"Əsrin müqaviləsi"nin əməliyyatçısı bp-nin bir əsr yaşı tamam olur

bp şirkətinin 100 yaşı tamam olur. Baş ofisi Böyük Britaniyada yerləşən bu nəhəng enerji qrupu bütün dünyada nüfuz və şöhrət qazanıb. Başqa sözlə, ötən bir əsr ərzində bp 100-dən artıq ölkədə fəaliyyət göstərən çoxmillətli bir şirkətə çevrilib. Bu ölkələrdən biri də Azərbaycandır.

bp-nin tarixi 1909-cu ilin aprelindən başlanıb. O zaman İranda "Məscidi-Süleyman" yatağının işlənməsi üçün "Anqlo-Fars" Neft Şirkəti ("Anqlo-Persian oil company") yaranıb. Sonralar bu şirkət bp adlandırılıb. Xatırladaq ki, "Məscidi-Süleyman" yatağı Yaxın Şərqdə kommersiya əhəmiyyətli ilk neft kəşfidir.

Ötən 100 il ərzində bp həmişə "cığıraçan" olmağa çalışıb və indi də bu əzmdədir. Bu istək bp-yə daim yeni texnologiyalara və bacarıqlara yiyələnərək başqalarının görə bilməyəcəyi çətin işlərin öhdəsindən gəlməyə imkan verib.

bp həmişə yenilik yaradan, özünə inanan, qarşıya qoyulan məqsədi yerinə yetirən insanların çalışdığı bir şirkət olub. Məhz bu səbəbdən də qazandığı nailiyyətlərin "sərhəd"lərini daim ötüb keçə bilir. Şirkətin bugünkü böyük potensialı onun daha uğurlu gələcəyinə əminlik yaradır. Belə ki, bp 100 il bundan sonra da insanları davamlı enerji ehtiyatları ilə təmin etməkdə qərarlıdır.

bp ölkəmizdə iri neft-qaz yataqlarının işlənməsi və onlardan hasil edilən karbohidrogenlərin ixracı layihələrinin əməliyyatçısıdır. Onun Azərbaycanla əməkdaşlığı "Əsrin müqaviləsi"ndən başlanır. 1994-cü il sentyabrın 20-də imzalanan bu müqavilədən - "Azəri-Çıraq-Günəşli" (AÇG) yataqlarının tammiqyaslı işlənməsi barədə Hasilatın Pay Bölgüsü Sazişindən sonra bp-nin ölkəmizdəki fəaliyyəti daha da genişlənir. Sonrakı illərdə şirkət Heydər Əliyev adına Bakı-Tbilisi-Ceyhan neft kəməri, "Şahdəniz" qaz-kondensat yatağının işlənməsi, Azərbaycan qazını nəql edən Cənubi Qafqaz Boru Kəməri kimi qlobal layihələrin operatoru vəzifəsini yerinə yetirməyə başlayır.

Təsadüfi deyil ki, bir neçə gün əvvəl dövlətimizin başçısı cənab İlham Əliyev "bp - Azərbaycan" şirkətinin prezidenti Bill Şreyderi qəbul edərkən bu əməkdaşlığın uğurlu olduğunu söyləyib. Prezident İlham Əliyev qarşılıqlı fayda verən həmin tərəfdaşlığın ümumiyyətlə Xəzər regionunda əməkdaşlıq üçün geniş imkanlar açdığını qeyd edib.

Azərbaycanın və bp-nin əməkdaşlığı dövlətlərin dünyanın böyük nüfuza malik şirkətləri ilə əməkdaşlığının yaxşı nümunələrindən biri kimi dəyərləndirilir. bp dedikdə göz önünə son illərdə Azərbaycanın neft-qaz sənayesində görülmüş nəhəng işlər gəlir. Bu gün bp-nin əməliyyatçılıq etdiyi AÇG layihəsi çərçivəsində çıxarılan neft dünya bazarlarına yola salınır. Ən müasir platformaların inşasına, Xəzərdən Səngəçaladək neft və qaz daşıyan neçə-neçə sualtı kəmərin çəkilişinə, nəhayət, dünyanın ən böyük terminallarından birinin tikintisinə də bp əməliyyatçılıq edib.

bp ARDNŞ və dünyanın daha 9 tanınmış neft şirkəti ilə tərəfdaşlıq edərək BTC-ni tikdi. İndi də kəmər həmin səhmdarlar tərəfindən müvəffəqiyyətlə istismar edilir.

"Şahdəniz" kimi zəngin, perspektivli bir yatağın işlənməsində və buradan hasil olunan qazın ixracında uğurların qazanılmasında da bp-nin rolu böyükdür. "Şahdəniz"in daha işıqlı gələcəyi var. Deməli, bp-ni ölkəmizdə yeni işlər, vəzifələr gözləyir.

Bu şirkəti Azərbaycanda təkcə neftçilər deyil, bütün xalq tanıyır və sevir. Belə ki, bp ölkəmizdə alimlərlə və incəsənət işçiləri ilə, qaçqın və məcburi köçkünlərlə, tələbələrlə, kimsəsiz uşaqlarla, bütün istedadlı gənclərlə dostluq edir. Onun Bakıda, eləcə də bölgələrdə yatırdığı sosial sərmayələrlə təzələnən infrastruktur obyektlərini saymaqla qurtarmaz.

bp də öz növbəsində Azərbaycanla əməkdaşlığını yüksək qiymətləndirir. 100 yaşlı şirkət neft sənayesində 160 illik zəngin təcrübəsi olan Azərbaycanla birgə gördüyü işlərdən şərəf və məmnunluq duyur.

Flora Sadıqlı

Azərbaycan.-2009.-17 aprel.-S.5