Bu gün Bakıda turizm üzrə iki beynəlxalq sərgi açılır

Bu gün Heydər Əliyev adına Sərgi və Konsert Kompleksində 8-ci Azərbaycan beynəlxalq "Turizm və səyahətlər - 2009" və 3-cü Qafqaz beynəlxalq "Mehmanxana, restoran və super marketlər üçün avadanlıq və ləvazimatlar" sərgiləri açılır.

Bu münasibətlə keçirilən mətbuat konfransında öncə çıxış edən Mədəniyyət və Turizm Nazirliyinin nümayəndəsi Aydın İsmayılov bildirdi ki, "Turizm və səyahətlər - 2009" sərgisində dünyanın 20 ölkəsindən 78 şirkət iştirak edəcək. Onların təxminən 35 faizi yerli şirkətlərdir. Qəbələ, Nabran, Quba, Lənkəran və başqa regionların hotelləri, həmçinin Abşeron zonasının mehmanxana şəbəkələri sərgidə geniş təmsil olunacaq. Bunlardan əlavə, ənənəvi olaraq sərgidə Qarabağ stendi təqdim ediləcək. Stendin təşkilatçısı Mədəniyyət və Turizm Nazirliyidir.

A.İsmayılovun sözlərinə görə, builki sərginin daha maraqlı olacağı gözlənilir. Səbəbi sərginin islam dövlətlərinin mədəni birləşməsi şüarı altında keçirilməsidir. Üstəlik, Bakı islam mədəniyyətinin paytaxtı elan edilib. Bu münasibətlə sərgiyə İSESKO-ya üzv olan ölkələr dəvət olunub. Təşkilatın birləşmiş stendi çərçivəsində İordaniya, Birləşmiş Ərəb Əmirlikləri, Malayziya, İndoneziya və İraq milli stendləri ilə çıxış edəcəklər. Eyni zamanda, sərginin sponsoru kimi çıxış edən Türkiyənin də milli stendi var. Sərgidə İsveçrə, İtaliya, Tailand və Çin kimi turizm sahəsində uğurlar qazanmış ölkələrlə yanaşı, Çexiya və Ukrayna da öz potensiallarını iştirakçılara və ziyarətçilərə nümayiş etdirmək imkanı qazanacaqlar.

Nazirliyin rəsmisi Azərbaycanda 2008-2017-ci illər üçün nəzərdə tutulmuş və uğurla həyata keçirilən turizmin inkişafına dair Dövlət Proqramına toxunaraq vurğuladı ki, hazırda ölkəmizdə rəqabətli bazarın yaradılması, ponsionat və mehmanxanaların maddi-texniki bazasının gücləndirilməsi, habelə onların səviyyəsinin beynəlxalq standartlara çatdırılması istiqamətində müəyyən işlər görülür. Bu sərgilər isə Azərbaycanın turizm biznesinin sərhədlərinin genişləndirilməsinə geniş imkanlar yaradacaq.

Sonra "İteca Caspian" şirkətinin direktoru Fərid Məmmədov "Mehmanxana, restoran və supermarketlər üçün avadanlıq və ləvazimatlar" sərgisi barədə məlumat verdi. Direktor qeyd etdi ki, sərgidə İtaliya, Almaniya, Türkiyə, Azərbaycan, Rusiya Ukraynadan 20 şirkət iştirak edəcək. Ekspozisiyaların assortimentinə mətbəx avadanlıqları, hamam otaqları üçün kosmetik aksesuarlar, supermarketlər üçün soyuducu və anbar avadanlıqları, peşəkar camaşırxanalar, məişət kimyası və s. daxildir.

Mətbuat konfransının sonunda KİV nümayəndələrini maraqlandıran çoxsaylı suallar cavablandırıldı.

Azərbaycan.-2009.-16 aprel.-S.14.