İƏT-in üzvü olan ölkələrin Milli Kitabxanalarının Direktorlar Şurasının II konfransının nümayəndələri Bakı Dövlət Universitetində olmuşlar

Aprelin 22-də İqtisadi Əməkdaşlıq Təşkilatının (İƏT) üzvü olan ölkələrin Milli Kitabxanalarının Direktorlar Şurasının II konfransının nümayəndələri Bakı Dövlət Universitetində (BDU) olmuşlar.

BDU-nun rektoru, Milli Məclisin deputatı, akademik Abel Məhərrəmov qonaqlara təmsil etdiyi təhsil ocağı haqqında ətraflı məlumat vermişdir.

1919-cu ildə təşkil olunmuş BDU-nun fəaliyyəti barədə danışan rektor diqqətə çatdırmışdır ki, hazırda bu ali təhsil müəssisəsinin 16 fakültəsində 18 mindən çox gənc təhsil alır. Fakültələrdən biri də kitabxanaşünaslıq və informasiya fakültəsidir.

Ali təhsil ocağında tələbələr üçün yaradılmış mövcud şəraitdən söz açan A.Məhərrəmov vurğulamışdır ki, hazırda elektron kitabxananın yaradılması istiqamətində ciddi işlər görülür. Lakin bu sahədə bir çox problemlərlə üzləşirik. Bunlar əsasən proqram təminatı ilə bağlıdır. İstəyirik ki, bu işlərin yüksək səviyyədə qurulmasına nail olaq.

A.Məhərrəmov qonaqları cari ilin sentyabrında 90 illiyi qeyd ediləcək BDU-nun yubiley tədbirlərinə dəvət etdi.

İƏT-in üzvü olan ölkələrin Milli Kitabxanalarının Direktorlar Şurasının prezidenti, İran Milli Kitabxana və Arxivinin sədri, İran Prezidentinin mədəniyyət məsələləri üzrə müşaviri Əli Əkbər Əşəri bütün iştirakçılar adından BDU rəhbərliyinə minnətdarlığını bildirmişdir.

Təmsil etdiyi qurumun maddi-texniki bazası, idarəçilik sistemi və s. barədə ətraflı məlumat verən qonaq bildirmişdir ki, hazırda İƏT-in üzvü olan ölkələrin kitabxanaları, elm, təhsil və mədəniyyət ocaqları arasında əlaqələrin möhkəmləndirilməsi istiqamətində işlər görülür.

Görüşdə tərəflər bir-birilərinə xatirə hədiyyələri təqdim etmişlər.

Sonda nümayəndələr BDU-nun tədris şəraiti ilə yaxından tanış oldular.

AzərTAc

Azərbaycan.-2009.-23 aprel.-S.5.