etsin.

Bu yaxınlarda Milli Məclis deputatlarının Türkiyəyə səfər edəcəyini, eləcə də Türkiyə Böyük Millət Məclisinin müxtəlif siyasi partiyaları təmsil edən deputatlarının Azərbaycana dəvət olunacaqlarını deyən parlamentin Sədri Oqtay Əsədov bildirdi ki, Türkiyə-Ermənistan sərhədlərinin açılması heç vaxt Azərbaycanın xeyrinə ola bilməz. Biz bu istiqamətdə işləməli və səylərimizi artırmalıyıq.

Deputat Siyavuş Novruzovun çıxışı Konstitusiyaya edilmiş əlavə və dəyişikliklərlə bağlı oldu. Bildirdi ki, referenduma kölgə salmaq istəyənlərin heç birinin əlində fundamental əsas yoxdur. Referendum bir daha xalqımızın həmrəyliyini nümayiş etdirdi.

Spiker Oqtay Əsədov bu məsələyə münasibət bildirərək dedi ki, referendum Azərbaycan xalqının iradəsini bir daha ortaya qoydu. Beynəlxalq müşahidəçilər də ölkəmizdə referendumun yüksək səviyyədə keçirildiyini bildirdilər.

Sonra gündəlikdəki məsələlərin müzakirəsi başladı. Milli Məclis "Azərbaycan Respublikasının Milli Bankı və Amerika Birləşmiş Ştatlarının Beynəlxalq İnkişaf Agentliyi arasında Anlaşma Memorandumu"nu, "Azərbaycan Respublikası hökuməti və Yunanıstan Respublikası hökuməti arasında gəlirlərə və əmlaka görə vergilərə münasibətdə ikiqat vergitutmanın aradan qaldırılması və vergidən yayınmanın qarşısının alınması haqqında" Konvensiyanı, "Azərbaycan Respublikası hökuməti və Yunanıstan Respublikası hökuməti arasında hava əlaqəsi haqqında" Sazişi təsdiq etdi.

Qısa müzakirələrdən sonra Azərbaycan Respublikasının Mülki Məcəlləsinə və "Əmtəə nişanları və coğrafi göstəricilər haqqında" Qanuna təklif edilən əlavələr və dəyişikliklərə müsbət münasibət bildirildi.

Daha sonra "Televiziya və radio yayımı haqqında" qanuna əlavələr və dəyişikliklər edilməsi barədə Azərbaycan Respublikası Qanununun layihəsi haqqında parlamentin Mədəniyyət məsələləri daimi komitəsinin sədri Nizami Cəfərov məlumat verdi. Zaman keçdikcə qüvvədə olan qanuna əlavələr və dəyişikliklərin edilməsi zərurətinin ortaya çıxdığını vurğulayan deputat bu prosesin həyata keçirilməsi vacibliyinə toxundu. Nizami Cəfərov qeyd etdi ki, "Televiziya və radio yayımı haqqında" Qanuna 8 dəyişiklik nəzərdə tutulub. Bu dəyişikliklərin qanunun 10, 11, 23, 35, 37 və 39-cu maddələrinə edilməsi nəzərdə tutulur. Mədəniyyət məsələləri daimi komitəsinin sədri N.Cəfərov bildirdi ki, bu dəyişikliklər həm cəmiyyətin maraqlarını, həm də teleradio-yayım mədəniyyətini və müasir tele-efir məkanının inkişafını nəzərə alır.

Elektron kütləvi informasiya vasitələrinin dünyada mühüm rol oynamasına toxunan deputat Mübariz Qurbanlı televiziya və radionun inkişafında ölkəmizdə də mühüm addımların atıldığını qeyd etdi. Deputat qeyd etdi ki, Azərbaycanda çoxsaylı özəl televiziya kanallarının olması respublikamızda hakimiyyətin, dövlətin bu sahəyə xüsusi diqqət yetirməsinin göstəricisidir. "Televiziya və radio yayımı haqqında" Qanuna təklif olunan əlavələr və dəyişikliklər zəruridir və zamanın tələblərinə uyğundur. Çünki ölkəmiz bu sahədə müəyyən təcrübə toplayıb və vaxtaşırı qanuna zəruri dəyişikliklərin edilməsinin vacibliyi ortaya çıxır. Qanuna təklif edilən dəyişikliklər televiziyanın müasir dövrdəki əhəmiyyətli rolundan irəli gəlir. Dünyanın əksər ölkələrində televiziyalar üzərində ictimai nəzarət mövcuddur. Hətta bir sıra qabaqcıl dövlətlərdəki televiziya verilişlərinin yayımında dilin saflığına xüsusi nəzarət mexanizmi var. Mübariz Qurbanlı qanuna nəzərdə tutulan əlavələrin və dəyişikliklərin Azərbaycanda teleməkanın inkişafına və radio yayımının təkmilləşməsinə xidmət etdiyini dedi.

