Bakı şəhərində
Nəqliyyat əməliyyatlarının
intellektual idarə edilməsi sisteminin inzibati binasının təməli qoyulmuşdur
Aprelin 6-da Bakı şəhərində Nəqliyyat əməliyyatlarının intellektual idarə edilməsi sisteminin inzibati binasının təməli qoyulmuşdur.
Azərbaycan Prezidenti İlham Əliyev mərasimdə iştirak etmişdir.
Dövlətimizin başçısı İlham Əliyevin Koreya Respublikasına rəsmi səfəri zamanı əldə olunan razılaşmaya əsasən, 2007-ci ilin aprelində Azərbaycan Nəqliyyat Nazirliyi ilə Cənubi Koreyanın Tikinti və Nəqliyyat Nazirliyi arasında intellektual nəqliyyat sistemi sahəsində əməkdaşlığa dair Anlaşma memorandumu imzalanmışdır. 2008-ci ilin mayında isə Nəqliyyat Nazirliyi və Koreya Respublikasının "SK C & C Co.Ltd." şirkəti Bakı şəhərində Nəqliyyat əməliyyatlarının intellektual idarə edilməsi sisteminin (İNS) yaradılması haqqında satınalma müqaviləsi bağlamışdır. Həmin sənədlərə əsasən, şirkət İNS-in layihəsini hazırlayaraq, Azərbaycan tərəfinə təqdim etmişdir. Müasir texnologiyanın ən son nailiyyətlərinin tətbiqi nəzərdə tutulan İNS vasitəsilə paytaxtda və Abşeron yarımadasının bir hissəsində avtonəqliyyat vasitələrinin, o cümlədən marşrut xətlərində avtobusların, taksilərin hərəkətinin idarə olunmasına nəzarət, tıxacların aradan qaldırılmasına yardım və digər məsələlər həyata keçiriləcəkdir.
Prezident İlham Əliyev əvvəlcə inzibati binanın maketinə baxdı. Sonra dövlətimizin başçısına binanın layihəsi haqqında ətraflı məlumat verildi. Bildirildi ki, tikinti sahəsi 2500 kvadratmetr olacaq beşmərtəbəli binada qəbul, mühafizə, avadanlığı idarəetmə, elektrik təchizatı, UPS, nəqliyyat əməliyyatlarına nəzarət, server, serverləri idarəetmə, təlim və konfrans, media yayım otaqları və yeməkxana yerləşəcəkdir. İnşaat işlərində Yaponiya, Belçika, İtaliya və Türkiyədə istehsal olunmuş müxtəlif növ tikinti materiallarından istifadə olunacaqdır. Tikinti-quraşdırma işlərinin gələn ilin mayında yekunlaşması nəzərdə tutulur.
Prezident İlham Əliyevə İNS-in funksiyaları haqqında da ətraflı məlumat verildi. Bildirildi ki, layihənin əsas funksiyalarına ictimai nəqliyyatı idarəetmə sistemi, tıxacların qarşısının alınması, nəqliyyatın hərəkəti üzrə məlumat mənbələri, elektron kart ödəmə sisteminin, elektron naviqasiya sisteminin tətbiqi, parklamanın, fövqəladə hallar zamanı şəhər nəqliyyatının idarə olunmasının təşkili, nəqliyyatın hərəkəti üzrə informasiyanın yığılması, təhlili, məlumatların ötürülməsi və göstərişlərin verilməsi sistemi daxildir.
İlkin mərhələdə Bakı şəhərini əhatə edəcək İNS-in gələcəkdə Abşeron yarımadası, daha sonra respublikanın digər regionları istiqamətində genişləndirilməsi məqsədi ilə Xırdalan, Binəqədi qəsəbəsi, Heydər Əliyev adına Beynəlxalq Hava Limanı, Zığ və Lökbatan dairələrində komutasiya çıxışlarının yaradılması planlaşdırılır. Bu sistemin məlumatları həm TV, həm də radionun imkanlarından istifadə olunmaqla yayımlanacaqdır. Bunun üçün ayrıca radiokanal və telekanal tezlikləri alınması nəzərdə tutulur. Həmçinin, mobil telefonlar vasitəsilə də şəhərin küçələrində nəqliyyatın hərəkət vəziyyətini öyrənmək mümkün olacaqdır.
Dövlətimizin başçısı nəqliyyatın axını barədə məlumatı əks etdirəcək tablonun seqmenti, avtobus dayanacaqlarındakı informasiya terminalı və avtobusların daxilində quraşdırılacaq CPS qəbuledicisinin nümunələri ilə tanış oldu.
Bildirildi ki, birinci mərhələsi 2011-ci ilin aprelinədək həyata keçirilməsi nəzərdə tutulan layihənin ilkin dəyəri 76,5 milyon ABŞ dollarına bərabərdir. Azərbaycanda tətbiq ediləcək İNS istifadə olunacaq texnologiyaların və texniki vasitələrin müasirliyi baxımından Koreya Respublikasındakı sistemləri üstələyəcəkdir.
Prezident İlham Əliyev gilizi təmələ qoydu və beton qarışığı tökdü.
Yeni yaradılacaq sistemin paytaxtın nəqliyyat sahəsindəki problemlərinin aradan qaldırılmasına müsbət təsir edəcəyini bildirən dövlətimizin başçısı tikinti ilə əlaqədar tapşırıq və tövsiyələrini verdi, inşaatçılara uğurlar arzuladı.
AzərTAc
Azərbaycan.-2009.-7 aprel.-S.1.