Ölkənin turizm mərkəzlərindən birinə çevrilmək imkanı olan Oğuzda bu istiqamətdə real addımlar atılır

Təkcə Prezident İlham Əliyev son 3 ildə Oğuzda 14 obyektin açılışında və təməlqoyma mərasimlərində iştirak etmişdir. Digər fakt: regionların sosial-iqtisadi inkişafına dair Dövlət Proqramının icrası başlanandan bu ilin yanvarınadək Oğuzda 10832 yeni iş yeri açılmışdır. Bunun 2612-si daimidir. Ötən bir il ərzində isə rayonda 556-sı daimi olmaqla 1229 yeni iş yeri yaradılmışdır.

Aparılan genişmiqyaslı tikinti-quruculuq və abadlıq işləri rayona gələn hər kəsin diqqətini cəlb edir. RİH-in başçısı Aydın Əlihüseynovun sözlərinə görə, Oğuz şəhərinin tam inkişafı üçün şəhərsalma planı üzrə iş görülür. Həm qədim, həm də müasir şəhərsalma üslubundan istifadə edilməklə mütəxəssislərin birgə rəyi əsasında hazırlanan planın yaxın vaxtlarda icrasına başlanacaq.

Oğuz həm də böyük turizm potensialına malikdir. Prezident İlham Əliyev oğuzlularla görüşündə bu məqamı xüsusi vurğulayaraq qeyd etmişdir ki, turizmin inkişafı Oğuzun gələcək inkişafına müsbət təsirini göstərəcək. Bu sahəyə xüsusi diqqət yetirdiklərini bildirən A.Əlihüseynov bizimlə söhbətində bildirdi ki, rayonun turizm mərkəzinə çevrilməsi üçün Prezidentin qarşıya qoyduğu vəzifələrin icrası baxımından müəyyən işlər görülmüşdür. İlk növbədə turizm sahəsində infrastrukturun yaradılması ilə bağlı rayonda dövlət, eləcə də iş adamları və özəl qurumlar tərəfindən mühüm tədbirlər həyata keçirilmişdir. Hazırda Oğuz şəhərində, Calut və Xalxal kəndləri ərazisində yeni turizm obyektləri tikilir. Təkcə Oğuz ətrafında yaradılacaq turizm obyektləri üçün 15 milyon manatdan çox sərmayə qoyulması nəzərdə tutulmuşdur.

A.Əlihüseynov onu da vurğuladı ki, Oğuz-Qəbələ-Bakı su kəmərinin çəkilişi ilə əlaqədar qazılmış artezian quyularının layihə tamamlanandan sonra rayon əhalisinin istifadəsinə verilməsi məsələsi də artıq həll edilmişdir. Məlum həqiqətdir ki, turizmin inkişafında vacib amillərdən biri də içməli su məsələsidir. Bu baxımdan rayonda Nazirlər Kabineti və "Azərsu" Səhmdar Cəmiyyətinin xətti ilə müəyyən işlər görülmüş Yaqublu, Zərrab, Şirvanlı, Xaçmaz, Padar, Sincan, Buxaz, Calut kəndlərində 14 artezian quyusu qazılmış, Böyük Söyüdlü kəndinə 29 km uzunluğunda su xəttinin yenidən çəkilməsi bu ilin planına salınmışdır.

Cənubi Qafqazda bənzəri olmayan Qlükoza zavodu Oğuzda tikilir. Dəyəri 12 milyon ABŞ dolları olan zavod tam gücü ilə işləməyə başlayanda burada 80 ton qarğıdalı emal ediləcək və ondan qida sənayesi üçün 50 tona yaxın qlükoza istehsal olunacaq. Bundan əlavə, qarğıdalı emalı kompleksində 50 nəfər işçi çalışacaq və istehsalın həcmi artdıqca işçilərin sayı 200 nəfərə çatacaq. İlkin mərhələdə texnoloji prosesə nəzarət edəcək türkiyəli mütəxəssisləri sonralar yerli mütəxəssislər əvəzləyəcək. Və nəhayət, rayon iqtisadiyyatının inkişafında müəssisə mühüm rol oynayacaq.

Uzun illər rayon əhalisinin çörəyə olan tələbatı Şəki, Qəbələ və digər rayonlar tərəfindən ödənilirdi. Artıq bu asılılıq aradan qaldırılmış, Oğuzda sutkalıq istehsal gücü 5 ton olan çörək və çörək məmulatları sexi tikilib istiadəyə verilmişdir.

Oğuz şəhərinin su və kanalizasiya probleminin həllinə də start verilib. Belə ki, ötən ilin ortalarında Dünya Bankının maliyyə dəstəyi ilə reallaşan "Milli su təchizatı və kanalizasiya xidmətləri" layihəsi çərçivəsində Oğuzun, eləcə də Şamaxı, Qəbələ və Zaqatalanın su və kanalizasiya sistemlərinin yenidən qurulması ilə bağlı sənəd imzalandı. Ümumi dəyəri 310 milyon dollar olan (onun 230 milyonunu Dünya Bankı, qalanını isə Azərbaycan hökuməti ödəyəcək) layihənin reallaşmasına bu il başlanması nəzərdə tutulur.

Telman Nəzərli

Azərbaycan.-2009.-7 aprel.-S.5.