“Heydər Əliyev və qadın siyasəti” mövzusunda konfrans

Aprelin 24-də Yeni Azərbaycan Partiyası (YAP) Səbail rayon təşkilatının qadınlar məclisi ümummilli lider Heydər Əliyevin anadan olmasının 86-cı ildönümü ilə bağlı “Heydər Əliyev və qadın siyasəti” mövzusunda konfrans keçirmişdir.

Əvvəlcə tədbir iştirakçıları Fəxri Xiyabana gələrək müasir Azərbaycan dövlətinin memarı və qurucusu, ümummilli lider Heydər Əliyevin xatirəsini ehtiramla yad etmiş, məzarı önünə əklil qoymuşlar. Görkəmli oftalmoloq alim, akademik Zərifə xanım Əliyevanın da məzarı üzərinə tər güllər düzülmüşdür.

Konfransda çıxış edən YAP Səbail rayon təşkilatı qadınlar məclisinin sədri, professor Nübar Muxtarova müstəqil Azərbaycanın qurucusu, ölkəmizin dünyaya tanıdılması istiqamətində böyük işlər görən Heydər Əliyevin uzaqgörən siyasətinin bəhrələrindən danışmışdır.

YAP Səbail rayon təşkilatı sədrinin müavini Təranə Kərimova “Heydər Əliyev və qadın siyasəti” mövzusunda məruzə etmişdir.

Milli Məclis Aparatının sosial qanunvericilik şöbəsinin müdiri Adilə Abbasova, Ailə, Qadın və Uşaq Problemləri üzrə Dövlət Komitəsi sədrinin müavini Sədaqət Qəhrəmanova və başqaları çıxış edərək Heydər Əliyev dühasından bəhs etmiş, ümummilli liderimizin qurduğu müstəqil Azərbaycan dövlətinin sükanının etibarlı əllərdə olduğunu bildirmişlər.

Tədbirdə ümummilli lider Heydər Əliyevin dövlətçilik strategiyasının həyata keçirilməsində Azərbaycan qadınlarının rolu, onların ictimai-siyasi fəallığının artırılması istiqamətində görülən işlər barədə məlumat verilmişdir. Gender siyasəti, ailə və uşaqlara dövlət qayğısı, qadın siyasətinin hüquqi bazası, ulu öndərin bu istiqamətdə imzaladığı sənədlərin, qəbul edilmiş hüquqi aktların əhəmiyyəti, dahi şəxsiyyətin təşəbbüsü və təşkilatçılığı ilə hazırlanıb həyata keçirilmiş proqram və layihələrdən danışılmışdır.

AzərTAc

Azərbaycan.-2009.-25 aprel.-S.3.