Azərbaycan dövləti Xəzərin ekoloji problemlərinin həllini öz siyasətinin prioritet istiqamətlərindən biri hesab edir

Azərbaycan Respublikasının qoşulduğu beynəlxalq konvensiyalara uyğun olaraq Dövlət Dəniz Administrasiyasının Beynəlxalq Dəniz Təşkilatı ilə birgə keçirdiyi seminarda bu qurumların ekspertləri ilə yanaşı Xəzəryanı ölkələrin - Qazaxıstan, Türkmənistan, İran İslam Respublikası və Rusiya Federasiyasının nümayəndələri də iştirak etmişlər.

Əsas məqsədi beynəlxalq dəniz daşımaları zamanı ətraf mühitin mühafizəsi, gəmilər tərəfindən dənizin çirklənməsinin qarşısının alınması və dəniz bioloji mühitinin qorunub saxlanması üzrə təcrübə mübadiləsinin aparılması və bu sahədəki mövcud hüquqi bazanın təkmilləşdirilməsi olan seminara Azərbaycan Respublikası Fövqəladə Hallar, Nəqliyyat, Ekologiya və Təbii Sərvətlər nazirliklərinin, Dövlət Xəzər Dəniz Gəmiçiliyinin, Bakı Beynəlxalq Dəniz Ticarət Limanının, Xəzər Dəniz Neft Donanmasının və digər müvafiq qurumların nümayəndələri də qatılmışdılar.

Dövlət Dəniz Administrasiyasının rəisi Qüdrət Qurbanov beynəlxalq seminar iştirakçılarını salamlayaraq əsası ümummilli lider Heydər Əliyev tərəfindən qoyulan və ölkə rəhbəri cənab İlham Əliyev tərəfindən uğurla davam etdirilən iqtisadi islahatlar kontekstində dəniz nəqliyyatı sahəsində son illər qazanılan uğurlardan söz açmışdır. O diqqətə çatdırmışdır ki, regionun lider dövləti kimi qəbul edilən, beynəlxalq nüfuzu ilə seçilən Azərbaycan 1995-ci il mayın 15-dən Beynəlxalq Dəniz Təşkilatının üzvüdür. Dövlət Dəniz Administrasiyasının mütəxəssisləri Beynəlxalq Dəniz Təşkilatının bütün regional seminar və kurslarında respublikamızı layiqincə təmsil edirlər.

Qüdrət Qurbanov bildirmişdir ki, gəmilərin dənizi çirkləndirməsi ilə əlaqədar meydana çıxan problemlərin həlli, eləcə də bu sahəyə nəzarətin həyata keçirilməsi üçün normativ hüquqi bazanın yaradılması zərurəti Dənizin Çirkləndirilməsinin Qarşısının Alınmasına dair Beynəlxalq Konvensiyanın qəbuluna stimul olmuşdur. Konvensiyanın mahiyyəti qlobal mənada çox genişdir. Bu mühüm sənəd dənizin çirkləndirilməsinin qarşısının alınmasına yönəlmiş beynəlxalq nəzarəti və bu sahədə gələcəkdə görüləcək tədbirləri ehtiva etməklə dəniz mühitinin qorunması ilə əlaqədar digər normativ hüquqi aktlarla yanaşı operativ və effektiv nəzarət və tənzimləmə fəaliyyətinə çevrilmişdir. Məhz adıçəkilən beynəlxalq konvensiyanın xüsusiyyətləri və onun nizamladığı sahənin aktuallığı nəzərə alınaraq hazırkı seminarın Beynəlxalq Dəniz Təşkilatı ilə birlikdə keçirilməsi qərara alınmışdır. Bu da öz növbəsində dəniz nəqliyyatının və ətraf mühitin təhlükəsizliyinin Liman dövləti və Bayraq dövləti olaraq zəngin dənizçilik tarixinə malik Azərbaycan üçün prioritet istiqamətlər olduğunun əyani sübutudur.

Seminar iştirakçılarının nəzərinə çatdırılmışdır ki, müstəqillik dövründə dövlətimiz tərəfindən Beynəlxalq Dəniz Təşkilatının ratifikasiya edilmiş 23 müxtəlif konvensiya və protokolunun icrasına nəzarət ölkə başçısının müvafiq sərəncamı ilə təsdiq edilmiş Əsasnaməyə uyğun olaraq dəniz nəqliyyatı sahəsində müvafiq icra hakimiyyəti orqanı olan Dövlət Dəniz Administrasiyasına həvalə edilmişdir.

Azərbaycan Respublikası Nazirlər Kabinetinin nəqliyyat və rabitə şöbəsinin müdiri Aydın Məmmədov Xəzərin ekoloji problemləri ilə bağlı həyata keçirilən tədbirlərdən danışmış, Dövlət Dəniz Administrasiyasının beynəlxalq qurumlarla əməkdaşlığının böyük faydalar verdiyini diqqətə çatdırmışdır.

Seminarda çıxış edən Beynəlxalq Dəniz Təşkilatının eksperti Jose Matheicikan, Xəzəryanı ölkələrin nümayəndə heyətlərinin rəhbərləri bu mühüm tədbirin Azərbaycanda keçirilməsinin əhəmiyyətini vurğulamış, qarşıda duran təxirəsalınmaz vəzifələrdən, qarşılıqlı əməkdaşlığın daha da genişləndirilməsi zəruriyyətindən söz açmışlar.

Beynəlxalq seminar aprelin 17-dək davam edəcək. Sonda iştirakçılara sertifikatlar təqdim olunacaqdır.

Akif Cabbarlı

Azərbaycan.-2009.-15 aprel.-S.5.