Azərbaycan Prezidenti İlham Əliyevin Belçika Krallığına işgüzar səfəri

Belçika Krallığında işgüzar səfərdə olan Azərbaycan Respublikasının Prezidenti İlham Əliyev aprelin 29-da NATO-nun baş katibi Yaap de Hoop Sxeffer ilə görüşmüşdür.

NATO-nun baş katibi dövlətimizin başçısını NATO-nun mənzil-qərargahının önündə böyük səmimiyyətlə qarşıladı.

Sonra Prezident İlham Əliyev və Yaap de Hoop Sxeffer Azərbaycanın və NATO-nun bayraqları önündə şəkil çəkdirdilər.

Görüşdə baş katib dedi ki, Azərbaycan ilə əməkdaşlıq uğurla inkişaf edir və NATO bu əməkdaşlığa böyük əhəmiyyət verir. Azərbaycanın regionda xüsusi rolunu vurğulayan Yaap de Hoop Sxeffer bildirdi ki, NATO Azərbaycana bölgədə mühüm rol oynayan tərəfdaş ölkə kimi yanaşır və Prezident İlham Əliyevin bu səfəri NATO-Azərbaycan münasibətlərinin genişlənməsinə xidmət edəcəkdir.

NATO-nun baş katibi Azərbaycanın antiterror əməliyyatlarında iştirakını yüksək qiymətləndirdi və dedi ki, ölkəniz "Fərdi tərəfdaşlığın əməliyyat planı"nda da fəal iştirak edir.

Prezident İlham Əliyev bildirdi ki, NATO-Azərbaycan əlaqələri inkişaf edir, Azərbaycan NATO-nun müxtəlif proqramlarında və tədbirlərində fəal iştirak edir.

"Fərdi tərəfdaşlığın əməliyyat planı"nda ölkəmizin fəal iştirak etdiyini vurğulayan Prezident İlham Əliyev dedi ki, Azərbaycan-NATO əlaqələri ölkəmizin Avratlantik strukturlara inteqrasiyasının tərkib hissələrindən biridir.

Azərbaycanın dövlət başçısı ümidvar olduğunu bildirdi ki, əlaqələrimiz bundan sonra da inkişaf edəcəkdir.

AzərTAc

Azərbaycan.-2009.-30 aprel.-S.1.