Azərbaycan Prezidenti İlham Əliyevin sədrliyi ilə Nazirlər Kabinetinin 2009-cu ilin birinci rübünün sosial-iqtisadi inkişafının yekunlarına həsr olunmuş iclası keçirilmişdir

Ailə, Qadın və Uşaq Problemləri üzrə Dövlət Komitəsinin sədri Hicran Hüseynovanın çıxışı

– Möhtərəm cənab Prezident!

Hörmətli müşavirə iştirakçıları!

Azərbaycan xalqının ümummilli lideri Heydər Əliyevin müəyyənləşdirdiyi strategiyanın Sizin uğurlu rəhbərliyiniz altında məqsədyönlü surətdə həyata keçirilməsi nəticəsində bu gün respublikamız milli intibah dövrünün növbəti şərəfli mərhələsini yaşayır. Əldə edilmiş mühüm siyasi və iqtisadi uğurlar cəmiyyət həyatının bütün sahələrində güclü inkişafı şərtləndirir. Son illər önəmli qanunlar, dövlət proqramları qəbul olunmuşdur. Azərbaycanda reallaşdırılan hər bir dövlət proqramının mərkəzində insan, onun rifahı, gələcək nəslin inkişafına qayğı durur. Mövcud potensial sosial siyasətin prioritet istiqamətini təşkil edən ailə, qadın və uşaq problemlərinin həlli üçün etibarlı zəmindir.

Üç il əvvəl Sizin Fərmanınızla Azərbaycan Respublikasının Ailə, Qadın və Uşaq Problemləri üzrə Dövlət Komitəsinin yaradılması və komitə üçün ayrılan büdcə vəsaitlərinin 3 dəfədən çox artması, əməkdaşların sayının isə 20-dən 68-ə çatdırılması fəaliyyət imkanlarımızı əhəmiyyətli dərəcədə genişləndirməklə yanaşı, məsuliyyətimizi daha da artırmışdır.

Hörmətli cənab Prezident!

Sizin dəyərli nitqlərinizdə ailələrin sosial müdafiəsinin gücləndirilməsi, uşaq və yeniyetmələrin həm fiziki, həm də mənəvi cəhətdən güclü nəsil kimi formalaşdırılması zərurətinin vurğulanması bütün cəmiyyəti bu istiqamətdə səfərbər edir.

Cari ilin əvvəlinə olan məlumata görə, respublikamızda 1 milyon 831 min 100 ailə vardır. Son 5 ildə yoxsulluq səviyyəsinin 49 faizdən 13 faizə endirilməsi, 766 min yeni iş yerinin yaradılması, əhalinin pul gəlirlərinin təkcə 2008-ci ildə 36 faiz artması bütün vətəndaşların, hər bir ailənin sosial rifahının yüksəldilməsini şərtləndirir.

Ailənin inkişafı üçün hərtərəfli şəraitin yaradılmasına, həssas qruplardan olan ailələrin problemlərinin həllinə xüsusi önəm verilir.

Daim qeyd etdiyiniz kimi, Şərq və Qərb dəyərlərini özündə birləşdirən Azərbaycan ailə modelinin möhkəmləndirilməsi və təbliği dövlət siyasətinin prioritet istiqamətlərindən birini təşkil edir. Prinsipial göstərişlərinizi rəhbər tutaraq, komitə bu sahədə ardıcıl fəaliyyət həyata keçirir. Hər il komitə tərəfindən təşkil olunan “Ailə bayramı”nda nümunəvi ailələrin seçilməsi artıq respublikamızda ənənəyə çevrilmişdir, bu il isə “Azərbaycan ailəsi” adlı filmlər festivalına start verilməsi daha bir mühüm yenilikdir.

Möhtərəm cənab Prezident!

