"İpək yolu" beynəlxalq turniri başa çatdı

Bakıda boks üzrə II Beynəlxalq "İpək yolu" yarışı başa çatmışdır. Turnirdə 11 çəki dərəcəsində Azərbaycanla yanaşı, Rusiya, Türkiyə, Bolqarıstan, İran, Gürcüstan və Qazaxıstandan 99 idmançı mübarizə aparmışdır.

Sevindirici haldır ki, ölkəmizi təmsil etmiş bütün boksçular yarışlarda böyük əzmkarlıq və ustalıq nümayiş etdirmişlər. Nəticədə 7 boksçumuz turnirin qalibi olmuşdur. Həlledici görüşlərdə 48 kq çəki dərəcəsində Elvin Məmişzadə qazaxıstanlı Adlet Kəpəzovu (14:12), Nihat Seyidov (51 kq) digər qazaxıstanlı Anuarbek Bayjanovu (9:3), Rəhim Nəcəfov (54 kq) Samir Məmmədovu (11:9), Ruslan Qasımov (60 kq) qazaxıstanlı Yerjan Musafirovu (8:5), Ramal Amanov (64 kq) Sadiq Eynullayevi (6:4), Emil Məhərrəmov (69 kq) Türkiyə boksçusu Sipal Öndəri, Elçin Əlizadə (91 kq) qazaxıstanlı Vasili Leviti 5:4 hesabı ilə məğlubiyyət uğradaraq qızıl medala layiq görülmüşlər.

Digər çəki dərəcələrində Denislam Şabanov (Rusiya, 57 kq), Adilbek Niyazumbetov (Qazaxıstan, 75 kq), Ramazan Maqomedov (Bolqarıstan, 81 kq) və qazaxıstanlı İvan Diçko (91 kq-dan yuxarı) yarışların qalibi olmuşlar.

Finalda məğlub olmuş Samir Məmmədov (54 kq), Sadiq Eynullayev (64 kq), Rahib Bəylərov (75 kq), Hafiz İsgəndərov (81 kq) və Asim İsgəndərov (91 kq-dan yuxarı) gümüş medala sahib çıxmışlar.

Digər boksçularımız Aslan Tlatov (57 kq), Emin Məmmədov (60 kq), Rəhman Mustafaoğlu (69 kq), Qərib Orucov (81 kq) və Azər Məmmədov (91 kq) bürünc medallar qazanmışlar.

Azərbaycan.-2009.-4 aprel.-S.8.