AHİK Türkiyə-Ermənistan sərhədlərinin açılmasına dair məlumatlarla bağlı Türkiyə həmkarlar ittifaqları mərkəzlərinə müraciət qəbul etmişdir

Aprelin 13-də Azərbaycan Həmkarlar İttifaqları Konfederasiyasında (AHİK) Türkiyə-Ermənistan sərhədlərinin açılması barədə yayılan məlumatlarla əlaqədar yığıncaq keçirilmişdir.

Tədbirdə AHİK Türkiyə-Ermənistan sərhədlərinin açılmasına dair müzakirələrlə bağlı Türkiyə Cümhuriyyəti həmkarlar ittifaqları mərkəzlərinə müraciət qəbul etmişdir.

AHİK-nın sədri, Milli Məclisin deputatı Səttar Mehbalıyev çıxış edərək demişdir ki, Türkiyənin Ermənistanla sərhədlərinin açılması ilə bağlı xəbərlər Azərbaycan ictimaiyyətini narahat edir. Yalnız Ermənistanın işğal etdiyi Azərbaycan əraziləri azad edildikdən sonra sərhədlərin açılmasından söhbət gedə biləcəyini vurğulayan S.Mehbalıyev bildirmişdir ki, biz Türkiyənin bir sıra həmkarlar ittifaqları mərkəzlərinə müraciət edirik. Onlar öz hökumətlərinə təsir göstərsinlər və sərhədlərin açılmasına imkan verməsinlər. Biz bu barədə müəyyən təşkilatlarla da danışıqlar aparmışıq.

S.Mehbalıyev xatırlatmışdır ki, Ermənistan təkcə Azərbaycana deyil, Türkiyəyə qarşı da torpaq iddiası ilə çıxış edir, qondarma "soyqırımı" iddiasından əl çəkmir. Məhz buna görə də, sərhədlərin açılması separatçı erməni rejiminin güclənməsinə xidmət edəcəkdir.

Mədəniyyət İşçiləri Müstəqil Həmkarlar İttifaqı Respublika Komitəsinın sədri Cəmilə Səttarova, Azərbaycan Dövlət Dəmir Yolu Müstəqil Həmkarlar İttifaqı Komitəsinın sədri Fəzail Bağırov, Avtomobil Nəqliyyatı və Yol Təsərrüfatı İşçiləri Həmkarlar İttifaqı Respublika Komitəsinın sədri Etibar Əliyev və başqaları Türkiyə-Ermənistan sərhədlərinin açılmasının yolverilməz olduğunu demişlər.

AHİK-nın Türkiyə Cümhuriyyəti həmkarlar ittifaqları mərkəzlərinə müraciəti aşağıda dərc olunur.

Azərbaycan.-2009.-14 aprel.-S.2.