Azərbaycan Prezidenti İlham Əliyev Litvanın xarici işlər naziri Viqaudas Uşatskasın başçılıq etdiyi nümayəndə heyətini qəbul etmişdir

Azərbaycan Respublikasının Prezidenti İlham Əliyev aprelin 7-də Litvanın xarici işlər naziri Viqaudas Uşatskasın başçılıq etdiyi nümayəndə heyətini qəbul etmişdir.

Dövlətimizin başçısı Azərbaycanla Litva arasında ikitərəfli münasibətlərin müxtəlif sahələrdə uğurla inkişaf etdiyini vurğuladı. Litvanın xarici işlər nazirinin Azərbaycana səfərinin əhəmiyyətinə toxunan Prezident İlham Əliyev əminliklə bildirdi ki, bu səfər daim genişlənməkdə olan ikitərəfli münasibətlərin daha da möhkəmlənməsinə öz töhfəsini verəcəkdir.

Bakıya ilk dəfə səfər etdiyini deyən Viqaudas Uşatskas paytaxtımızın nümayəndə heyətində xoş təəssürat doğurduğunu söylədi. Bakının islam mədəniyyətinin paytaxtı, Vilnüsün isə Avropa mədəniyyətinin paytaxtı olduğunu bildirən qonaq bunun mədəni əlaqələrimizin daha da genişlənməsinə xidmət edəcəyini vurğuladı.

AzərTAc

Azərbaycan.-2009.-8 aprel.-S.1.