Deputat Zahid Oruc bildirdi ki, kütləvi informasiya vasitələri Azərbaycan müstəqillik qazandıqdan sonra sürətlə inkişaf etməyə başlayıb. Televiziya məkanının əhəmiyyəti bu dövrdə daha da artıb. Zahid Oruc teleefirdə gedən bəzi reklamların əxlaqi dəyərlərə zidd olduğundan bəhs edərək təkliflərini irəli sürdü. Deputatın fikrincə, bir sıra reklam çarxlarında əxlaqi tələblər kobud şəkildə pozulur. Siyavuş Novruzov "Televiziya və radio yayımı haqqında" Qanuna əlavələrin və dəyişikliklərin edilməsinə tərəfdar olduğunu deyərək televiziya kanallarında islahatların aparılmasının zəruriliyini qeyd etdi.

Parlamentin Regional məsələlər daimi komitəsinin sədri Arif Rəhimzadə Azərbaycan dilinin Konstitusiyada dövlət dili kimi təsbit olunduğunu xatırladaraq xarici teleserialların doğma dilimizdə yayımına tərəfdar olduğunu söylədi. Onun fikrincə, Milli Televiziya və Radio Yayımları Şurasının bununla bağlı qərarı düzgündür və dövlət siyasətini təmin edir. Deputat Fəttah Heydərov qanuna nəzərdə tutulan əlavələrin və dəyişikliklərin mühüm olduğunu qeyd edərək bu məsələnin ictimaiyyətin diqqət mərkəzində olduğunu dedi. Deputat bildirdi ki, kütləvi informasiya vasitələri dövlətimizə, müstəqillik prinsiplərinin möhkəmlənməsinə xidmət etməlidir.

Deputat Qənirə Paşayeva, Jalə Əliyeva, Gülər Əhmədova "Televiziya və radio yayımı haqqında" Qanuna əlavələrin və dəyişikliklərin edilməsinin televiziya kanallarının və radio yayımının fəaliyyətinə problem yaratmayacağını bildirdilər. Qeyd edildi ki, qanunun bəzi maddələrinə nəzərdə tutulan dəyişikliklər vətəndaşların maraqlarına xidmət edən yeniliklərdir.

Azərbaycan Milli Televiziya və Radio Yayımları Şurasının sədri Nuşirəvan Məhərrəmli qeyd etdi ki, qanuna nəzərdə tutulan əlavələr və dəyişikliklər Şuranın fəaliyyəti zamanı rastlaşdığı hallardan sonra zərurət kimi ortaya çıxıb. Odur ki, qanuna əlavələr və dəyişikliklərin edilməsi vacibdir. Qanun layihəsi səsə qoyularaq qəbul edildi.

"Həbs yerlərində saxlanılan şübhəli və ya təqsirləndirilən şəxslərin hüquqlarının və azadlıqlarının təmin edilməsi haqqında" Azərbaycan Respublikası Qanununun (ikinci oxunuş) layihəsi barədə məlumat verən Milli Məclisin Hüquq siyasəti və dövlət quruculuğu daimi komitəsi sədrinin müavini Rövşən Rzayev bir sıra qurumların müzakirəyə çıxarılan layihə üzərində uzun müddət çalışdıqlarını dedi. ATƏT-in Bakı ofisinin ekspert qrupu qanun layihəsinin təkmilləşdirilməsi ilə bağlı öz tövsiyələrini verib. Layihədə bir sıra terminlər dəyişdirilib.

Deputat Elmira Axundova qanun layihəsinin aktual olduğunu, müfəssəl hazırlandığını və layihənin məhkum olunmuş şəxslərin hüquqlarını və eyni zamanda vəzifələrini müəyyənləşdirdiyini dedi. Deputat Rafael Cəbrayılov da qanun layihəsinin müasir dövrdə aktual olduğunu bildirdi. Deputat qeyd etdi ki, birinci oxunuşdan sonra layihənin üzərində mühüm işlər aparılıb. Deputat Gövhər Baxşəliyeva layihədə bütün məsələlərin əhatə olunduğunu vurğulayaraq qanun layihəsinə müsbət münasibət bildirdi. İclasda qanun layihəsi səsə qoyularaq təsdiq edildi.

Azərbaycan.-2009.-4 aprel.-S.2.