Latviyanın xarici işlər naziri Maris Riekstinşin başçılıq etdiyi nümayəndə heyəti Səngəçal neft terminalında olmuşdur

Azərbaycanda səfərdə olan Latviyanın xarici işlər naziri Maris Riekstinşin başçılıq etdiyi nümayəndə heyəti Səngəçal neft terminalında olmuşdur.

Xəzər Enerji Mərkəzindən başlanmış tanışlıq zamanı terminalın rəhbərləri qonaqlara mərkəz barədə ətraflı məlumat vermişlər.

Qonaqlar karbohidrogenlərin yaranması, kəşfiyyatı, hasilatı, nəqli, emalı və digər məsələləri əhatə edən zəngin eksponatlara, kosmosdan çəkilmiş nadir görüntülərə, eləcə də ölkəmizin neft-qaz sənayesi haqqında dolğun məlumatları əks etdirən şəkillərə, qlobal enerji layihələri haqqında slaydlara maraqla baxmışlar.

Bildirilmişdir ki, inşasına 2001-ci ildən başlanmış terminalda tutumu 880 min barrel olan 3 xam neft çəni, baş nasos stansiyası, separatorlar, emal qurğuları və idarəetmə məntəqəsi vardır. Buraya fiberoptik rabitə kabelləri, sahildən 187 kilometr aralıda yerləşən dəniz yataqlarından sualtı neft və qaz kəmərləri çəkilmişdir.

Latviyalı qonaqlar avtobusla terminalın ərazisini gəzmiş, onlara buradakı texnoloji proseslər barədə məlumat verilmişdir.

Dünyanın ən nəhəng terminallarından biri ilə tanışlıq qonaqlarda xoş təəssürat doğurmuşdur.

AzərTAc

Azərbaycan.-2009.-17 aprel.-S.4.