Dağlıq Qarabağ münaqişəsi nəticəsində ciddi sosial-psixoloji çətinliklərlə qarşılaşan qaçqın və məcburi köçkün ailələrinə daimi diqqətiniz, bu istiqamətdə son illər Sizin tərəfinizdən 45 fərman və sərəncamın imzalanması sayəsində həmin insanların bir çox problemləri artıq öz həllini tapmışdır. Komitənin fəaliyyətinin əsas istiqaməti həssas qruplardan olan ailələrə sadəcə yardım göstərmək deyil, onları respublikanın ictimai həyatına cəlb etməkdir. Bununla əlaqədar, qaçqın və məcburi köçkün ailələrindən olan beş yüzə yaxın yeniyetmə xarici dil, kompyuter və peşə kurslarında təlim keçmişdir. 2006-cı ildə təsdiq etdiyiniz “Gender (kişi və qadınların) bərabərliyinin təminatları haqqında” Qanun respublikada bərabər imkanların təmin edilməsi sahəsində mühüm addım olmuşdur. Azərbaycan az sayda ölkələrdən biridir ki, son iki ildə dövlət büdcəsindən gender və məişət zorakılığı problemlərinin həllinə xüsusi vəsait ayırır. Bu önəmli fakt xarici ekspertlər tərəfindən müsbət nümunə kimi tez-tez vurğulanır.

Cənab Prezident, ölkəmizdə əhalinin 51 faizini təşkil edən Azərbaycan qadınları ictimai-siyasi proseslərdə, o cümlədən seçkilərdə fəal iştirak edir, özlərinin vətəndaş mövqeyini nümayiş etdirirlər. Dövlət və idarəetmə, hüquq mühafizə orqanlarında, elm və mədəniyyət, sahibkarlıq, habelə idmanın müxtəlif sahələrində qadınların sayı ilbəil artır. Ölkəmizdə 100-ə yaxın qadın qeyri-hökumət təşkilatı fəaliyyət göstərir və bu şəbəkənin genişlənməsi və möhkəmlənməsi xüsusilə diqqətəlayiqdir.

Çox hörmətli cənab Prezident!

Sizin dəstəyinizlə ötən il sentyabrın 26-da keçirilmiş və iki minə yaxın nümayəndənin təmsil olunduğu Azərbaycan qadınlarının III qurultayı dövlət qadın siyasətinin əsas istiqamətləri üzrə görülən işlərə müsbət qiymət verməklə, bu sahədə qarşımızda yeni vəzifələr müəyyən etmişdir.

Qurultay iştirakçılarına ünvanladığınız müraciət və bir sıra görkəmli qadınların yüksək dövlət mükafatları ilə təltif edilməsi respublika qadınları tərəfindən dərin minnətdarlıq hissi ilə qarşılanmışdır. Qurultay ərəfəsində respublikanın bütün bölgələrində, habelə sahələr üzrə keçirilən konfranslar ölkə qadınlarının, möhtərəm cənab Prezident, Sizin həyata keçirdiyiniz siyasi kursa fəal dəstəyini bir daha nümayiş etdirdi.

Qurultayda Azərbaycan Respublikasının birinci xanımı, hörmətli Mehriban Əliyevanın iştirakı ölkəmizdə qadın siyasətinə yüksək diqqətin əyani ifadəsi oldu.

Ümumiyyətlə, özünün çoxşaxəli fəaliyyəti ilə insanların dərin rəğbət və ehtiramını qazanmış, ölkə qadınları tərəfindən “Mərhəmət simvolu” seçilmiş Mehriban xanım Əliyevanın rəhbərlik etdiyi Heydər Əliyev Fondu ailə, qadın və uşaq problemlərinin həllinə böyük dəstək verir. Bu istiqamətdə reallaşdırılan layihələr sırasında önəmli yer tutan və bir sıra regionları əhatə edən “XXI əsrdə qadınlara qarşı zorakılıq əleyhinə” layihə çərçivəsində geniş maarifləndirmə kampaniyası həyata keçirilir.

