Görkəmli oftalmoloq alim, akademik Zərifə xanım Əliyevanın xatirəsi silsilə tədbirlərlə anılmışdır

Aprelin 15-i görkəmli oftalmoloq alim, akademik Zərifə xanım Əliyevanın xatirəsini anım günüdür. 1985-ci ilin bu bahar günündə dünyasını dəyişən, parlaq amalların, nəcib duyğuların, tükənməz həyat eşqinin təcəssüm tapdığı bir ömür yaşayan Zərifə xanımın nurlu xatirəsi qədirbilən xalqımız tərəfindən hər il ehtiramla anılır.

Yeni Azərbaycan Partiyasının (YAP) Nəsimi rayon təşkilatı əziz və unudulmaz Zərifə xanım Əliyevanın xatirəsini anma günündə bir sıra tədbirlər keçirmişdir.

Təşkilatın nümayəndələri əvvəlcə Fəxri xiyabana gələrək görkəmli oftalmoloq alim, akademik Zərifə xanım Əliyevanın xatirəsini ehtiramla yad etmiş, məzarı üzərinə əklil qoymuşlar.

Ümummilli lider Heydər Əliyevin xatirəsi də anılmış, məzarı önünə gül dəstələri düzülmüşdür.

Sonra YAP Nəsimi rayon təşkilatının qərargahında Azərbaycan Tibb Universitetinin (ATU) oftalmologiya ixtisası üzrə təhsil alan yuxarı kurs tələbələrinin akademik Zərifə xanım Əliyevanın xatirəsinə həsr edilmiş müsabiqəsi ilə bağlı tədbir keçirilmişdir.

YAP Nəsimi rayon təşkilatının sədri, Milli Məclisin deputatı Məlahət Həsənova Zərifə xanım Əliyevanın oftalmologiya elminin inkişafındakı xidmətlərindən söz açmışdır. M.Həsənova demişdir ki, Zərifə xanım Əliyevanın zəngin elmi irsi, oftalmologiyanın müxtəlif sahələri üzrə apardığı tədqiqatlar, qazandığı nailiyyətlər, yaratdığı fundamental əsərlər Azərbaycan tibb elminin tarixinə parlaq səhifələr kimi yazılmışdır. Bu müsabiqəni keçirməkdə məqsədimiz Zərifə xanımın elmi irsinin öyrənilməsinə və təbliğinə kömək etməkdir. Tələbə oftalmoloqlar "Zərifə xanım və Azərbaycan oftalmologiyası" mövzusunda yazıları ilə müsabiqədə iştirak edə bilərlər. Müsabiqəyə aprelin 28-də akademik Zərifə xanım Əliyevanın doğum günündə yekun vurulacaqdır. I və II yeri tutan tələbələr bir ay müddətinə Türkiyənin yüksək səviyyəli klinikalarında təcrübəyə göndəriləcəklər. Digər qaliblərə mükafatlar veriləcəkdir.

Tədbirdə çıxış edən YAP Nəsimi rayon təşkilatı qadınlar şurasının sədr müavinləri Ruhəngiz Heydərova və Zərifə Quliyeva bildirmişlər ki, akademik Zərifə xanım Əliyevanın fitri istedada malik novator alim, pak və nəcib bir insan kimi yaşadığı mənalı ömür yolu hər bir Azərbaycan vətəndaşı, hər bir alim və həkim üçün həyat və mənəviyyat dərsi, kamillik və müdriklik məktəbidir. Onlar əmin olduqlarını bildirmişlər ki, tələbə oftalmoloqlar Zərifə xanım Əliyevanın xatirəsinə həsr olunmuş müsabiqədə fəal iştirak edəcəklər.

Daha sonra YAP Nəsimi rayon təşkilatının üzvləri Bilgəhdəki müharibə və əmək əlilləri üçün pansionatda xeyriyyə aksiyası keçirmişlər. Pansionatda yaşayan 170 nəfər tibbi müayinədən keçirilmiş, onlar üçün ehsan süfrəsi açılmışdır.

Məlahət Həsənova bildirmişdir ki, bu aksiya Zərifə xanımın anım günü münasibətilə keçirilən silsilə tədbirlərdən biridir. Ölkəmizdə son illər əhalinin sosial-iqtisadi vəziyyətinin yaxşılaşdırılması ilə bağlı görülən tədbirlərdən danışan M.Həsənova ahılların rifahının yüksəldilməsi istiqamətində mühüm addımların atıldığını diqqətə çatdırmışdır.

Qadınlar şurası sədrinin müavini, Bakı Şəhər Səhiyyə Baş İdarəsinin rəisi Leyla Seyidbəyova vurğulamışdır ki, tibbi müayinəni Sabunçu rayon səhiyyə ocaqlarının həkimləri həyata keçirmiş, xəstələrə müalicə təyin etmişlər.

AzərTAc

Azərbaycan.-2009.-16 aprel.-S.2.