Bakıda Azərbaycan-Latviya biznes-forumu keçiriləcək

Tədbir Latviyanın xarici işlər naziri Maris Riekstinışın Azərbaycana səfəri çərçivəsində reallaşacaq.

Səfər zamanı M.Riekstinışın Azərbaycanın xarici işlər naziri Elmar Məmmədyarov, iqtisadi inkişaf naziri Şahin Mustafayev və digər rəsmi şəxslərlə görüşləri nəzərdə tutulur. Görüşlərdə iki ölkə arasında siyasi və iqtisadi əlaqələr, hökumətlərarası komissiyanın növbəti iclasının gündəliyi, eləcə də bu ilin ortalarında Latviya Prezidenti Valdis Zatlersin Azərbaycana planlaşdırılan səfəri ilə bağlı məsələlər müzakirə olunacaq.

Səfər çərçivəsində, həmçinin Azərbaycan-Latviya biznes-forumu keçiriləcək. Latviya xarici işlər nazirinin də qatılacağı tədbirdə hər iki ölkənin müvafiq qurumlarının nümayəndələri və iş adamları iştirak edəcəklər. Biznes-forumda Azərbaycanla Latviya arasında iqtisadi əməkdaşlığın perspektivləri müzakirə olunacaq və iş adamlarının ikitərəfli görüşləri keçiriləcək.

Azərbaycan.-2009.-16 aprel.-S.14.