Bu gün bütün dünyada məişət zorakılığı, qadın alveri və qadınlar tərəfindən törədilən cinayətlər ilə bağlı problemlər olduqca aktualdır. Təəssüf ki, belə hallar, az miqyasda olsa da, ölkəmizdə də mövcuddur. Yanlış dini stereotiplərin təsiri altında yeniyetmə qızların təhsildən uzaqlaşdırılması, erkən nikaha daxil olması, bəzən qadınların ictimai həyatdan təcrid edilməsi kimi mənfi hallar əsaslı narahatlıq doğurur və bizdən bu istiqamətdə aparılan işin daha da gücləndirilməsini tələb edir.

Möhtərəm cənab Prezident!

Siz daim milli genofondumuzun qorunub saxlanılması, gənc nəslin fiziki və mənəvi inkişafı, uşaq hüquqlarının təmin edilməsi, uşaqlara dövlət qayğısının artırılması məsələlərinə həssaslıqla yanaşırsınız. Dünyanı bürümüş qlobal iqtisadi böhran fonunda 2009-cu ilin Azərbaycan Respublikasında “Uşaq ili” elan edilməsinə görə Sizə dərin minnətdarlığımızı bildiririk. Təsdiqlədiyiniz tədbirlər planı çərçivəsində bir çox mühüm məsələlər sırasında Respublika Uşaq Məlumat Bankının yaradılması da xüsusi yer tutur.

Fəaliyyətimizin əsas istiqamətlərindən birini təşkil edən uşaq evlərinin məzunlarının gələcək taleyi, kimsəsiz və əlil uşaqlar, azyaşlılar arasında cinayətkarlıqla bağlı problemlər “Uşaq ili” çərçivəsində daha mühüm əhəmiyyət kəsb edir. Bu problemlər Azərbaycanda faiz etibarilə nisbətdə az olsa da öz həllini tapmalıdır.

Cənab Prezident!

Sizin uğurlu və balanslaşdırılmış siyasətiniz Azərbaycanın beynəlxalq nüfuzunu gündən-günə daha da möhkəmləndirir.

Bu amil ölkəmizin ailə, qadın və uşaq problemlərinin həlli istiqamətində xarici dövlətlər və beynəlxalq təşkilatlarla əməkdaşlığının inkişafına əlverişli şərait yaradır və bir çox ölkələrlə fəal təcrübə mübadiləsinə imkan verir. Azərbaycan Respublikasının qoşulduğu qadın və uşaq hüquqları üzrə Beynəlxalq konvensiyaların tövsiyələrini yerinə yetirməsi sahəsindəki fəaliyyəti BMT tərəfindən müsbət qiymətləndirilmişdir.

Bu gün respublikamızda ailə, qadın və uşaq problemləri ilə bağlı qanunvericiliyin inkişafına xüsusi önəm verilir. Ailə Məcəlləsinin təkmilləşdirilməsi məqsədi ilə təkliflər paketi, o cümlədən “Məişət zorakılığının qarşısının alınması haqqında” qanun layihəsi hazırlanmışdır. 2009-cu il martın 18-də keçirilmiş ümumxalq referendumunda Azərbaycan Konstitusiyasının 17-ci maddəsinə edilən düzəlişin təsdiqlənməsi uşaq hüquqlarının konstitusion təminatlarını daha da gücləndirir.

Möhtərəm cənab Prezident!

İcazə verin əmin edim ki, Ailə, Qadın və Uşaq Problemləri üzrə Dövlət Komitəsi qarşıya qoyduğunuz vəzifələri bundan sonra da layiqincə yerinə yetirmək üçün səylərini daha da artıracaq, ailələrin rifahının, qadınların hüquq və imkan bərabərliyinin, uşaqların ahəngdar inkişafının təmin edilməsi istiqamətində bütün zəruri addımları atacaqdır.

Diqqətinizə görə çox sağ olun.

Azərbaycan.-2009.-23 aprel.-S.3.