Bakıda İqtisadi Əməkdaşlıq Təşkilatının üzvü olan ölkələrin Milli Kitabxanalarının Direktorlar Şurasının II konfransı işə başlamışdır

Aprelin 20-də M.F.Axundov adına Azərbaycan Milli Kitabxanasında "Bakı - İslam mədəniyyətinin paytaxtı -2009" tədbirləri çərçivəsində İqtisadi Əməkdaşlıq Təşkilatının (İƏT) üzvü olan ölkələrin Milli Kitabxanalarının Direktorlar Şurasının II konfransı işə başlamışdır. Mədəniyyət və Turizm Nazirliyinin və M.F.Axundov adına Azərbaycan Milli Kitabxanasının təşkilatçılığı ilə keçirilən tədbirdə Türkiyə, İran, Pakistan, Türkmənistan, Tacikistan, Özbəkistan, Qazaxıstan, Qırğızıstanın milli kitabxanalarının və İƏT-in Mədəniyyət İnstitutunun nümayəndələri iştirak edirlər.

Mədəniyyət və turizm naziri Əbülfəs Qarayev kitabxanaların fəaliyyətinin yaxşılaşdırılması ilə əlaqədar ölkəmizdə həyata keçirilən tədbirlər barədə ətraflı məlumat vermişdir. Nazir diqqətə çatdırmışdır ki, dövlətimizin başçısı İlham Əliyev mədəniyyətin bütün sahələrində olduğu kimi, kitabxana şəbəkəsində işlərin yaxşılaşdırılmasına böyük diqqət və qayğı göstərir. Prezidentin "Azərbaycanda kitabxanaların fəaliyyətinin yaxşılaşdırılması haqqında" və "Azərbaycan Respublikasında kitabxana-informasiya sahəsinin 2008-2013-cü illərdə inkişafı üzrə Dövlət Proqramı"nın təsdiq edilməsi haqqında" sərəncamları buna əyani sübutdur. Həmin sənədlərdə ölkə kitabxanalarında informasiya cəmiyyətinin tələblərinə uyğun müasir texnologiyaların tətbiqi mühüm vəzifə kimi qarşıya qoyulmuşdur.

İƏT-in üzvü olan ölkələrin Milli Kitabxanalarının Direktorlar Şurasının prezidenti, İran Milli Kitabxana və Arxivinin sədri, İran Prezidentinin mədəniyyət məsələləri üzrə müşaviri Əli Əkbər Əşəri, İƏT-in Mədəniyyət İnstitutunun prezidenti Məhəmməd Rəcəbi, M.F.Axundov adına Milli Kitabxananın direktoru Kərim Tahirov və başqaları tədbirdə fikirlərini bölüşmüşlər.

Beynəlxalq konfrans aprelin 21-də işini davam etdirəcəkdir.

Azərbaycan.-2009.-21 aprel.-S.5.