Avropa çempionatında böyük uğurlar qazanmış Azərbaycan güləşçiləri Heydər Əliyev adına Beynəlxalq Hava Limanında təntənə ilə qarşılanmışlar

Vilnüsdə sərbəst, yunan-Roma və qadın güləşi üzrə Avropa çempionatında iştirak etmiş Azərbaycan idmançıları aprelin 6-da vətənə qayıtmışlar. Heydər Əliyev adına Beynəlxalq Hava Limanında güləşçilərimizi onların ailə üzvləri, idman ictimaiyyətinin nümayəndələri, paytaxt sakinləri böyük təntənə ilə, gül-çiçəklə, musiqi sədaları ilə qarşılamışlar.

Sərbəst güləş üzrə yığma komandamızın böyük məşqçisi Firdovsi Umudov sevincini jurnalistlərlə bölüşmüşdür: Komandamız bu yaxınlarda İranda dünya Kuboku turnirinin qalibi oldu. Avropa çempionatında biz bu adı qoruyub saxlamağa çalışdıq. Dünyanın ən güclü komandalarından olan Rusiya yığmasını qabaqlayaraq birinci yeri tutduq. Bizim uğurlarımız bizə yaradılan yüksək şəraitin, diqqət və qayğının nəticəsidir.

İdmançılarımız maşın karvanının müşayiəti ilə hava limanından birbaşa Heydər Əliyev adına Sarayın qarşısındakı parka gələrək, müstəqil dövlətimizin memarı və qurucusu, Azərbaycanda bədən tərbiyəsi və idmanın inkişafına, gənc nəslin sağlam və vətənpərvərlik ruhunda böyüməsinə daim böyük diqqət və qayğı göstərmiş ulu öndərin xatirəsini ehtiramla anmış, onun abidəsi önünə gül dəstələri qoymuşlar.

Azərbaycan.-2009.-7 aprel.-S.7.