Ümummilli lider Heydər Əliyevin anadan olmasının 86-cı ildönümü ilə əlaqədar keçirilən inşa yazı müsabiqəsinin qalibləri mükafatlandırılacaqdır

Aprelin 25-də akademik Zərifə Əliyeva adına məktəbdə ümummilli lider Heydər Əliyevin anadan olmasının 86-cı ildönümü ilə əlaqədar Təhsil Nazirliyinin, Yeni Azərbaycan Partiyasının (YAP) və Həmkarlar İttifaqları Konfederasiyasının birgə keçirdikləri “Heydər Əliyev məktəblilərin gözü ilə” inşa yazı müsabiqəsinin III respublika mərhələsi keçirilmişdir.

Təhsil naziri Misir Mərdanov xalqımızın böyük oğlu, dünya şöhrətli siyasi xadim Heydər Əliyevin müasir dövlətimizin yaranmasında və möhkəmlənməsində göstərdiyi tarixi xidmətlərdən danışmış, ulu öndərin siyasi irsinin dərindən öyrənilməsinin vacibliyini vurğulamışdır. Nazir demişdir ki, müsabiqənin akademik Zərifə Əliyeva adına məktəbdə keçirilməsi rəmzi məna daşıyır. O, görkəmli alim, ictimai xadim olmaqla bərabər, ömür-gün yoldaşı kimi ümummilli liderimizə daim mənəvi dayaq olmuşdur.

YAP sədrinin müavini, icra katibi, Milli Məclisin deputatı Əli Əhmədovun və digər şəxslərin iştirak etdiyi tədbirdə bildirilmişdir ki, bu il inşa yazı müsabiqəsində respublikanın orta məktəblərinin 7-11-ci sinif şagirdləri həvəslə iştirak etmişdir. Hər şəhər və rayondan bir nəfər olmaqla 89 uşaq yekun mərhələyə keçmək hüququ qazanmışdır. Mayın 10-dək müsabiqə qaliblərinin adları açıqlanacaq və onlar mükafatlandırılacaqdır.

Sonda inşa yazılarının mövzuları şagirdlərə təqdim olunmuşdur.

AzərTAc

Azərbaycan.-2009.-26 aprel.-S.5.